ಅಸುರನ ಕೈಯಲ್ಲಿ ಅಮೃತ ವರ್ಷಿಣಿ

Team Udayavani, Mar 21, 2022, 1:03 PM IST

ಜನಪ್ರಿಯ “ಅಮೃತವರ್ಷಿಣಿ’ ಧಾರಾವಾಹಿ ಮತ್ತು ರಿಯಾಲಿಟಿ ಶೋಗಳ ಮೂಲಕ ಕಿರುತೆರೆ ವೀಕ್ಷಕರ ಮನ ಮತ್ತು ಗಮನ ಎರಡನ್ನೂ ಸೆಳೆದಿರುವ ನಟಿ ರಜಿನಿ, ಈಗ “ಅಂಬುಜಾ’ ಸಿನಿಮಾದ ಮೂಲಕ ಕಿರುತೆರೆಯಿಂದ ಹಿರಿತೆರೆಗೆ ಅಡಿಯಿಡುತ್ತಿದ್ದಾರೆ.

ಈಗಾಗಲೇ “ಅಂಬುಜಾ’ ಸಿನಿಮಾದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಅಂತಿಮ ಹಂತದಲ್ಲಿದ್ದು, ತಮ್ಮ ಚೊಚ್ಚಲ ಸಿನಿಮಾದ ಬಿಡುಗಡೆಗೂ ಮೊದಲೇ ರಜಿನಿ ಸದ್ದಿಲ್ಲದೆ ಮತ್ತೂಂದು ಸಿನಿಮಾದಲ್ಲಿ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ. ಹೌದು, ರಜಿನಿ ಅಭಿನಯಿಸುತ್ತಿರುವ ಹೊಸ ಸಿನಿಮಾಕ್ಕೆ “ಅಸುರನ ಕೈಯಲ್ಲಿ ಪಾರಿಜಾತ’ ಎಂದು ಟೈಟಲ್‌ ಇಡಲಾಗಿದ್ದು, ಇದೇ ಹೋಳಿ ಹಬ್ಬದ ಸಂದರ್ಭದಲ್ಲಿ ಈ ಸಿನಿಮಾದ ಮೊದಲ ಟೈಟಲ್‌ ಪೋಸ್ಟರ್‌ ಬಿಡುಗಡೆಯಾಗಿದೆ.

ತಮ್ಮ ಹೊಸಚಿತ್ರ ಮತ್ತು ಅದರ ಪಾತ್ರದ ಬಗ್ಗೆ ಮಾತನಾಡುವ ರಜಿನಿ, “ಮೊದಲ ಸಿನಿಮಾ ರಿಲೀಸ್‌ ಗೂ ಮುನ್ನವೇ ಹೊಸ ಸಿನಿಮಾ ಹುಡುಕಿಕೊಂಡು ಬಂದಿರುವುದಕ್ಕೆ ಖುಷಿಯಾಗುತ್ತಿದೆ. ಈ ಸಿನಿಮಾದಲ್ಲಿ ನನ್ನದು ಪಾರಿಜಾತ ಎಂಬ ಚುರುಕು ಹುಡುಗಿಯ ಪಾತ್ರ. ಯಾವಾಗಲೂ ಲೈವ್ಲಿ ಆಗಿರುವಂಥ ಪಟ ಪಟ ಮಾತನಾಡುತ್ತ ಎದುರಿಗಿರುವವರನ್ನು ಮರಳು ಮಾಡುವಂಥ ಪಾತ್ರವಿದು. ನನ್ನ ಪಾತ್ರಕ್ಕೆ ಸಾಕಷ್ಟು ಮಹತ್ವವಿದ್ದು, ಇಡೀ ಸಿನಿಮಾದ ಕಥೆ ನನ್ನ ಪಾತ್ರದ ಸುತ್ತ ನಡೆಯುತ್ತದೆ’ ಎಂದು ವಿವರಣೆ ಕೊಡುತ್ತಾರೆ.

ಇದನ್ನೂ ಓದಿ: ಅಖಾಡಕ್ಕೆ ಚಾಂಪಿಯನ್‌

ಇನ್ನು “ಅಸುರನ ಕೈಯಲ್ಲಿ ಪಾರಿಜಾತ’ ಚಿತ್ರವನ್ನು “ಆತ್ಮ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ನಿರ್ದೇಶಕ ಕಂ ನಿರ್ಮಾಪಕ ಪ್ರಬಿಕ್‌ ಮೊಗವೀರ್‌ ನಿರ್ಮಾಣ ಮಾಡುತ್ತಿದ್ದಾರೆ. ಚಿತ್ರದ ಬಗ್ಗೆ ಮಾತನಾಡುವ ಪ್ರಬಿಕ್‌ ಮೊಗವೀರ್‌, “ಸಿನಿಮಾದ ಟೈಟಲ್‌ “ಅಸುರನ ಕೈಯಲ್ಲಿ ಪಾರಿಜಾತ’ ಅಂತಿದ್ದರೂ, ಈ ಸಿನಿಮಾಕ್ಕೂ ಸಮುದ್ರ ಮಥನಕ್ಕೂ, ಪುರಾಣದ ಕಥೆಗೂ ಯಾವುದೇ ಸಂಬಂಧವಿಲ್ಲ. ಆದರೆ ಅದರಲ್ಲಿನ ಒಂದು ಎಳೆಯನ್ನು ಇಟ್ಟುಕೊಂಡು, ಇಂದಿನ ಕಾಲಮಾನಕ್ಕೆ ತಕ್ಕಂತೆ ಸಿನಿಮಾ ಮಾಡುತ್ತಿದ್ದೇವೆ. ಲವ್‌ ಜೊತೆ ಸಣ್ಣದೊಂದು ಸಸ್ಪೆನ್ಸ್‌-ಕ್ರೈಂ ಥ್ರಿಲ್ಲರ್‌ ಶೈಲಿಯಲ್ಲಿ ಸಿನಿಮಾ ಇರಲಿದೆ’ ಎಂದು ಕಥಾಹಂದರದ ಬಗ್ಗೆ ವಿವರಣೆ ಕೊಡುತ್ತಾರೆ.

ಈ ಹಿಂದೆ ಈ “ಶಾಂತಿಯನ್ನು ಕಳೆದುಕೊಳ್ಳಬೇಡಿ’ ಚಿತ್ರವನ್ನು ನಿರ್ದೇಶಿಸಿದ್ದ ತೇಜಸ್ವಿ ವಿಘ್ನೇಶ್‌ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.

ಚಿತ್ರದಲ್ಲಿ ರಜಿನಿ ಅವರೊಂದಿಗೆ ಕಾರ್ತಿಕ್‌, ಮಂಜುನಾಥ ಹೆಗ್ಡೆ, ಕೆ. ಎಸ್‌ ಶ್ರೀಧರ್‌, ಪ್ರಬಿಕ್‌ ಮೊಗವೀರ್‌, “ಉಗ್ರಂ’ ಪ್ರದೀಪ್‌ ಪೂಜಾರಿ ಮೊದಲಾದವರು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ.

ಚಿತ್ರಕ್ಕೆ ರಾಕೇಶ್‌ ತಿಲಕ್‌ ಛಾಯಾಗ್ರಹಣ, ಧನುಕೃಷ್ಣ ಸಂಕಲನವಿದೆ. ಇದೇ ಏಪ್ರಿಲ್‌ ಮೊದಲ ವಾರದಿಂದ ಈ ಸಿನಿಮಾದ ಚಿತ್ರೀಕರಣ ಆರಂಭವಾಗಲಿದ್ದು, ಬೆಂಗಳೂರು ಸುತ್ತಮುತ್ತ ಬಹುತೇಕ ಚಿತ್ರೀಕರಣ ನಡೆಯಲಿದ್ದು, ಏಪ್ರಿಲ್‌ ಕೊನೆಗೆ ಚಿತ್ರೀಕರಣ ಮುಗಿಸುವ ಯೋಚನೆಯಲ್ಲಿದೆ ಚಿತ್ರತಂಡ.