ಬಿ.ಆರ್.ಕಾವಲಿನಲ್ಲಿ ದೊಡ್ಡಮ್ಮ-ಚಿಕ್ಕಮ್ಮ ದೇವಿ ರಥೋತ್ಸವ

Team Udayavani, Apr 29, 2022, 8:08 PM IST

ಹುಣಸೂರು: ತಾಲೂಕಿನ ಹನಗೋಡು ಹೋಬಳಿಯ ಬಿ.ಆರ್ ಕಾವಲು ಗ್ರಾಮದಲ್ಲಿ ಗ್ರಾಮ ದೇವತೆ ದೊಡ್ಡಮ್ಮ-ಚಿಕ್ಕಮ್ಮ ದೇವಿಯ ರಥೋತ್ಸವವು ಶುಕ್ರವಾರ ಭಕ್ತರ ಜಯ ಉದ್ಘೋಷಗಳ ನಡುವೆ ವಿಜೃಂಭಣೆಯಿಂದ ನಡೆಯಿತು.

ಬಿ.ಆರ್.ಕಾವಲ್ ಗ್ರಾಮದ ದೇವಾಲಯದ ಪ್ರಾಂಗಣದಲ್ಲಿ ಗುರುವಾರ ಸಂಜೆ ಕಳಸ ಪ್ರತಿಷ್ಠಾಪನೆಯೊಂದಿಗೆ ಪ್ರಾರಂಭವಾಗಿ ಶುಕ್ರವಾರ ಮುಂಜಾನೆಯಿಂದಲೇ ಪೂಜಾ ವಿಧಿ-ವಿಧಾನ ನಡೆಸಿ ಬೆಳಿಗ್ಗೆ ಹೂವಿನಿಂದ ಅಲಂಕೃತಗೊಂಡಿದ್ದ ರಥದಲ್ಲಿ ದೇವಿಯ ಉತ್ಸವ ಮೂರ್ತಿಯನ್ನಿಟ್ಟು ಭಕ್ತರು ಭಕ್ತಿ-ಭಾವದಿಂದ ತೇರನ್ನೆಳೆದರು. ರಥೋತ್ಸವದ ವೇಳೆ ಭಕ್ತರು, ನವ ದಂಪತಿಗಳು ಹರಕೆ ಹೊತ್ತ ಭಕ್ತರು ರಥಕ್ಕೆ ಹಣ್ಣು ಜವನ ಎಸೆದು ಪುನೀತರಾದರು.

ರಥೋತ್ಸವಕ್ಕೂ ಮುನ್ನ ದೇವಾಲಯಕ್ಕೆ ಮೈಸೂರು ಜಿಲ್ಲಾ ಹಾಲು ಒಕ್ಕೂಟದ ನಿರ್ದೇಶಕ ಕೆ.ಎಸ್.ಕುಮಾರ್ ಭೇಟಿ ನೀಡಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿ ರಥೋತ್ಸವಕ್ಕೆ ಚಾಲನೆ ನೀಡಿದರು.

ಈ ವೇಳೆ ಹನಗೋಡು ತಾ.ಪಂ.ಮಾಜಿ ಸದಸ್ಯೆ ರೂಪನಂದೀಶ್, ಗ್ರಾಮದ ಯಜಮಾನರಾದ ಸೋಮೇಗೌಡ, ನಾಗೇಗೌಡ, ಶ್ರೀನಿವಾಸ್ ಗೌಡ, ಕೃ ಷ್ಣಾ ಗೌಡ, ಚಲುವಮ್ಮ ವೆಂಕಟೇಶ್, ಮಂಡಿಮಾದೇಗೌಡ, ಪೂಜಾರಿನಾಗರಾಜ್, ಶೀಲಾರಾಜು, ನಂದೀಶ, ಗಣೇಶ, ಮಂಜೇಶ ಸೇರಿದಂತೆ ನೂರಾರು ಮಂದಿ ಭಕ್ತರು ಭಾಗವಹಿಸಿದ್ದರು.