ಸುಳ್ಯ: ಸರಣಿ ಅಪಘಾತ; ಕಾರುಗಳು ಜಖಂ

Team Udayavani, May 30, 2022, 1:19 AM IST

ಸುಳ್ಯ: ಮೂರು ಕಾರುಗಳ ನಡುವೆ ಸರಣಿ ಅಪಘಾತ ಸಂಭವಿಸಿ ಮೂವರು ಪ್ರಯಾಣಿಕರು ಸಣ್ಣಪುಟ್ಟ ಗಾಯಗಳೊಂದಿಗೆ ಪಾರಾಗಿ ಕಾರುಗಳು ಜಖಂಗೊಂಡಿರುವ ಘಟನೆ ಮಾಣಿ-ಮೈಸೂರು ಹೆದ್ದಾರಿಯ ಸುಳ್ಯ ಸಮೀಪದ ಅರಂಬೂರು ಗ್ರಾಮದ ಸರಳಿಕುಂಜದಲ್ಲಿ ಮೇ 29ರಂದು ಬೆಳಗ್ಗೆ ಸಂಭವಿಸಿದೆ.

ಮಡಿಕೇರಿ ಮೂಲದ ನಾಗರಾಜ್‌ ಅವರು ಸುಬ್ರಹ್ಮಣ್ಯ ಕ್ಷೇತ್ರಕ್ಕೆ ತೆರಳಿ ಮಡಿಕೇರಿಗೆ ಕಾರಿನಲ್ಲಿ ಹೋಗುತ್ತಿದ್ದ ವೇಳೆ ಸರಳಿಕುಂಜದಲ್ಲಿ ಎದುರಿನಿಂದ ಬಂದ ಕೇರಳ ನೋಂದಣಿ ಕಾರು ಬಂದು ಢಿಕ್ಕಿಯಾಗಿದೆ. ಈ ವೇಳೆ ನಾಗರಾಜ್‌ ಅವರ ಕಾರಿನ ಹಿಂದೆ ಇದ್ದ ಕಾರಿಗೂ ಢಿಕ್ಕಿಯಾಗಿದೆ. ಘಟನೆಯಲ್ಲಿ ಚಾಲಕ ನಾಗರಾಜ್‌, ಪ್ರಯಾಣಿಕ ಮಹೇಶ್ವರಪ್ಪ, ಇನ್ನೊಂದು ಕಾರಿನ ರವಿ ಅವರಿಗೆ ಗಾಯವಾಗಿದೆ.

ಕೇರಳ ನೋಂದಣಿಯ ಕಾರು ಚಾಲಕ ಹಸ್ರುದ್ದೀನ್‌ ನಿರ್ಲಕ್ಷ್ಯ ಹಾಗೂ ಅಜಾಗರೂಕತೆಯಿಂದ ಚಲಾಯಿಸಿ ಅಪಘಾತ ಎಸಗಿದ್ದಾನೆಂದು ಸುಳ್ಯ ಠಾಣೆಗೆ ನೀಡಿದ ದೂರಿನಲ್ಲಿ ತಿಳಿಸಲಾಗಿದೆ. ಸುಳ್ಯ ಪೊಲೀಸರು ಘಟನ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.