ಬೀಜಿಂಗ್‌ನಲ್ಲಿ ಭಾಗಶಃ ಲಾಕ್‌ಡೌನ್‌; ಚೀನಕ್ಕೆ ಮತ್ತೆ ಕೊರೊನಾ ಕಾಟ

Team Udayavani, May 5, 2022, 7:05 AM IST

ಬೀಜಿಂಗ್‌: ಶಾಂಘೈ ಬಳಿಕ ಈಗ ಬೀಜಿಂಗ್‌ನಲ್ಲೂ ಕೊರೊನಾ ಹೆಚ್ಚುತ್ತಿದ್ದು, ಸೆಮಿ ಲಾಕ್‌ಡೌನ್‌ ಘೋಷಿಸಲಾಗಿದೆ. ಬುಧವಾರ ಹೊಸದಾಗಿ 50 ಪ್ರಕರಣಗಳು ಕಾಣಿಸಿಕೊಂಡಿದ್ದು, ಒಟ್ಟಾರೆ 500 ಸಕ್ರಿಯ ಪ್ರಕರಣಗಳಿವೆ. ಹೀಗಾಗಿ 60 ಸಬ್‌ವೇ ಸ್ಟೇಷನ್‌, ಶಾಲೆ-ಕಾಲೇಜುಗಳು, ಸಾರಿಗೆ ಸಂಚಾರವನ್ನು ಸ್ಥಗಿತ ಮಾಡಲಾಗಿದೆ.

ಒಂದು ತಿಂಗಳಿನಿಂದ ಚೀನದ ವಾಣಿಜ್ಯ ರಾಜಧಾನಿ ಶಾಂಘೈಯಲ್ಲಿ ಬಿಗಿ ಲಾಕ್‌ಡೌನ್‌ ಜಾರಿಯಲ್ಲಿದೆ. ಈಗ ರಾಜಧಾನಿ ಬೀಜಿಂಗ್‌ನಲ್ಲೂ ಕೊರೊನಾ ಹೆಚ್ಚಳವಾಗಿದ್ದು, ನಾಗರಿಕರಲ್ಲಿ ಭೀತಿ ಹುಟ್ಟಿಸುತ್ತದೆ.

ಎಲ್ಲವೂ ಅಂದುಕೊಂಡಂತಾಗಿದ್ದರೆ ಈ ವಾರವೇ ಎಲ್ಲ ಶಿಕ್ಷಣ ಸಂಸ್ಥೆಗಳು ತೆರೆಯಬೇಕಾಗಿದ್ದವು. ಈಗ ಅದನ್ನು ಮೇ 11ರ ವರೆಗೆ ಮುಂದೂಡಲಾಗಿದೆ. ರೈಲು, ಸಾರ್ವಜನಿಕ ಸಾರಿಗೆಯನ್ನೂ ಭಾಗಶಃ ಸ್ಥಗಿತ ಮಾಡಲಾಗಿದೆ. ಸದ್ಯ ಸಂಚಾರ ನಡೆಸುತ್ತಿರುವೆಡೆ ಕೊರೊನಾ ನೆಗೆಟಿವ್‌ ಪ್ರಮಾಣಪತ್ರ ಮತ್ತು ಲಸಿಕೆ ಪಡೆದ ದಾಖಲೆ ತೋರಿಸಬೇಕಾಗಿದೆ.
ಬೀಜಿಂಗ್‌ನ 158 ಬಸ್‌ ಮಾರ್ಗಗಳಲ್ಲಿ 60 ಸಬ್‌ವೇ ಸ್ಟೇಷನ್‌ಗಳನ್ನು ಮುಚ್ಚಲಾಗಿದೆ. ಇವೆಲ್ಲವೂ ಛಾಯಾಂಗ್‌ ಜಿಲ್ಲೆಯಲ್ಲೇ ಇದ್ದು, ಇಲ್ಲಿ ಪ್ರಮುಖ ನಾಯಕರು ಮತ್ತು ಅಧಿಕಾರಿಗಳ ನಿವಾಸಗಳಿವೆ.

ಬೀಜಿಂಗ್‌ಗೆ ಬರುವ ಅಂತಾರಾಷ್ಟ್ರೀಯ ಪ್ರಯಾಣಿಕರು 10 ದಿನಗಳ ಕಾಲ ಬಿಗಿ ಕ್ವಾರಂಟೈನ್‌ನಲ್ಲಿ ಇರಬೇಕಾಗಿದೆ.
ಅತ್ತ ಶಾಂಘೈನಲ್ಲಿ ಕೊರೊನಾ ಪ್ರಕರಣ ಇಳಿಕೆಯಾಗುತ್ತಿದೆ. ಆದರೂ ಇಲ್ಲಿ ಜಾರಿಯಲ್ಲಿರುವ ಲಾಕ್‌ಡೌನ್‌ ತೆರವು ಬಗ್ಗೆ ಯಾವುದೇ ಮಾಹಿತಿ ಇಲ್ಲ ಎಂದು ಸ್ಥಳೀಯಾಡಳಿತ ಹೇಳಿದೆ.