ರಸಗೊಬ್ಬರ ವಿತರಣೆ, ದರಕ್ಕೆ ಶೀಘ್ರ ಕಾಯ್ದೆ?

ಸಾರ್ವಜನಿಕರಿಂದ ಪ್ರತಿಕ್ರಿಯೆ ಆಹ್ವಾನಿಸಿದ ಕೇಂದ್ರ; 26ರ ಒಳಗಾಗಿ ಸಲಹೆ, ಟೀಕೆ ಸಲ್ಲಿಸಲು ಕೋರಿಕೆ

Team Udayavani, Feb 17, 2022, 7:40 AM IST

ನವದೆಹಲಿ: ರಸಗೊಬ್ಬರ ವಿತರಣೆ, ಅದರ ಗುಣಮಟ್ಟ, ದರ ಮೇಲೆ ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ವಿಶೇಷ ಕಾಯ್ದೆ ಜಾರಿ ಮಾಡಲು ಕೇಂದ್ರ ಸರ್ಕಾರ ಚಿಂತನೆ ನಡೆಸಿದೆ.

ಕೇಂದ್ರ ರಸಗೊಬ್ಬರ ಸಚಿವಾಲಯ ದೇಶವಾಸಿಗಳಿಂದ ಅದಕ್ಕೆ ಅಭಿಪ್ರಾಯ ಮತ್ತು ಸಲಹೆಗಳನ್ನು ಆಹ್ವಾನಿಸಿದೆ. ಫೆ.26ರ ಒಳಗಾಗಿ ಅದನ್ನು ಸಲ್ಲಿಸುವಂತೆಯೂ ಸಚಿವಾಲಯ ಮನವಿ ಮಾಡಿದೆ.

ಏಕೀಕೃತ ಘಟಕ ಪೋಷಕಾಂಶ ನಿರ್ವಹಣಾ ವಿಧೇಯಕ 2022 (ಇಂಟೆಗ್ರೇಟೆಡ್‌ ಪ್ಲಾಂಟ್‌ ನ್ಯೂಟ್ರಿಶಿಯನ್‌ ಮ್ಯಾನೇಜ್‌ಮೆಂಟ್‌ ಬಿಲ್‌ 2022) ಅನ್ನು www.fert.nic.in/node/2170 ವೆಬ್‌ಸೈಟ್‌ನಲ್ಲಿ ಅಪ್‌ಲೋಡ್‌ ಮಾಡಲಾಗಿದೆ. ಅದನ್ನು ನೋಡಿ ಸಲಹೆ, ಅಭಿಪ್ರಾಯಗಳನ್ನು Under Secretary (Fertilizers Act), Department of Fertilizers, Room No. 222, A-wing, Shastri Bhawan, New Delhi 110001. ಅಂಚೆ ಮೂಲಕ ಮತ್ತು ಇ-ಮೇಲ್‌ ಮೂಲಕ[email protected] ಗೆ ಸಲ್ಲಿಸಲು ಮನವಿ ಮಾಡಿಕೊಳ್ಳಲಾಗಿದೆ.

ವಿಧೇಯಕದ ಪ್ರಮುಖಾಂಶ
– ಬಯೋ ರಸಗೊಬ್ಬರ, ಸಾವಯವ ಗೊಬ್ಬರ, ನ್ಯಾನೋ ಫ‌ರ್ಟಿಲೈಸರ್‌ಗಳ ಬಳಕೆ.
– ದೇಶದಲ್ಲಿ ರಸಗೊಬ್ಬರ ಉತ್ಪಾದನೆ, ವಿತರಣೆ ಮತ್ತು ದರ ನಿಗದಿ ವ್ಯವಸ್ಥೆಯಲ್ಲಿನ ಲೋಪಗಳನ್ನು ಸರಿಪಡಿಸಿ, ಆ ಕ್ಷೇತ್ರದ ಮಾರಾಟ ವ್ಯವಸ್ಥೆ ಉತ್ತಮ ಪಡಿಸುವ ಗುರಿ.
– ಸರಿಯಾದ ರೀತಿಯಲ್ಲಿ ರಸಗೊಬ್ಬರಗಳ ವಿತರಣೆ ಮಾಡುವ ಉತ್ಪಾದಕ, ಡೀಲರ್‌, ಖರೀದಿದಾರರಿಗೆ ಅನ್ಯಾಯವಾಗದಂತೆ ಬೆಲೆ ನಿಯಂತ್ರಣಕ್ಕೆ ಪರಿಹಾರೋಪಾಯಗಳು.
– ಸರ್ಕಾರ ನಿಗದಿಪಡಿಸಿದ ಗರಿಷ್ಠ ಮಾರಾಟ ಬೆಲೆಯಿಂದ ಹೆಚ್ಚಿನ ಪ್ರಮಾಣದಲ್ಲಿ ರಸಗೊಬ್ಬರ ಮಾರಾಟ ಮಾಡದಂತೆ ಡೀಲರ್‌, ಮಾರಾಟಗಾರರ ಮೇಲೆ ನಿಯಂತ್ರಣ.