ಹೆಚ್ಚಿನ ಬೆಲೆಗೆ ಗೊಬ್ಬರ ಮಾರಾಟ: ಹೂಗಾರ

Team Udayavani, Mar 16, 2022, 1:25 PM IST

ಅಫಜಲಪುರ: ಪಟ್ಟಣದಲ್ಲಿರುವ ಅನೇಕ ಗೊಬ್ಬರ ಮಾರಾಟ ಅಂಗಡಿಗಳಲ್ಲಿ ಎಂಆರ್‌ಪಿ ದರಕ್ಕಿಂತ ಹೆಚ್ಚಿನ ಬೆಲೆಯಲ್ಲಿ ಗೊಬ್ಬರ ಮಾರಾಟ ಮಾಡಲಾಗುತ್ತಿದೆ ಎಂದು ಕಬ್ಬು ಬೆಳೆಗಾರರ ಸಂಘದ ತಾಲೂಕು ಅಧ್ಯಕ್ಷ ರಮೇಶ ಹೂಗಾರ ಆರೋಪಿಸಿದರು.

ಪಟ್ಟಣದ ಕೃಷಿ ಇಲಾಖೆಯಲ್ಲಿ ಎಡಿ ಎಸ್‌.ಎಚ್‌. ಗಡಗಿಮನಿ ಅವರಿಗೆ ಮನವಿ ಸಲ್ಲಿಸಿ ಮಾತನಾಡಿ, ಗೊಬ್ಬರದ ಅಂಗಡಿಗಳಲ್ಲಿ ದರಪಟ್ಟಿ ಹಾಕುತ್ತಿಲ್ಲ, 1200ರೂ. ಇರುವ ಗೊಬ್ಬರಕ್ಕೆ 1500ರೂ. ತೆಗೆದುಕೊಳ್ಳುತ್ತಿದ್ದಾರೆ. ಮೂಲ ಬೆಲೆಗಿಂತ ಒಂದು ಚೀಲಕ್ಕೆ 300ರೂ.ನಂತೆ ಹೆಚ್ಚುವರಿ ಹಣ ವಸೂಲಿ ಮಾಡಲಾಗುತ್ತಿದೆ. ಇದರಿಂದ ರೈತರ ಜೇಬಿಗೆ ಕತ್ತರಿ ಬೀಳುತ್ತಿದೆ. ಕೂಡಲೇ ತಾವು ಎಂಆರ್‌ಪಿಗಿಂತ ಹೆಚ್ಚು ಹಣ ಪಡೆಯುತ್ತಿರುವ ಗೊಬ್ಬರ ಅಂಗಡಿಗಳ ಮೇಲೆ ಸೂಕ್ತ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ ಬರುವ ದಿನಗಳಲ್ಲಿ ಉಗ್ರ ಹೋರಾಟ ರೂಪಿಸಲಾಗುತ್ತದೆ ಎಂದು ಎಚ್ಚರಿಸಿದರು.

ಭಾಗಣ್ಣ ಕುಂಬಾರ, ಸಿದ್ಧಪ್ಪ ಡಾಂಗೆ, ಮಹಾದೇವಪ್ಪ ಸೇರಿಕಾರ, ಬಸವರಾಜ, ಗುಣ್ಣ, ಪರೇಪ್ಪ, ಲಕ್ಷ್ಮೀಪುತ್ರ ಮನವಿ, ಮಲ್ಲು ಬಳೂರ್ಗಿ ಮತ್ತಿತರರು ಇದ್ದರು.