‘ಆಚಾರ್‌ & ಕೋ’; ಇದು ಪಿಆರ್‌ಕೆ ಹೊಸ ಚಿತ್ರ

Team Udayavani, Apr 7, 2022, 9:51 AM IST

ಪಿಆರ್‌ಕೆ- ಇದು ಪುನೀತ್‌ ರಾಜ್‌ ಕುಮಾರ್‌ ಕನಸಿನ ಸಂಸ್ಥೆ. ಈ ಸಂಸ್ಥೆ ಮೂಲಕ ಹಲವು ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡಬೇಕು ಹಾಗೂ ತಮ್ಮ ತಾಯಿಯ ಆಸೆಯಂತೆ ಈ ಬ್ಯಾನರ್‌ನಲ್ಲಿ ನೂರಾರು ಸಿನಿಮಾಗಳನ್ನು ಮಾಡಬೇಕೆಂಬ ಕನಸಿನೊಂದಿಗೆ ಪುನೀತ್‌ ಹುಟ್ಟುಹಾಕಿರುವ ಸಂಸ್ಥೆಯಿದು.

ಈಗಾಗಲೇ ಈ ಸಂಸ್ಥೆಯಡಿ ಹಲವು ಸಿನಿಮಾಗಳು ನಿರ್ಮಾಣವಾಗಿವೆ. ಆದರೆ, ಈಗ ಪುನೀತ್‌ ನಮ್ಮೊಂದಿಗಿಲ್ಲ. ಆದರೆ ಅವರ ಕನಸು ಜೀವಂತವಾಗಿದೆ. ಪುನೀತ್‌ ಅವರ ಕನಸನ್ನು ನನಸು ಮಾಡುವಲ್ಲಿ ಅವರ ಪತ್ನಿ ಅಶ್ವಿ‌ನಿ ಪುನೀತ್‌ ರಾಜ್‌ಕುಮಾರ್‌ ಮುಂದಾಗಿದ್ದಾರೆ. ಅದರ ಫ‌ಲವಾಗಿ ಪಿಆರ್‌ಕೆಯಿಂದ ಹೊಸ ಸಿನಿಮಾ ಅನೌನ್ಸ್‌ ಆಗಿದೆ. ಅದು “ಆಚಾರ್‌ ಅಂಡ್‌ ಕೋ’.

ಇದು ಪಿಆರ್‌ಕೆ ಸಂಸ್ಥೆಯಲ್ಲಿ ನಿರ್ಮಾಣವಾಗುತ್ತಿರುವ ಹೊಸ ಸಿನಿಮಾ. ಈ ಚಿತ್ರವನ್ನು ಸಿಂಧು ಶ್ರೀನಿವಾಸಮೂರ್ತಿ ನಿರ್ದೇಶಿಸುತ್ತಿದ್ದಾರೆ. ಇದು ಇವರ ಚೊಚ್ಚಲ ಚಿತ್ರ. ಇನ್ನು ಚಿತ್ರದ ನಿರ್ಮಾಣದಲ್ಲಿ ಗುರುದತ್‌ ಎ ತಲ್ವಾರ್‌ ಕೂಡಾ ಕೈ ಜೋಡಿಸಿದ್ದಾರೆ. ಚಿತ್ರಕ್ಕೆ ಬಿಂದು ಮಾಲಿನಿ ಅವರ ಸಂಗೀತವಿದೆ. ಅಂದಹಾಗೆ, ಇದು ಬೆಂಗಳೂರು ಕುರಿತಾದ ಕಥೆಯಾಗಿದ್ದು, ಚಿತ್ರದ ಪೋಸ್ಟರ್‌ನಲ್ಲಿ “1971ರಿಂದ’ ಎಂಬ ಟ್ಯಾಗ್‌ಲೈನ್‌ ಬೇರೆ ಇದೆ.

ಇದನ್ನೂ ಓದಿ:ಚಂದನವನದ ಹಾಟ್ & ಹ್ಯಾಂಡ್ಸಮ್ ಹುಡುಗ Praveen Tej ಸ್ಟಿಲ್ಸ್

ಸಂಸ್ಥೆಯ ಹೊಸ ಸಿನಿಮಾ ಬಗ್ಗೆ ಟ್ವೀಟ್‌ ಮಾಡಿರುವ ಅಶ್ವಿ‌ನಿ ಪುನೀತ್‌ ರಾಜ್‌ಕುಮಾರ್‌, “ಆಚಾರ್‌ ಅಂಡ್‌ ಕೋ’ ಪಿ.ಆರ್‌. ಕೆ. ಪ್ರೊಡಕ್ಷನ್ಸ್‌ನ 10 ನೇ ಚಿತ್ರ. 60 ನೇ ದಶಕದ ಬೆಂಗಳೂರನ್ನು ನಿಮ್ಮ ಮುಂದೆ ತರಲು ಒಂದು ಪ್ರಯತ್ನ. ಇದು ನಮ್ಮ ಸಂಸ್ಥೆಯಿಂದ ಮಹಿಳಾ ನಿರ್ದೇಶನದ ಮೊದಲ ಚಿತ್ರವಾಗಿದ್ದು, ಮುಂಚೂಣಿಯಲ್ಲಿ ಹಲವಾರು ಮಹಿಳೆಯರನ್ನು ಸಹ ಒಳಗೊಂಡಿದೆ’ ಎಂದಿದ್ದಾರೆ.