ಮಾರ್ಚ್‌ನಿಂದ 4 ಲಕ್ಷ ಕೇಂದ್ರಗಳಲ್ಲಿ ಸ್ಪರ್ಶ್‌ ಸೇವೆ ಲಭ್ಯ

Team Udayavani, Feb 23, 2022, 6:25 AM IST

ನವದೆಹಲಿ: ದೇಶದ ಮಾಜಿ ಸೈನಿಕರಿಗೆ ಪಿಂಚಣಿ ಸಂಬಂಧಿ ಆನ್‌ಲೈನ್‌ ಸೇವೆಗಳನ್ನು ಒದಗಿಸುವ “ಸ್ಪರ್ಶ್‌’ ಪೋರ್ಟಲ್‌ನ ಸೇವೆಯು ಸದ್ಯದಲ್ಲೇ ದೇಶಾದ್ಯಂತ 4 ಲಕ್ಷ ಕೇಂದ್ರಗಳಲ್ಲಿ ಲಭ್ಯವಾಗಲಿದೆ.

ಡಿಜಿಟಲ್‌ ಇಂಡಿಯಾ ಯೋಜನೆಯಡಿ ಕೇಂದ್ರ ಸರ್ಕಾರದ ರಕ್ಷಣಾ ಲೆಕ್ಕಪತ್ರ ಇಲಾಖೆ(ಡಿಎಡಿ)ಯು ಕಳೆದ ವರ್ಷದ ಸೆಪ್ಟೆಂಬರ್‌ನಲ್ಲೇ ಈ ಸೇವೆಯನ್ನು ಆರಂಭಿಸಿದೆ.

ಈಗ ಸಿಎಸ್‌ಇ ಇ-ಗವರ್ನೆನ್ಸ್‌ ಸರ್ವಿಸಸ್‌ ಇಂಡಿಯಾ ಲಿ.ನೊಂದಿಗೆ ಇದೇ 24ರಂದು ರಕ್ಷಣಾ ಲೆಕ್ಕಪತ್ರ ಇಲಾಖೆಯು ಒಪ್ಪಂದವೊಂದಕ್ಕೆ ಸಹಿ ಹಾಕಲಿದ್ದು, ಮಾರ್ಚ್‌ನಿಂದಲೇ 4 ಲಕ್ಷ ಸಾಮಾನ್ಯ ಸೇವಾ ಕೇಂದ್ರಗಳಲ್ಲಿ ಸ್ಪರ್ಶ್‌ ಸೇವೆಗಳು ಲಭ್ಯವಾಗುವಂತೆ ಮಾಡಲಿದೆ.

ಇದರಿಂದಾಗಿ ದುರ್ಗಮ ಪ್ರದೇಶಗಳಲ್ಲಿ ನೆಲೆಸಿರುವ, ಕನೆಕ್ಟಿವಿಟಿ ಸಮಸ್ಯೆಯಿರುವಂಥ ಮಾಜಿ ಯೋಧರಿಗೆ ಹಾಗೂ ಅವರ ಕುಟುಂಬ ಸದಸ್ಯರಿಗೆ ಪಿಂಚಣಿ ಪಡೆಯಲು ಸುಲಭವಾಗಲಿದೆ.

6 ತಿಂಗಳಲ್ಲಿ ಎಲ್ಲರಿಗೂ ಆನ್‌ಲೈನ್‌ ಪಿಂಚಣಿ:
ಯಾವುದೇ ಮಧ್ಯಂತರ ಸಂಸ್ಥೆಯನ್ನು (ಬ್ಯಾಂಕ್‌) ಅವಲಂಬಿಸದೇ ನೇರವಾಗಿ ನಿವೃತ್ತ ಯೋಧರ ಖಾತೆಗಳಿಗೆ ಪಿಂಚಣಿ ಮೊತ್ತವನ್ನು ಜಮೆ ಮಾಡುವ ಕೆಲಸವನ್ನು ಸ್ಪರ್ಶ ಅಥವಾ ಪಿಂಚಣಿ ಆಡಳಿತ ವ್ಯವಸ್ಥೆ(ರಕ್ಷಾ) ಮಾಡುತ್ತದೆ. ದೇಶದಲ್ಲಿ 33 ಲಕ್ಷ ರಕ್ಷಣಾ ಪಿಂಚಣಿದಾರರಿದ್ದಾರೆ. ಈ ಪೈಕಿ 5 ಲಕ್ಷದಷ್ಟು ಮಂದಿ ಈ ಹೊಸ ವ್ಯವಸ್ಥೆಗೆ ಬದಲಾಗಿದ್ದಾರೆ. ಮುಂದಿನ 6 ತಿಂಗಳಲ್ಲಿ ಎಲ್ಲರೂ ಸ್ಪರ್ಶ್‌ ಪೋರ್ಟಲ್‌ ಬಳಕೆ ಆರಂಭಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಸರ್ಕಾರಕ್ಕೂ ಉಳಿತಾಯ:
ಪಿಂಚಣಿದಾರರೆಲ್ಲರೂ ಆನ್‌ಲೈನ್‌ ವ್ಯವಸ್ಥೆಗೆ ಬದಲಾದರೆ, ಕೇಂದ್ರ ಸರ್ಕಾರವು ಪ್ರತಿ ತಿಂಗಳು ಬ್ಯಾಂಕುಗಳಿಗೆ ಪಿಂಚಣಿ ಪ್ರೊಸೆಸಿಂಗ್‌ ಶುಲ್ಕ ಪಾವತಿಸಬೇಕಾದ ಅವಶ್ಯಕತೆ ಇರುವುದಿಲ್ಲ. ಹೀಗಾಗಿ, ಸರ್ಕಾರಕ್ಕೆ ವಾರ್ಷಿಕ 250 ಕೋಟಿ ರೂ. ಉಳಿತಾಯವಾಗಲಿದೆ. ಪ್ರಸ್ತುತ ದೇಶದಲ್ಲಿ 800ರಷ್ಟು ಸ್ಪರ್ಶ್‌ ಸೇವಾ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ.