ಸೌದಿಯಲ್ಲಿ ಅವಳಿ ಗಗನಚುಂಬಿ ಕಟ್ಟಡ! ಅರೇಬಿಯಾದ ಜೆಡ್ಡಾದಲ್ಲಿ ನಿರ್ಮಿಸಲಾಗುವ ದೈತ್ಯ ಕಟ್ಟಡಗಳು

Team Udayavani, Jun 2, 2022, 7:05 AM IST

ಕತಾರ್‌: ದುಬೈನಲ್ಲಿರುವ ಬುರ್ಜ್‌ ಖಲೀಫಾ ಸೇರಿದಂತೆ ಜಗತ್ತಿನಲ್ಲಿ ಅತಿ ಎತ್ತರದ ಹಲವಾರು ಕಟ್ಟಡಗಳನ್ನು ಹೊಂದಿರುವ ಹೆಗ್ಗಳಿಕೆ ಹೊಂದಿರುವ ಮಧ್ಯಪ್ರಾಚ್ಯ ರಾಷ್ಟ್ರಗಳಲ್ಲಿ ಕೆಲವೇ ವರ್ಷಗಳಲ್ಲಿ ವಿಶ್ವದ ಅತಿ ವಿಶಾಲವಾದ ಅವಳಿ ಗಗನಚುಂಬಿ ಕಟ್ಟಡಗಳು ತಲೆಯೆತ್ತಲಿವೆ.

ಸೌದಿ ಅರೇಬಿಯಾದ ಜೆಡ್ಡಾದಲ್ಲಿ ಜನವಸತಿಯಿಲ್ಲದ ಜಾಗದಲ್ಲಿ ಅಂದಾಜು 38 ಲಕ್ಷ ಕೋಟಿ ರೂ.ಗಳ ವೆಚ್ಚದಲ್ಲಿ ಇವನ್ನು ನಿರ್ಮಿಸಲು ನಿರ್ಧರಿಸಲಾಗಿದ್ದು, ಸೌದಿ ಅರೇಬಿಯಾ ರಾಜಕುಮಾರ ಮೊಹಮ್ಮದ್‌ ಅವರ ಕನಸಿನ ಕೂಸಾದ “ನೆಯಾಮ್‌’ ಎಂಬ ಅಭಿವೃದ್ಧಿ ಯೋಜನೆಯಡಿ ಈ ಕಾಮಗಾರಿ ಜಾರಿಗೊಳ್ಳಲಿದೆ.

ಹೇಗಿರಲಿವೆ ಅವಳಿ ಕಟ್ಟಡ?
ಪ್ರತಿ ಕಟ್ಟಡ, 1,640 ಅಡಿ ಎತ್ತರದಲ್ಲಿರಲಿದ್ದು, ಹಲವು ಕಿಲೋಮೀಟರ್‌ಗಳವರೆಗೆ ವಿಸ್ತಾರವಾಗಿರಲಿವೆ ಎಂದು ಪ್ರಾಥಮಿಕ ಮಾಹಿತಿಗಳು ತಿಳಿಸಿವೆ. ಈ ಬೃಹತ್‌ ಕಟ್ಟಡಗಳಲ್ಲಿ ವಸತಿ ಸಮುತ್ಛಯ, ವಾಣಿಜ್ಯ ಸಂಕೀರ್ಣ, ಕಚೇರಿಗಳು ಇವೆಲ್ಲವೂ ಅಡಕವಾಗಿರಲಿವೆ. ಇವು, ಕೆಂಪು ಸಮುದ್ರಕ್ಕೆ ಹೊಂದಿಕೊಂಡಿರುವ ಜೆಡ್ಡಾದ ಬೀಚ್‌ನಿಂದ ಕೆಲವು 800 ಮೀಟರ್‌ (ಸುಮಾರು ಮುಕ್ಕಾಲು ಕಿ.ಮೀ.) ವಿಸ್ತೀರ್ಣದಲ್ಲಿ ನಿರ್ಮಾಣಗೊಳ್ಳಲಿವೆ.

ಡಿಸೈನರ್‌ಗಳಿಗೆ ಸೂಚನೆ
ಈ ಕಟ್ಟಡಗಳ ವಿನ್ಯಾಸ ಹಾಗೂ ನಿರ್ಮಾಣದ ಹೊಣೆಯನ್ನು ಕ್ಯಾಲಿಫೋರ್ನಿಯಾದ ವಾಸ್ತುಶಿಲ್ಪ ಕಂಪನಿಯಾದ ಮೋಫೋìಸಿಸ್‌ಗೆ ವಹಿಸಲಾಗಿದೆ. ಅಲ್ಲಿನ ಕೆಲಸಗಾರರಿಗೆ, ಹೊಸದಾಗಿ ನಿರ್ಮಾಣಗೊಳ್ಳಲಿರುವ ಒಂದೊಂದು ಕಟ್ಟಡದ ವಿಸ್ತೀರ್ಣವು ಕನಿಷ್ಟ ಅರ್ಧ ಮೈಲು ಇರಬೇಕೆಂದು ಸೂಚಿಸಲಾಗಿದೆ. ಈ ವಿಸ್ತೀರ್ಣದಲ್ಲಾಗಲೀ, ಎತ್ತರದಲ್ಲಾಗಲೀ ಈ ಕಟ್ಟಡಗಳು ಜಗತ್ತಿನಲ್ಲಿ ಪ್ರಸ್ತುತ ಅತಿ ದೊಡ್ಡ ಕಟ್ಟಡಗಳೆಂಬ ಖ್ಯಾತಿ ಗಳಿಸಿರುವ ಎಲ್ಲಾ ಕಟ್ಟಡಗಳನ್ನೂ ಮೀರಿಸುವಂತಿರಬೇಕು ಎಂಬ ಷರತ್ತನ್ನೂ ವಿಧಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.