ಟಿ20 ಸರಣಿ: ದಕ್ಷಿಣ ಆಫ್ರಿಕಾ ತಂಡ ನಾಳೆ ದಿಲ್ಲಿಗೆ ಆಗಮನ

Team Udayavani, Jun 1, 2022, 6:30 AM IST

ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾ ವಿರುದ್ಧದ ಐದು ಪಂದ್ಯಗಳ ಟಿ20 ಸರಣಿಗಾಗಿ ಭಾರತೀಯ ಕ್ರಿಕೆಟ್‌ ತಂಡದ ಸದಸ್ಯರು ಜೂನ್‌ 5ರಂದು ದಿಲ್ಲಿಯಲ್ಲಿ ಸೇರಲಿದ್ದಾರೆ.

ಸರಣಿಯ ಮೊದಲ ಪಂದ್ಯ ಜೂನ್‌ 9ರಂದು ದಿಲ್ಲಿಯಲ್ಲಿ ನಡೆಯಲಿದೆ. ದಕ್ಷಿಣ ಆಫ್ರಿಕಾ ತಂಡವು ಜೂನ್‌ 2ರಂದು ದಿಲ್ಲಿಗೆ ಆಗಮಿಸಲಿದೆ.

ಸರಣಿಯ ಇನ್ನುಳಿದ ಪಂದ್ಯಗಳು ಅನುಕ್ರಮವಾಗಿ ಕಟಕ್‌ (ಜೂ. 12), ವಿಶಾಖಪಟ್ಟಣ (ಜೂ. 14), ರಾಜ್‌ಕೋಟ್‌ (ಜೂ. 17) ಮತ್ತು ಬೆಂಗಳೂರಿನಲ್ಲಿ ಜೂ. 19ಂದು ನಡೆಯಲಿದೆ. ಆಸ್ಟ್ರೇಲಿಯ ಆತಿಥ್ಯದಲ್ಲಿ ನಡೆಯುವ 2022ರ ಟಿ20 ವಿಶ್ವಕಪ್‌ ಹಿನ್ನೆಲೆಯಲ್ಲಿ ಇದೊಂದು ಮಹತ್ವದ ಸರಣಿಯಾ ಗಿದೆ ಎಂದು ಡಿಡಿಸಿಎ ಜಂಟಿ ಕಾರ್ಯದರ್ಶಿ ರಾಜನ್‌ ಮಂಚಂಡ ಹೇಳಿದ್ದಾರೆ.

ಈ ಸರಣಿ ವೇಳೆ ಪಂದ್ಯ ವೀಕ್ಷಿಸಲು ಪ್ರೇಕ್ಷಕರ ಸಂಖ್ಯೆಯಲ್ಲಿ ಯಾವುದೇ ನಿರ್ಬಂಧ ಇರುವುದಿಲ್ಲ ಮತ್ತು ಸರಣಿ ಬಯೋಬಬಲ್‌ ಮುಕ್ತ ವಾತಾವರಣದಲ್ಲಿ ನಡೆಯ ಲಿದೆ. ಆದರೆ ಆಟಗಾರರನ್ನು ಕೋವಿಡ್‌ಗಾಗಿ ಆಗಾಗ್ಗೆ ಪರೀಕ್ಷೆ ನಡೆಸಲಾಗುತ್ತದೆ.

2 ತಿಂಗಳ ಸುದೀರ್ಘ‌ ಅವಧಿಯ ವರೆಗೆ ಐಪಿಎಲ್‌ ನಡೆದ ಕಾರಣ ಪ್ರಮುಖ ಆಟಗಾರರು ವಿಶ್ರಾಂತಿ ಪಡೆಯಲಿದ್ದಾರೆ.

ಇದರಿಂದಾಗಿ ಭಾರತೀಯ ತಂಡವನ್ನು ಕೆ.ಎಲ್‌. ರಾಹುಲ್‌ ಮುನ್ನಡೆಸಲಿದ್ದಾರೆ. ಕೊಹ್ಲಿ, ಜಸ್‌ಪ್ರೀತ್‌ ಬುಮ್ರಾ ಜತೆ ನಾಯಕ ರೋಹಿತ್‌ ಶರ್ಮ ಅವರಿಗೆ ವಿಶ್ರಾಂತಿ ನೀಡಲಾಗಿದೆ.