ಪಡೀಲ್‌-ಕುಲಶೇಖರ: ದ್ವಿಗುಣಿತ ಪಥದಲ್ಲಿ ರೈಲು ಸಂಚಾರ ಆರಂಭ

Team Udayavani, Mar 22, 2022, 7:20 AM IST

ಮಂಗಳೂರು: ಪಡೀಲ್‌ -ಕುಲಶೇಖರ ನಡುವೆ ಹಳಿ ದ್ವಿಗುಣಗೊಂಡ ಪಥದಲ್ಲಿ ಸೋಮವಾರ ರೈಲುಗಳ ಸಂಚಾರ ಆರಂಭಗೊಂಡಿತು.

ಮಂಗಳೂರು ಜಂಕ್ಷನ್‌-ಪಣಂಬೂರು ಮಧ್ಯೆ ಹೊಸ ಸುರಂಗ ಸಹಿತ 19 ಕಿ.ಮೀ. ಹಳಿ ದ್ವಿಗುಣ ಕಾಮಗಾರಿಯಲ್ಲಿ ಬಾಕಿಯುಳಿದಿದ್ದ 2.6 ಕಿ.ಮೀ. ಕಾಮಗಾರಿ ಪೂರ್ಣಗೊಂಡು ಸಂಚಾರಕ್ಕೆ ಯೋಗ್ಯ ಎಂದು ದೃಢೀಕರಿಸಲ್ಪಟ್ಟ ಬಳಿಕ ಸೋಮವಾರ ಅಪರಾಹ್ನ 2.50ರ ವೇಳೆಗೆ ರೈಲು ಸಂಚಾರಕ್ಕೆ ಮುಕ್ತಗೊಳಿಸಲಾಯಿತು.

ರೈಲು ನಂ. 12618 ನಿಜಾಮುದ್ದೀನ್‌-ಎರ್ನಾಕುಳಂ ಜಂಕ್ಷನ್‌ ಮಂಗಳಾ ಲಕ್ಷದ್ವೀಪ್‌ ಎಕ್ಸ್‌ಪ್ರೆಸ್‌ ಹೊಸ ದ್ವಿಗುಣ ಪಥದಲ್ಲಿ ಪ್ರಥಮವಾಗಿ ಹಾದುಹೋಯಿತು. ಮಂಗಳೂರು ಜಂಕ್ಷನ್‌ ಕಡೆಯಿಂದ ರೈಲು ನಂ. 12617 ಎರ್ನಾಕುಳಂ ಜಂಕ್ಷನ್‌-ನಿಜಾಮುದ್ದೀನ್‌ ಮಂಗಳಾ ಲಕ್ಷದ್ವೀಪ್‌ ಎಕ್ಸ್‌ಪ್ರೆಸ್‌ ರೈಲು ಅಪರಾಹ್ನ 3.41ಕ್ಕೆ ಹೊಸದಾಗಿ ಸಂಚಾರಕ್ಕೆ ತೆರವುಗೊಂಡ ಸುರಂಗ ಮಾರ್ಗದಲ್ಲಿ ಹಾದು ಹೋಯಿತು.

ಇದರೊಂದಿಗೆ ಮಾ. 17ರಿಂದ ಈ ಮಾರ್ಗದಲ್ಲಿ ವ್ಯತ್ಯಯಗೊಂಡಿದ್ದ ರೈಲು ಸಂಚಾರ ಸಾಮಾನ್ಯ ಸ್ಥಿತಿಗೆ ಬಂದಿದೆ.

ಪಡೀಲ್‌ ಮತ್ತು ಕುಲಶೇಖರ ನಿಲ್ದಾಣಗಳ ನಡುವೆ ಜೋಡಿಮಾರ್ಗದಲ್ಲಿ ಬಾಕಿಯುಳಿದಿದ್ದ ಅಂತಿಮ ಕಾಮಗಾರಿಗಳನ್ನು ಮಾ. 17ರಿಂದ ಮಾ. 19ರ ವರೆಗೆ ನಡೆಸಲಾಗಿತ್ತು. ಹೊಸ ಎಲೆಕ್ಟ್ರಾನಿಕ್‌ ಇಂಟರ್‌ಲಾಕಿಂಗ್‌ ಪ್ಯಾನಲ್‌ ಪಡೀಲ್‌ ರೈಲು ನಿಲ್ದಾಣದಲ್ಲಿ ಸೋಮವಾರ ಅಪರಾಹ್ನ 2ಕ್ಕೆ ಕಾರ್ಯಾರಂಭ ಮಾಡಿತು.

ಹೊಸ ಪಥ ಕಾರ್ಯಾರಂಭ ಮಾಡುವುದರೊಂದಿಗೆ ಕುಲಶೇಖರದಲ್ಲಿ ಕಾರ್ಯಾಚರಿಸುತ್ತಿದ್ದ ತಾತ್ಕಾಲಿಕ ನಿರ್ವಹಣ ನಿಲ್ದಾಣವನ್ನು ರದ್ದುಗೊಳಿಸಲಾಗಿದೆ.

ಕುಲಶೇಖರ-ಪಡೀಲ್‌ ಮಧ್ಯೆ 780 ಮೀ. ಉದ್ದದ ಹೊಸ ಸುರಂಗವನ್ನು 70 ಕೋ.ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಪಣಂಬೂರು- ಕುಲಶೇಖರ ನಡುವೆ 2.26 ಕಿ.ಮೀ. ಮಾರ್ಗದಲ್ಲಿ 2ನೇ ಹಳಿ ಅಳವಡಿಕೆ ಕಾಮಗಾರಿ ಪೂರ್ಣಗೊಳ್ಳದೆ ರೈಲುಗಳು ಲೈನ್‌ ಕ್ಲಿಯರೆನ್ಸ್‌ಗೆ ಕಾಯಬೇಕಾಗಿತ್ತು. ರೈಲುಗಳನ್ನು ಮಂಗಳೂರು ಜಂಕ್ಷನ್‌ ಹಾಗೂ ಜೋಕಟ್ಟೆ ರೈಲು ನಿಲ್ದಾಣಗಳಲ್ಲಿ ನಿಲ್ಲಿಸಲಾಗುತ್ತಿತ್ತು. ಒಂದು ರೈಲು ಹಾದುಹೋದ ಬಳಿಕ ಇನ್ನೊಂದು ರೈಲಿಗೆ ಅನುಮತಿ ನೀಡಲಾಗುತ್ತಿತ್ತು. ಇದಲ್ಲದೆ ಸರಕು ಸಾಗಾಟ ರೈಲುಗಳ ಸಂಚಾರಕ್ಕೂ ಕಾಯಬೇಕಾಗುತ್ತಿತ್ತು. ಹೊಸ ಲೈನ್‌ ಸಂಚಾರಕ್ಕೆ ತೆರವುಗೊಂಡಿರುವುದರಿಂದ ಈ ಸಮಸ್ಯೆ ಬಗೆಹರಿಯಲಿದೆ.