ಒಂದು ಕೆಜಿ ಚಹಾ ಎಲೆ ಬೆಲೆ 11 ಲಕ್ಷ ರೂ.! ಜಪಾನ್‌ ಸಮಿದೋರಿಗೆ ಚಿನ್ನದ ಬೆಲೆ

Team Udayavani, Apr 21, 2022, 10:35 AM IST

ಟೋಕಿಯೋ: ಒಂದು ಕೆಜಿ ಚಹಾ ಪುಡಿ ಬೆಲೆ ಎಷ್ಟಿರಬಹುದು? ನೂರು, ಸಾವಿರದ ಲೆಕ್ಕವನ್ನು ನೀವು ಎಣಿಸಿದ್ದರೆ ನೀವು ಲೆಕ್ಕ ತಪ್ಪಿದ್ದೀರಿ. ಏಕೆಂದರೆ ಜಪಾನ್‌ನ ಒಂದು ಕೆಜಿ ಚಹಾ ಎಲೆ ಬೆಲೆ ಬರೋಬ್ಬರಿ 11.65 ಲಕ್ಷ ರೂ.!

ಹೌದು ಚಹಾ ಎಲೆ ಬೆಳೆಗೆ ಪ್ರಸಿದ್ಧವಾಗಿರುವ ಜಪಾನ್‌ನಲ್ಲಿ ಸಮಿದೋರಿ ಹೆಸರಿನ ಅತ್ಯಂತ ದುಬಾರಿಯ ಚಹಾ ಎಲೆ ಬೆಳೆಯಲಾಗುತ್ತದೆ. ಅದರ ಹರಾಜು ಪ್ರಕ್ರಿಯೆ ಸೋಮವಾರ ಜಪಾನ್‌ನ ಚಹಾ ಮಾರುಕಟ್ಟೆಯಲ್ಲಿ ನಡೆದಿದ್ದು, ಸಮಿದೋರಿ ಚಹಾ ಎಲೆಯನ್ನು ಹೋಲ್‌ಸೇಲ್‌ ವ್ಯಾಪಾರಿಯೊಬ್ಬರು ಕೆಜಿಗೆ 11.65 ಲಕ್ಷ ರೂ.ನಂತೆ ಖರೀದಿಸಿದ್ದಾರೆ.

ಈ ಎಲೆಯನ್ನು ಗ್ರೀನ್‌ ಟೀ ಮಾಡುವುದಕ್ಕೆ ಬಳಕೆ ಮಾಡಲಾಗುತ್ತದೆ. ಈ ಹಿಂದೆ ಜಪಾನ್‌ನಲ್ಲಿ ಸಮಿದೋರಿ ಚಹಾ ಎಲೆ ಕೆಜಿಗೆ 6.42 ಲಕ್ಷ ರೂ.ನಂತೆ ಮಾರಾಟವಾಗಿ ದಾಖಲೆ ಬರೆದಿತ್ತು.

ಫೋರ್ಬ್ಸ್ ಸಂಸ್ಥೆಯ ವರದಿಯ ಪ್ರಕಾರ 2020ರಲ್ಲಿ ಈ ಸಮಿದೋರಿ ಚಹಾ ಎಲೆಯ ಎರಡು ಚಮಚ ಪುಡಿ ಹಾಕಿ ಮಾಡುವ ಒಂದು ಕಪ್‌ ಚಹಾಕ್ಕೆ ಬರೋಬ್ಬರಿ 2300 ರೂ. ಬೆಲೆಯಿತ್ತು!