ಇಂಗಳೇಶ್ವರದಲ್ಲಿ 8ರಂದು ವಚನ ಶಿಲಾಮಂಟಪ ಲೋಕಾರ್ಪಣೆ

Team Udayavani, Apr 30, 2022, 3:37 PM IST

ಬಸವನಬಾಗೇವಾಡಿ: ತಾಲೂಕಿನ ಇಂಗಳೇಶ್ವರ ವಿರಕ್ತಮಠದಲ್ಲಿರುವ ವಚನ ಶಿಲಾಮಂಟಪವನ್ನು ಜೂನ್‌ 8 ರಂದು ನಾಡಿನ 300ಕ್ಕೂ ಹೆಚ್ಚು ವಿವಿಧ ಮಠಾಧೀಶರ ಸಾನಿಧ್ಯದಲ್ಲಿ ರಾಜ್ಯದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಲೋಕಾರ್ಪಣೆ ಮಾಡಲಿದ್ದಾರೆ ಎಂದು ಡಾ|ಸಿದ್ಧಲಿಂಗ ಶ್ರೀಗಳು ಹೇಳಿದರು.

ತಾಲೂಕಿನ ಇಂಗಳೇಶ್ವರ ವಿರಕ್ತಮಠದಲ್ಲಿರುವ ವಚನ ಶಿಲಾಮಂಟಪದಲ್ಲಿ ಶುಕ್ರವಾರ ಜಿಲ್ಲೆಯ ವಿವಿಧ ಗ್ರಾಮಗಳಿಂದ ಆಗಮಿಸಿದ್ದ ಭಕ್ತರ ಪೂರ್ವಭಾವಿ ಸಭೆಯ ಬಳಿಕ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿದರು.

ವಚನ ಶಿಲಾಮಂಟಪ ಕಾರ್ಯ ಸುಮಾರು 40 ವರ್ಷಗಳಿಂದ ನಿರಂತರವಾಗಿ ನಡೆಯುತ್ತ ಬಂದಿದೆ. ಈ ವಚನ ಶಿಲಾಮಂಟಪದಲ್ಲಿ ಬಸವಣ್ಣನವರು ಸೇರಿದಂತೆ ಬಸವಾದಿ ಶರಣರ 1ಲಕ್ಷ 60 ಸಾವಿರ ಅಕ್ಷರಗಳಲ್ಲಿ ವಚನಗಳನ್ನು ಕೆತ್ತಲಾಗಿದೆ. ಕಳೆದ 3 ವರ್ಷಗಳ ಹಿಂದೆ ಈ ವಚನ ಶಿಲಾಮಂಟಪ ಲೋಕಾರ್ಪಣೆ ಮಾಡಬೇಕಿತ್ತು. ಆದರೆ ಕೋವಿಡ್‌ ಹಾಗೂ ಇನ್ನಿತರೆ ಕಾರಣಗಳಿಂದ ವಿಳಂಬವಾಗಿದೆ ಎಂದು ಹೇಳಿದರು.

ಕಾರ್ಯಕ್ರಮಕ್ಕೆ ದೇಶದ ರಾಷ್ಟ್ರಪತಿ, ಪ್ರಧಾನಮಂತ್ರಿಯವರನ್ನು ಆಹ್ವಾನಿಸಲು ಇಚ್ಚಿಸಲಾಗಿತ್ತು. ಆದರೆ ಹಲವು ಕಾರಣಗಳಿಂದ ಆಹ್ವಾನಕ್ಕೆ ವಿಳಂಬವಾಗಿದೆ. ಈಗಲೂ ಕೂಡಾ ಅವರನ್ನು ಮತ್ತು ರಾಜ್ಯದ ಮುಖ್ಯಮಂತ್ರಿ ಸೇರಿದಂತೆ ಅನೇಕ ಗಣ್ಯ ಮಾನ್ಯರನ್ನು ಆಹ್ವಾನಿಸುವ ಉದ್ದೇಶ ಹೊಂದಿದೆ ಎಂದರು.

ಕಸಾಪ ಜಿಲ್ಲಾಧ್ಯಕ್ಷ ಹಾಸಿಂಪೀರ್‌ ವಾಲಿಕಾರ ಮಾತನಾಡಿ, ಮೇ.3ರಂದು ಬಸವ ಜಯಂತಿ ದಿನದಂದು ಬಸವಜ್ಯೋತಿ ರಥಯಾತ್ರೆಗೆ ಸಂಜೆ 5ಕ್ಕೆ ಚಾಲನೆ ನೀಡಲಾಗುವುದು. ಈ ಬಸವಜ್ಯೋತಿ ರಥಯಾತ್ರೆ ಜಿಲ್ಲಾದ್ಯಂತ ಸಂಚರಿಸಿ ಜೂನ್‌ 7ಕ್ಕೆ ಮರಳಿ ಇಂಗಳೇಶ್ವರ ಗ್ರಾಮಕ್ಕೆ ಆಗಮಿಸಲಿದೆ. ಮೇ 8 ರಂದು ವಚನ ಶಿಲಾಮಂಟಪದ ರೂವಾರಿ ಚನ್ನಬಸವ ಶ್ರೀಗಳ ಹಾಗೂ ಮಠದ ಸಂಪ್ರದಾಯದ ಬಗ್ಗೆ ಕವಿಗೋಷ್ಠಿ ಸೇರಿದಂತೆ ಧಾರ್ಮಿಕ, ಸಂಸ್ಕೃತಿ, ಸಾಹಿತ್ಯ, ಸಂಗೀತ, ಭರತನಾಟ್ಯ ವಿವಿಧ ಕಾರ್ಯಕ್ರಮಗಳು ಹಮ್ಮಿಕೊಳ್ಳಲಾಗುವುದು ಎಂದು ಹೇಳಿದರು.

ಜಿಲ್ಲೆಯಲ್ಲಿ ವಿವಿಧ ಕ್ಷೇತ್ರದಲ್ಲಿ ಸಾಧನೆಗೈದ ಮಹಿಳಾ ಸಾಧಕರಿಗೆ ಹಾಗೂ ಇನ್ನಿತರೆ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿರುವ ಸಾಧಕರನ್ನು ಸನ್ಮಾನಿಸುವುದು. ಮೇ 5ರಂದು ಬೆಳಿಗ್ಗೆ 11ಕ್ಕೆ ಇನ್ನೊಂದು ಬಾರಿ ಎರಡನೇ ಪೂರ್ವಭಾವಿ ಸಭೆ ಕರೆಯಲಾಗುವುದು ಎಂದು ಹೇಳಿದರು.

ಪಿಕಾರ್ಡ್‌ ಬ್ಯಾಂಕ್‌ ಅಧ್ಯಕ್ಷ ಈರಣ್ಣ ಪಟ್ಟಣಶೆಟ್ಟಿ ಮಾತನಾಡಿ, ಚನ್ನಬಸವ ಶ್ರೀಗಳು ದೇಶದ ಉದ್ದಗಲಕ್ಕೂ ಹಾಗೂ ನಾಡಿನಾದ್ಯಂತ ಪಾದಯಾತ್ರೆ ಮೂಲಕ ಜೋಳಿಗೆಯಲ್ಲಿ ಭಕ್ತರಿಂದ ಸಂಗ್ರಹಿಸಿದ ಹಣದಲ್ಲಿ ಈ ವಚನ ಶಿಲಾಮಟಂಪವನ್ನು ನಿರ್ಮಿಸಿದ್ದಾರೆ ಎಂದು ಹೇಳಿದರು.

ಚನ್ನಬಸವ ಶ್ರೀಗಳು ತಮ್ಮ 92ರ ಇಳಿವಯಸ್ಸಿನಲ್ಲಿಯೂ ಭಕ್ತರ ಮನೆಗಳಿಗೆ ತೆರಳುವುದು, ಪಾದಯಾತ್ರೆ ಮಾಡುವುದು ನಿಲ್ಲಿಸಿಲ್ಲ. ಇವತ್ತಿಗೂ ಮಠದ ಜೀರ್ಣೋದ್ಧಾರಕ್ಕಾಗಿ ಕಾಯಕ ಮಾಡುತ್ತಿದ್ದಾರೆ ಎಂದು ಹೇಳಿದರು.

ಮಸಬಿನಾಳದ ವಿರಕ್ತಮಠದ ಸಿದ್ಧªರಾಮ ಶ್ರೀಗಳು, ಇಂಗಳೇಶ್ವರ ಹಿರಿಯ ಶ್ರೀಗಳಾದ ಚನ್ನಬಸವ ಶ್ರೀಗಳು ಸಾನಿಧ್ಯ ವಹಿಸಿದ್ದರು. ಅಪ್ಪುಗೌಡ ಪಾಟೀಲ, ಮಹಾದೇವ ರೆಬಿನಾಳ, ಎಸ್‌.ಜಿ. ಲಕ್ಕುಂಡಿಮಠ, ಬಾಬುರಾವ ಮಹಾರಾಜ, ಗುರುಮೂರ್ತಿ, ಕೆ. ಸುನಂದಾ, ಪ್ರಭಾಕರ ಖೇಡದ, ಕಾಶೀನಾಥ ಅವಟಿ, ಎಸ್‌.ಎಸ್‌. ಬಿರಾದಾರ, ಎನ್‌.ಬಿ. ಬನ್ನೂರ, ಮಂಜೂಳಾ ಹಿಪ್ಪರಗಿ, ಅರವಿಂದ ಕುಲಕರ್ಣಿ ಮಾತನಾಡಿದರು. ಪೂರ್ವಭಾವಿ ಸಭೆಯಲ್ಲಿ ನೂರಾರು ಭಕ್ತರು ಭಾಗವಹಿಸಿದ್ದರು.