ಸಚಿವರು-ಶಾಸಕರ ವಿರುದ್ದ ಕೇಸ್‌ ದಾಖಲಿಸಲು ಆಗ್ರಹ

Team Udayavani, Mar 4, 2022, 11:01 AM IST

ಚಿಂಚೋಳಿ: ಆಳಂದ ತಾಲೂಕಿನಲ್ಲಿ ಗಲಭೆಗೆ ಕಾರಣ ರಾದ ಆರೋಪದಡಿ ಕೇಂದ್ರ ಸಚಿವ ಭಗವಂತ ಖೂಬಾ ಮತ್ತು ಶಾಸಕರ ವಿರುದ್ಧ ಪ್ರಕರಣ ದಾಖಲಿಸುವಂತೆ ಭಾರತ ಕಮ್ಯುನಿಸ್ಟ್‌ ಪಕ್ಷದ ಕಾರ್ಯಕರ್ತರು ತಹಶೀಲ್ದಾರ್‌ಗೆ ಮನವಿ ಸಲ್ಲಿಸಿದರು.

ಪ್ರತಿಭಟನೆ ಉದ್ದೇಶಿಸಿ ಜಿಲ್ಲಾ ಕಾರ್ಯದರ್ಶಿ ಭೀಮಶೆಟ್ಟಿ ಎಂಪಳ್ಳಿ ಮಾತನಾಡಿ, ಶ್ರೀರಾಮಸೇನೆ ಕಾರ್ಯಕರ್ತರು ಒಂದು ವಾರ ಮೊದಲೇ ಆಳಂದದ ಲಾಡ್ಲೆ ಮಶಾಕ್‌ ದರ್ಗಾದಲ್ಲಿರುವ ಲಿಂಗಕ್ಕೆ ಪೂಜೆ ಮಾಡಲು ಪಾದಯಾತ್ರೆ ಹೋಗುತ್ತೇವೆ ಎಂದು ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿಗಳು ನಿಷೇಧಾಜ್ಞೆ ಜಾರಿ ಮಾಡಿದ್ದರು. ಆದರೂ ಅದನ್ನು ಉಲ್ಲಂ ಸಿ ಸಚಿವ ಖೂಬಾ, ಶಾಸಕರಾದ ರಾಜಕುಮಾರ ಪಾಟೀಲ ತೇಲ್ಕೂರ, ಬಸವರಾಜ ಮತ್ತಿಮಡು, ಸುಭಾಷ ಗುತ್ತೇದಾರ ಅವರು ಅಲ್ಲಿಗೆ ಹೋಗಿದ್ದು ಖಂಡನೀಯ ಎಂದರು.

ಸಿಪಿಐ ಪಕ್ಷದ ಜಾಫರಖಾನ್‌ ಮಿರಿಯಾಣ, ಪ್ರದೀಪ ತಿರಲಾಪುರ, ಖಾಜಾಮಿಯಾ ಕುಪನೂರ, ಮಲ್ಲಮ್ಮ ಕೋಡ್ಲಿ, ಕುಪೇಂದ್ರ ತಳವಾಳ ಐನೋಳಿ, ಸಿದ್ಧಣ್ಣ ಭೂತಾಳಿ, ಹಣಮಂತರೆಡ್ಡಿ, ಹಣಮಂತ ಕೊಳ್ಳೂರ, ಸಿದ್ಧಾರ್ಥ ಠಾಕೂರ, ತುಕಾರಾಮ, ದೇವೇಂದ್ರಪ್ಪ ಪಾಟೀಲ ಕೊರವಿ ಇನ್ನಿತರರು ಭಾಗವಹಿಸಿದ್ದರು. ತಹಶೀಲ್ದಾರ್‌ ಅಂಜುಮ ತಬಸುಮಗೆ ಮನವಿ ಪತ್ರ ಸಲ್ಲಿಸಲಾಯಿತು.