ಸಂಸದ್‌ ಟಿವಿಯ ಯೂಟ್ಯೂಬ್‌ ಚಾನಲ್‌ ತಾತ್ಕಾಲಿಕ ಸ್ಥಗಿತ

Team Udayavani, Feb 16, 2022, 6:35 AM IST

ನವದೆಹಲಿ: ಲೋಕಸಭೆ ಮತ್ತು ರಾಜ್ಯಸಭೆ ಕಲಾಪಗಳನ್ನು ನೇರಪ್ರಸಾರ ಮಾಡುವ ಸಂಸದ್‌ ಟಿವಿಯ ಯೂಟ್ಯೂಬ್‌ ವಾಹಿನಿ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿತ್ತು. ಇದಕ್ಕೆ ಕಾರಣ ಹ್ಯಾಕರ್‌ಗಳು.

ಈ ವಾಹಿನಿಯ ಹೆಸರನ್ನು ಅವರು ಎಥೆರಿಯಮ್‌ ಎಂದು ಬದಲಿಸಿದ್ದರು. ಇದನ್ನು ಗಮನಿಸಿ ಯುಟ್ಯೂಬ್‌, ಸಂಸದ್‌ ಟಿವಿಯ ಯೂಟ್ಯೂಬ್‌ ಚಾನೆಲ್‌ ಅನ್ನು ನಿಷ್ಕ್ರಿಯಗೊಳಿಸಿದ್ದರು. ಆದರೆ, ಆರಂಭದಲ್ಲಿ ಯೂಟ್ಯೂಬ್‌ನ ನಿಯಮಗಳನ್ನು ಉಲ್ಲಂ ಸಿದ ಹಿನ್ನೆಲೆಯಲ್ಲಿ ಇದನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಹೇಳಲಾಯಿತು.

ಇವೆಲ್ಲ ನಡೆದಿದ್ದು ಸೋಮವಾರ ತಡರಾತ್ರಿ 1 ಗಂಟೆಗೆ. ವಿಷಯ ಗಮನಕ್ಕೆ ಬಂದ ತಕ್ಷಣ ಸಂಸದ್‌ ಟಿ.ವಿ.ಯ ಸಾಮಾಜಿಕ ತಾಣ ಪಡೆ ಕಾರ್ಯಪ್ರವೃತ್ತವಾಯಿತು. ಯೂಟ್ಯೂಬ್‌ ಕೂಡ ರಂಗಪ್ರವೇಶ ಮಾಡಿತು. ಅಂತೂ ಮಂಗಳವಾರ ಮುಂಜಾನೆ 3.45ಕ್ಕೆ ಕಾರ್ಯಾರಂಭ ಮಾಡಿತು.