ನಾ. ಮೊಗಸಾಲೆ, ವಿ.ಗ. ನಾಯಕ, ರುದ್ರಮ್ಮಗೆ ‘ಪರಸ್ಪರ’ ಪ್ರಶಸ್ತಿ

Team Udayavani, Mar 8, 2022, 10:52 AM IST

ಸಾಗರ: ಇಲ್ಲಿಯ ಪರಸ್ಪರ ಸಾಹಿತ್ಯ ವೇದಿಕೆಯ 2022 ನೇ ಸಾಲಿನ ವಾರ್ಷಿಕ ಪ್ರಶಸ್ತಿಗೆ ಕಾಂತಾವರದ ಲೇಖಕ ಡಾ.ನಾ. ಮೊಗಸಾಲೆ, ಹೊನ್ನಾವರದ ಬರಹಗಾರ ವಿ.ಗ. ನಾಯಕ, ತರಿಕೆರೆಯ ಸಾಮಾಜಿಕ ಕಾರ್ಯಕರ್ತೆ ರುದ್ರಮ್ಮ ಆಯ್ಕೆಯಾಗಿದ್ದಾರೆ ಎಂದು ವೇದಿಕೆಯ ಗೌರವಾಧ್ಯಕ್ಷ ಸಾಹಿತಿ ನಾ.ಡಿಸೋಜ ಸೋಮವಾರ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ನಾ.ಮೊಗಸಾಲೆ ಅವರಿಗೆ ‘ಸಂತ ಶಿಶುನಾಳ ಷರೀಫ’, ವಿ.ಗ.ನಾಯಕರಿಗೆ ‘ಎಫ್. ಕಿಟೆಲ್’, ರುದ್ರಮ್ಮಗೆ ‘ಅಕ್ಕಮಹಾದೇವಿ’ ಹೆಸರಿನ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ಪ್ರಶಸ್ತಿ ೧೦ ಸಾವಿರ ರೂ. ನಗದು ಒಳಗೊಂಡಿದೆ. ಮಾರ್ಚ್ 13 ರಂದು ಬೆಳಿಗ್ಗೆ 11ಕ್ಕೆ ಇಲ್ಲಿನ ವರದಶ್ರೀ ಹೋಟೆಲ್‌ನ ಮಲೆನಾಡು ಸಿರಿ ಸಭಾಂಗಣದಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯಲಿದೆ’ ಎಂದರು.

ವೇದಿಕೆಯ ಸಂಚಾಲಕ ಡಾ.ಸರ್ಫ್ರಾಜ್ ಚಂದ್ರಗುತ್ತಿ ಅವರು, ಸಾಹಿತ್ಯ, ಸಂಘಟನೆ, ಸಾಮಾಜಿಕ ಸೇವಾ ಕ್ಷೇತ್ರಗಳ ಸಾಧಕರ ಗುರುತಿಸಿ ಸಂಸ್ಥೆಯು ಮೂರು ವರ್ಷಗಳಿಂದ ಪ್ರಶಸ್ತಿ ನೀಡುತ್ತಿದೆ ಎಂದರು. ಲೇಖಕ ಡಾ. ಜಿ.ಎಸ್.ಭಟ್, ಉಪನ್ಯಾಸಕ ಎಸ್.ಎಂ. ಗಣಪತಿ ಇದ್ದರು.