ಜಾತಿ ಆಧಾರದಡಿ ಕೂಲಿ ಪಾವತಿ ನಿಲ್ಲಿಸಲು ಒತ್ತಾಯ

Team Udayavani, Mar 24, 2022, 6:03 PM IST

ರಾಯಚೂರು: ತಾಲೂಕಿನಲ್ಲಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿ ಕೆಲಸ ಮಾಡುವ ಕೂಲಿ ಕಾರ್ಮಿಕರಿಗೆ ಜಾತಿ ಅನುಸಾರವಾಗಿ ಕೂಲಿ ಹಣ ಪಾವತಿಸುವ ಆದೇಶ ರದ್ದುಪಡಿಸಿ ಎಲ್ಲರಿಗೂ ಸಮಾನತೆಯಿಂದ ಕೂಲಿ ಪಾವತಿ ಮಾಡಬೇಕು ಎಂದು ಕರ್ನಾಟಕ ಜನಸೈನ್ಯದಿಂದ ಜಿಲ್ಲಾಧಿಕಾರಿ ಕಚೇರಿ ಅಧಿಕಾರಿಗೆ ಮನವಿ ಸಲ್ಲಿಸಲಾಯಿತು.

ತಾಲೂಕಿನಲ್ಲಿ 34 ಗ್ರಾಪಂಗಳಲ್ಲಿ ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಗ್ರಾಮೀಣ ಕೂಲಿ ಕಾರ್ಮಿಕರು ಸುಮಾರು ಅನೇಕ ವರ್ಷಗಳಿಂದ ಕೆಲಸ ಮಾಡುತ್ತಿದ್ದು ಜಾತಿ, ಮತ, ಭೇದವಿಲ್ಲದೇ ನಡೆದುಕೊಂಡು ಹೋಗುತ್ತಿದ್ದಾರೆ. ದುಡಿಯುವ ಕೂಲಿ ಕಾರ್ಮಿಕರಿಗೆ ಜಾತಿಗೆ ಅನುಗುಣವಾಗಿ ಎನ್‌ಎಂಆರ್‌ ತೆಗೆದು ಕೆಲಸ ಮಾಡಿರುವ ಪರಿಶಿಷ್ಟ ಜಾತಿ ಕೂಲಿ ಕಾರ್ಮಿಕರಿಗೆ ಮೊದಲನೇ ಹಂತದಲ್ಲಿ ಕೂಲಿ ಹಣ ಜಮಾ ಮಾಡುವುದು, ಒಬಿಸಿ ಜಾತಿಯ ಕೂಲಿ ಕಾರ್ಮಿಕರಿಗೆ 2ನೇ ಹಂತದಲ್ಲಿ ಕೂಲಿ ಹಣ ಪಾವತಿಸುವುದು. ಹೀಗೆ ಒಂದು ಕಣ್ಣಿಗೆ ಬೆಣ್ಣೆ ಇನ್ನೊಂದು ಕಣ್ಣಿಗೆ ಸುಣ್ಣದಂತೆ ತಾರತಮ್ಯ ನೀತಿ ಅನುಸರಿಸುವ ಆದೇಶ ಹೊರಡಿಸಿರುವುದಕ್ಕೆ ಕೂಲಿ ಕಾರ್ಮಿಕರು ಸರ್ಕಾರಕ್ಕೆ ಹಿಡಿಶಾಪ ಹಾಕುತ್ತಿದ್ದಾರೆ ಎಂದು ದೂರಿದರು.

ಈ ಜಾತಿ, ಮತ, ಭೇದ ದೂರವಿಟ್ಟು, ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಕೆಲಸ ಮಾಡುವ ಎಲ್ಲ ಕೂಲಿ ಕಾರ್ಮಿಕರಿಗೆ ಈ ಹಿಂದೆ ಇರುವಂತೆ ಏಕ ಕಾಲಕ್ಕೆ ಕೂಲಿ ಹಣ ಪಾವತಿಸುವ ಆದೇಶ ಹೊರಡಿಸುವಂತೆ ಒತ್ತಾಯಿಸಿದರು. ಈ ವೇಳೆ ಜಿಲ್ಲಾಧ್ಯಕ್ಷ ವೆಂಕಟೇಶ ಅರಗೋಲು, ವೆಂಕಟಸ್ವಾಮಿ, ರಮೇಶ ವಡವಾಟಿ ಸೇರಿದಂತೆ ಇತರರಿದ್ದರು.