ಕೊರಿಯಾ ಓಪನ್‌: ಕ್ವಾರ್ಟರ್‌ ಫೈನಲ್‌ಗೆ ಸಿಂಧು

Team Udayavani, Apr 8, 2022, 6:45 AM IST

ಹೊಸದಿಲ್ಲಿ: ಪಿ.ವಿ. ಸಿಂಧು ಮತ್ತು ಕೆ. ಶ್ರೀಕಾಂತ್‌ “ಕೊರಿಯಾ ಓಪನ್‌ ಸೂಪರ್‌ 500′ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಆದರೆ ಲಕ್ಷ್ಯ ಸೇನ್‌ ದ್ವಿತೀಯ ಸುತ್ತಿನಲ್ಲಿ ಸೋಲನುಭವಿಸಿದ್ದಾರೆ.

ವಿಶ್ವದ 7ನೇ ರ್‍ಯಾಂಕಿಂಗ್‌ ಆಟಗಾರ್ತಿಯಾಗಿರುವ ಪಿ.ವಿ. ಸಿಂಧು ಜಪಾನ್‌ನ 26ನೇ ರ್‍ಯಾಂಕಿಂಗ್‌ನ ಅಯಾ ಒಹೊರಿ ವಿರುದ್ಧ 21-15, 21-10 ಅಂತರದ ಸುಲಭ ಜಯ ಸಾಧಿಸಿದರು. ಇದರೊಂದಿಗೆ ಒಹೊರಿ ವಿರುದ್ಧ ಆಡಿದ ಎಲ್ಲ 12 ಪಂದ್ಯಗಳಲ್ಲೂ ಸಿಂಧು ಗೆದ್ದು ಬಂದಂತಾಯಿತು. ಮುಂದಿನ ಎದುರಾಳಿ ಥಾಯ್ಲೆಂಡ್‌ನ‌ ಬುಸಾನನ್‌ ಒನ್ಗಬಮ್ರುಂಗಫಾನ್‌. ಈಕೆಯ ವಿರುದ್ಧ ಸಿಂಧು 16-1 ಅಂತರದ ಅಮೋಘ ಗೆಲುವಿನ ದಾಖಲೆ ಹೊಂದಿದ್ದಾರೆ.

ಕೆ. ಶ್ರೀಕಾಂತ್‌ 21-18, 21-6 ಅಂತರದಿಂದ ಇಸ್ರೇಲ್‌ನ ಮಿಶಾ ಜಿರ್ಲ್ಮನ್‌ ಅವರನ್ನು ಮಣಿಸಿದರು. ಕೊರಿಯಾದ ಸನ್‌ ವಾನ್‌ ಹೊ ಭಾರತೀಯನ ಮುಂದಿನ ಎದುರಾಳಿ. ಆದರೆ ಲಕ್ಷ್ಯ ಸೇನ್‌ 20-22, 9-21 ಅಂತರದಿಂದ ಶೆಸರ್‌ ಹಿರೆನ್‌ ರುಸ್ತಾವಿಟೊ ವಿರುದ್ಧ ಪರಾಭವಗೊಂಡರು. ವನಿತಾ ಸಿಂಗಲ್ಸ್‌ ನಲ್ಲಿ ಮಾಳವಿಕಾ ಬನ್ಸೋಡ್‌ ಕೂಡ ಸೋಲು ಕಂಡಿದ್ದಾರೆ.

ಪುರುಷರ ಡಬಲ್ಸ್‌ನಲ್ಲಿ ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಸಿಂಗಾಪುರದ ಹೀ ಯಂಗ್‌ ಕೈ ಟೆರ್ರಿ-ಲೋಹ್‌ ಕೀನ್‌ ಜೀನ್‌ ಅವರನ್ನು 21-15, 21-19 ಅಂತರದಿಂದ ಮಣಿಸುವಲ್ಲಿ ಯಶಸ್ವಿಯಾದರು.