ಕ್ರಿಕೆಟ್‌ ಬೆಟ್ಟಿಂಗ್‌: ನಾಲ್ವರ ಬಂಧನ-11800 ರೂ. ವಶಕ್ಕೆ

Team Udayavani, Mar 31, 2022, 5:13 PM IST

ಬಳ್ಳಾರಿ: ಐಪಿಎಲ್‌ ಕ್ರಿಕೆಟ್‌ ಬೆಟ್ಟಿಂಗ್‌ ನಡೆಯುತ್ತಿದ್ದ ಎರಡು ಕಡೆ ಪ್ರತ್ಯೇಕವಾಗಿ ದಾಳಿ ನಡೆಸಿರುವ ಕಂಪ್ಲಿ ಠಾಣೆ ಪೊಲೀಸರು ನಾಲ್ವರನ್ನು ಬಂಧಿಸಿ 11800 ರೂಗಳೊಂದಿಗೆ ಮೊಬೈಲ್‌ ಫೋನ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಸದ್ಯ ನಡೆಯುತ್ತಿರುವ ಐಪಿಎಲ್‌ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಮಾ.29 ರಂದು ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಸನ್‌ರೈಸರ್ ಹೆ„ದರಾಬಾದ್‌ ತಂಡಗಳ ಮಧ್ಯೆ ನಡೆದ ಪಂದ್ಯಕ್ಕೆ ನಂ.10 ಮುದ್ದಾಪುರ ಗ್ರಾಮದಲ್ಲಿ ಸುರೇಶ್‌ (22), ಅನೀಲ್‌ ಕುಮಾರ್‌ ಎನ್ನುವವರು ರಾಜಸ್ಥಾನ್‌ ರಾಯಲ್ಸ್‌ ಗೆದ್ದರೆ 100 ರೂ.ಗೆ 200 ರೂ, ಸನ್‌ ರೈಸರ್ ಹೈದರಾಬಾದ್‌ ಗೆದ್ದರೆ 100 ರೂ.ಗೆ 300 ರೂ. ಕೊಡುವುದಾಗಿ ಹೇಳಿ ಸಾರ್ವಜನಿಕರಿಂದ ಹಣವನ್ನು ಬೆಟ್ಟಿಂಗ್‌ ಕಟ್ಟಿಸಿಕೊಳ್ಳುವಲ್ಲಿ ತೊಡಗಿದ್ದು, ಈ ಕುರಿತು ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ ಕಂಪ್ಲಿ ಪೊಲೀಸರು ಸುರೇಶ್‌ (22), ಅನೀಲ್‌ ಕುಮಾರ್‌ ಎಂಬ ಇಬ್ಬರು ಆರೋಪಿಗಳನ್ನು ಬಂಧಿಸಿ 10 ಸಾವಿರ ರೂ.ಗಳೊಂದಿಗೆ ಚೀಟಿ, ಬಾಲ್‌ಪೆನ್‌, ಬೆಟ್ಟಿಂಗ್‌ಗೆ ಬಳಸಿದ್ದ ಮೊಬೈಲ್‌ ಫೋನ್‌ನ್ನು ವಶಪಡಿಸಿಕೊಂಡಿದ್ದಾರೆ.

ಕಂಪ್ಲಿ ಪಟ್ಟಣದ ಪದವಿ ಕಾಲೇಜು ಹಿಂಭಾಗ ಕೋಳಿ ಫಾರಂ ಮುಂದೆ ಸಾರ್ವಜನಿಕ ಸ್ಥಳದಲ್ಲಿ ಈ ತಂಡಗಳ ನಡುವೆ ಬೆಟ್ಟಿಂಗ್‌ ನಡೆಯುತ್ತಿರುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಪೊಲೀಸರು ದಾಳಿ ನಡೆಸಿ, ಮಂಜುನಾಥ್‌ (36), ಯೂಸೂಫ್‌ ಎನ್ನುವವರನ್ನು ಬಂಧಿಸಿ ಅವರಿಂದ 1800 ರೂಗಳೊಂದಿಗೆ ಮೊಬೈಲ್‌ ಫೋನ್‌ ನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ಎಸ್‌ಪಿ ಸೈದುಲು ಅಡಾವತ್‌ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.