ಉಕ್ರೇನ್‌ ನೆರೆರಾಷ್ಟ್ರಗಳಿಗೆ ನಾಲ್ವರು ಸಚಿವರ ದೌಡು

ಉಕ್ರೇನ್‌ ನಿರಾಶ್ರಿತರನ್ನು ಭಾರತಕ್ಕೆ ಕರೆತರಲು ಸಚಿವರ ಪ್ರಯಾಣ

Team Udayavani, Mar 2, 2022, 7:40 AM IST

aaಉಕ್ರೇನ್‌ ನೆರೆರಾಷ್ಟ್ರಗಳಿಗೆ ನಾಲ್ವರು ಸಚಿವರ ದೌಡು

ನವದೆಹಲಿ: ಉಕ್ರೇನ್‌ನಲ್ಲಿರುವ ಭಾರತೀಯ ವಿದ್ಯಾರ್ಥಿಗಳನ್ನು ಸ್ವದೇಶಕ್ಕೆ ಕರೆತರುವ ಸಲುವಾಗಿ ಕೇಂದ್ರದ ನಾಲ್ವರು ಸಚಿವರಾದ ಜ್ಯೋತಿರಾದಿತ್ಯ ಸಿಂದಿಯಾ,ಹರ್ದೀಪ್ ಸಿಂಗ್ ಪುರಿ, ಕಿರಣ್‌ ರಿಜಿಜು, ವಿ.ಕೆ. ಸಿಂಗ್‌ ಕ್ರಮವಾಗಿ ಉಕ್ರೇನ್‌ನ ನೆರೆರಾಷ್ಟ್ರಗಳಿಗೆ ತೆರಳಿದ್ದಾರೆ.

ಸಿಂದಿಯಾ ರೊಮೇನಿಯಾ ಹಾಗೂ ಮಾಲ್ಡೋವಾಕ್ಕೆ ಆಗಮಿಸುವ ಭಾರತೀಯರನ್ನು ಸ್ವದೇಶಕ್ಕೆ ಕಳುಹಿಸುವ ಕಾರ್ಯಾಚರಣೆಯ ಮೇಲುಸ್ತುವಾರಿ ವಹಿಸಿಕೊಂಡಿದ್ದಾರೆ.

ಸ್ಲೊವಾಕಿಯಾ ಹಾಗೂ ಪೋಲೆಂಡ್‌ಗಳಲ್ಲಿ ನಡೆಯುತ್ತಿರುವ ಇದೇ ಕಾರ್ಯಾಚರಣೆಗಳ ಮೇಲ್ವಿಚಾರಣೆಯನ್ನು ಕ್ರಮವಾಗಿ ಕಿರಣ್‌ ರಿಜಿಜು ಹಾಗೂ ವಿ.ಕೆ. ಸಿಂಗ್‌ ವಹಿಸಿಕೊಂಡಿದ್ದಾರೆ.

ಜೈಶಂಕರ್‌ ಮನವಿ
ಈ ನಡುವೆ, “ಉಕ್ರೇನ್‌ನಲ್ಲಿ ಸಿಲುಕಿರುವ ವಿದ್ಯಾರ್ಥಿಗಳ ಬಗ್ಗೆ ಅವರ ಕುಟುಂಬಸ್ಥರು ನೀಡುವ ಮಾಹಿತಿಗಳನ್ನು ಆಯಾ ಕ್ಷೇತ್ರಗಳ ಸಂಸದರು ವಿದೇಶಾಂಗ ಇಲಾಖೆಯೊಂದಿಗೆ ಹಂಚಿಕೊಳ್ಳಬೇಕು’ ಎಂದು ವಿದೇಶಾಂಗ ಸಚಿವ ಜೈಶಂಕರ್‌, ದೇಶದ ಎಲ್ಲಾ ಸಂಸದರಿಗೆ ಮನವಿ ಮಾಡಿದ್ದಾರೆ.

ಸ್ಲೊವಾಕಿಯಾಕ್ಕೆ ಸ್ಪೈಸ್‌ ಜೆಟ್‌ ವಿಮಾನ
ಉಕ್ರೇನ್‌ನಲ್ಲಿರುವ ಭಾರತೀಯ ವಿದ್ಯಾರ್ಥಿಗಳನ್ನು ಕರೆತರುವುದಕ್ಕಾಗಿ ಸ್ಪೈಸ್‌ ಜೆಟ್‌ ವಿಮಾನ ಸಂಸ್ಥೆಯು, ತನ್ನದೊಂದು ವಿಮಾನವನ್ನು ಉಕ್ರೇನ್‌ನ ನೆರೆರಾಷ್ಟ್ರವಾದ ಸ್ಲೊವಾಕಿಯಾದ ಕೊಸೈಸ್‌ ನಗರಕ್ಕೆ ಕಳುಹಿಸಿದೆ.

182 ಭಾರತೀಯರು ಸ್ವದೇಶಕ್ಕೆ
ಉಕ್ರೇನ್‌ನಲ್ಲಿದ್ದ 182 ಭಾರತೀಯರು ಹಾಗೂ ವಿದ್ಯಾರ್ಥಿಗಳನ್ನು ಹೊತ್ತ ಏರ್‌ ಇಂಡಿಯಾ ವಿಮಾನ, ಮಂಗಳವಾರ ಮುಂಬೈಗೆ ಬಂದಿಳಿಯಿತು. ಉಕ್ರೇನ್‌ನ ನೆರೆರಾಷ್ಟ್ರವಾದ ರೊಮೇನಿಯಾದ ಬುಕಾರೆಸ್ಟ್‌ನಲ್ಲಿ ಜಮಾಯಿಸಿದ್ದ ನಿರಾಶ್ರಿತರನ್ನು ತುಂಬಿಕೊಂಡು ಈ ವಿಮಾನ, ಸೋಮವಾರ ಹೊರಟಿತ್ತು.