ತರೂರ್‌-ಸುಪ್ರಿಯಾ ಮಾತುಕತೆ ವೈರಲ್‌

Team Udayavani, Apr 8, 2022, 7:08 AM IST

ಹೊಸದಿಲ್ಲಿ: ಲೋಕಸಭೆಯಲ್ಲಿ ಸಂಸದ ಫಾರೂಕ್‌ ಅಬ್ದುಲ್ಲಾ ಅವರು ಭಾಷಣ ಮಾಡುತ್ತಿದ್ದರೆ, ಅದರ ಅರಿವೇ ಇಲ್ಲದಂತೆ ಕಾಂಗ್ರೆಸ್‌ ಸಂಸದ ಶಶಿ ತರೂರ್‌ ಹಾಗೂ ಎನ್‌ಸಿಪಿ ಸಂಸದೆ ಸುಪ್ರಿಯಾ ಸುಳೆ ಅವರು ಮಾತುಕತೆಯಲ್ಲಿ ನಿರತರಾಗಿದ್ದ ವೀಡಿಯೋ ಕ್ಲಿಪ್‌ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಮುಂದಿನ ಸೀಟಿನಲ್ಲಿ ಜಮ್ಮು ಮತ್ತು ಕಾಶ್ಮೀರ ಮಾಜಿ ಸಿಎಂ ಫಾರೂಕ್‌ ಅಬ್ದುಲ್ಲಾ ಅವರು ಎದ್ದು ನಿಂತು ಮಾತನಾಡುತ್ತಿದ್ದರು. ಅವರ ಹಿಂದಿನ ಆಸನದಲ್ಲಿ ಕುಳಿತಿದ್ದ ಸುಪ್ರಿಯಾ ಸುಳೆ ಹಾಗೂ ಅದರ ಹಿಂದಿನ ಸಾಲಿನಲ್ಲಿದ್ದ ತರೂರು ಪರಸ್ಪರ ಮಾತುಕತೆಯಲ್ಲಿ ತೊಡಗಿದ್ದರು.

ತರೂರ್‌ ಅವರಂತೂ ಮೇಜಿನ ಮುಂಭಾಗಕ್ಕೆ ಬಾಗಿಕೊಂಡು ಸುಳೆ ಅವರ ಮಾತನ್ನು ತದೇಕಚಿತ್ತರಾಗಿ ಆಲಿಸುತ್ತಿದ್ದರು. ಈ ವೀಡಿಯೋಗೆ “ಪುಷ್ಪ’ ಸಿನೆಮಾದ “ಶ್ರೀವಲ್ಲಿ’ ಹಾಡಿನ ಆಡಿಯೋ ಹಾಕಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಯಬಿಡಲಾಗಿದೆ. ಇದಕ್ಕೆ ಹಲವು ಪ್ರತಿಕ್ರಿಯೆಗಳು ಬಂದಿದ್ದು, ಮೀಮ್‌ಗಳ ಪ್ರವಾಹವೇ ಹರಿದಿದೆ.