ಗೋವಾ: ದಿ ಕಾಶ್ಮೀರ್ ಫೈಲ್ಸ್” ಪೋಸ್ಟರ್ ಹಾಕಲಿಲ್ಲ ಎಂದು ಸಿಬ್ಬಂದಿಗಳಿಗೆ ಥಳಿತ

Team Udayavani, Mar 14, 2022, 4:29 PM IST

ಪಣಜಿ: ಚಿತ್ರಮಂದಿರದ ಎದುರು “ದಿ ಕಾಶ್ಮೀರ್ ಫೈಲ್ಸ್ ” ಚಲನಚಿತ್ರದ ಪೋಸ್ಟರ್ ಹಾಕಲಿಲ್ಲ ಎಂಬ ಕಾರಣಕ್ಕೆ ಮಡಗಾಂವ್ ನ ಐನೊಕ್ಸ್ ಚಿತ್ರಮಂದಿರದ ಕರ್ಮಚಾರಿಗಳ ಮೇಲೆ  ಹಲ್ಲೆ ನಡೆಸಿದ ಘಟನೆ ನಡೆದಿದೆ.

ಘಟನೆಗೆ ಸಂಬಂಧಿಸಿದಂತೆ 45 ಜನರ ವಿರುದ್ಧ ಪೋಲಿಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಆದರೆ ಈ ಚಲನಚಿತ್ರ ಪ್ರದರ್ಶನವನ್ನು ನಿಲ್ಲಿಸಬಾರದು ಎಂದು ಖುದ್ದು ಮುಖ್ಯಮಂತ್ರಿ ಪ್ರಮೋದ ಸಾವಂತ್ ಅವರೇ ಸೂಚನೆ ನೀಡಿದ್ದಾರೆ ಎನ್ನಲಾಗಿದ್ದು, ಇದರಿಂದಾಗಿ ಈ ಪ್ರಕರಣ ರಾಜಕೀಯ ಸ್ವರೂಪ ಪಡೆದುಕೊಳ್ಳುವಂತಾಗಿದೆ.

45 ಜನ ಅಪರಿಚಿತರು ಜಮಾಯಿಸಿ ಥಿಯೇಟರ್ ಸಿಬ್ಬಂದಿಗಳಿಗೆ ಥಳಿಸಿದ್ದಾರೆ ಎಂದು ಐನೊಕ್ಸ್ ಚಿತ್ರಮಂದಿರದ ಮ್ಯಾನೇಜರ್ ಜೋಸೆಫ್ ಪಿರೇರಾ ಮಡಗಾಂವ್ ಫತೊರ್ಡಾ ಪೋಲಿಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ.

ಕಾಶ್ಮೀರದಲ್ಲಿ ಹಿಂದೂ ಪಂಡಿತರ ಮೇಲೆ ನಡೆದಿರುವ ದೌರ್ಜನ್ಯದ ಬಗ್ಗೆ ಎಲ್ಲ ಜನರಿಗೂ ತಿಳಿಯಬೇಕು ಎಂದು ಈ ಚಲನಚಿತ್ರ ಪ್ರದರ್ಶನವನ್ನು ಮುಂದುವರೆಸುವಂತೆ ಐನೊಕ್ಸ್ ಆಡಳಿತ ಮಂಡಳಿಗೆ ಮನವಿ ಮಾಡಿರುವುದಾಗಿ ಮುಖ್ಯಮಂತ್ರಿ ಪ್ರಮೋದ ಸಾವಂತ್ ಟ್ವೀಟ್ ಮಾಡಿದ್ದಾರೆ. ಇಷ್ಟೇ ಅಲ್ಲದೆಯೇ ಮುಂದೆ ಇಂತಹ ದಾಳಿಗಳು ನಡೆಯದಿರಲಿ ಎಂದು ಹಾರೈಸಿದ್ದಾರೆ.