ಗರ್ಭಪಾತ ತೀರ್ಪು ಸೋರಿಕೆ: ಅಮೆರಿಕದಲ್ಲಿ ಭಾರೀ ಸಂಚಲನ

Team Udayavani, May 5, 2022, 8:10 AM IST

ವಾಷಿಂಗ್ಟನ್‌: ಅಮೆರಿಕದಾದ್ಯಂತ ಈಗ ಗರ್ಭಪಾತ ಕಾನೂನು ಸದ್ದು ಮಾಡಲಾ­ರಂಭಿಸಿದೆ. ಗರ್ಭಪಾತಕ್ಕೆ ನಿಷೇಧ ಹೇರಲು ಸುಪ್ರೀಂ ಕೋರ್ಟ್‌ ಚಿಂತನೆ ನಡೆಸಿದೆ ಎಂಬ ವರದಿ ದೇಶಾದ್ಯಂತ ಸಂಚಲನಕ್ಕೆ ಕಾರಣವಾಗಿದೆ.

ಹಿಂದಿನಿಂದಲೂ ಗರ್ಭಪಾತ ನಿಷೇ­ಧ­ವನ್ನು ಬೆಂಬಲಿಸುತ್ತಾ ಬಂದಿರುವ ರಿಪಬ್ಲಿಕನ್ನರು ಮತ್ತು ಗರ್ಭಪಾತ ಮಾಡಿಸಿಕೊಳ್ಳುವುದು ಮಹಿಳೆಯರ ಆಯ್ಕೆಗೆ ಬಿಟ್ಟಿದ್ದು ಎನ್ನುತ್ತಾ ಬಂದಿರುವ ಡೆಮಾಕ್ರಾಟ್‌ ನಾಯಕರ ನಡುವೆ ವಾಕ್‌ವಾರ್‌ ಶುರುವಾಗಿದ್ದು, ದೇಶಾ­ದ್ಯಂತ ಪರ-ವಿರೋಧ ಪ್ರತಿಭಟನೆಗಳೂ ಆರಂಭವಾಗಿವೆ. ಇದು ದೇಶವನ್ನು ಮತ್ತೆ ವಿಭಜನೆ ಮಾಡಲಿದೆಯೇ ಎಂಬ ಆತಂಕವೂ ಮೂಡಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅಧ್ಯಕ್ಷ ಜೋ ಬೈಡೆನ್‌, “ಮಹಿಳೆಯರಿಗೆ ನೀಡ­ಲಾದ ಆಯ್ಕೆಯ ಹಕ್ಕು ಮೂಲಭೂತ­ವಾದದ್ದು. ಅದನ್ನು ಕಿತ್ತುಕೊಳ್ಳಬಾರದು. ಇಂಥ ತೀರ್ಪು ಸಲಿಂಗ ವಿವಾಹ, ಮಕ್ಕಳನ್ನು ಹೇಗೆ ಬೆಳೆಸಬೇಕು ಸೇರಿ­ದಂತೆ ನಿಮ್ಮ ಖಾಸಗಿತನದ ಅಡಿ ಬರುವ ಎಲ್ಲ ನಿರ್ಧಾರಗಳನ್ನೂ ಮತ್ತೂಬ್ಬರು ನಿರ್ಣಯಿಸಿದಂತಾಗುತ್ತದೆ. ಇದು ಒಳ್ಳೆಯ ಬೆಳವಣಿಗೆಯಲ್ಲ’ ಎಂದಿದ್ದಾರೆ.

ಆಗಿದ್ದೇನು?: 2 ದಿನಗಳ ಹಿಂದೆ “ಪೊಲಿ­ಟಿಕೋ’ ಎಂಬ ಪತ್ರಿಕೆಯು ಅಮೆರಿಕದ ಸುಪ್ರೀಂ ಕೋರ್ಟ್‌ನ ಆದೇಶವೊಂದರ ಕರಡು ಪ್ರತಿಯನ್ನು ಸೋರಿಕೆ ಮಾಡಿತ್ತು. “ಗರ್ಭಪಾತ ಮಾಡಿಸಿಕೊಳ್ಳುವ ಸಂಪೂರ್ಣ ಅಧಿಕಾರ ಮಹಿಳೆಯ­ರಿಗಿದೆ’ ಎಂಬ ಕಳೆದ 4 ದಶಕಗಳಿಂದಲೂ ಚಾಲ್ತಿಯಲ್ಲಿರುವ ತೀರ್ಪಿಗೆ ಸಂಪೂರ್ಣ ವಿರುದ್ಧವಾದ ಅಂಶಗಳು ಈ ಕರಡು ಪ್ರತಿಯಲ್ಲಿತ್ತು. ಜೂನ್‌ ಅಥವಾ ಜುಲೈ­ನಲ್ಲಿ ಬರಬೇಕಿದ್ದ ತೀರ್ಪಿಗೆ ಸಂಬಂ­ಧಿಸಿದ ಕರಡು ಪ್ರತಿ ಇದಾಗಿದ್ದು, ದೇಶಾದ್ಯಂತ ಗರ್ಭಪಾತ ನಿಷೇಧಿಸಲು ಕೋರ್ಟ್‌ ಉತ್ಸುಕವಾಗಿರುವುದು ಅದರಿಂದ ದೃಢಪಟ್ಟಿದೆ ಎಂದು ಪೊಲಿಟಿಕೋ ವರದಿ ಹೇಳಿತ್ತು.