ರಣಜಿ: ಬಂಗಾಲ ಸೆಮಿಫೈನಲ್‌ ಪ್ರವೇಶ: ಕ್ರೀಡಾ ಸಚಿವ ತಿವಾರಿ ಸೆಂಚುರಿ

Team Udayavani, Jun 10, 2022, 11:27 PM IST

ಬೆಂಗಳೂರು: ಕ್ರಿಕೆಟಿಗರು ನಿವೃತ್ತರಾದ ಬಳಿಕ ರಾಜಕೀಯ ಪ್ರವೇಶಿಸಿ ವಿಧಾನಸಭೆ, ಲೋಕಸಭೆ, ಮೇಲ್ಮನೆ ಪ್ರವೇಶಿಸುವುದು ಭಾರತದಲ್ಲಿ ಹೊಸತೇನಲ್ಲ. ಆದರೆ ವಿಧಾನಸಭೆ ಪ್ರವೇಶಿಸಿದ ಶಾಸಕರೊಬ್ಬರು ರಾಜ್ಯದ ಕ್ರೀಡಾ ಸಚಿವರಾಗಿ, ರಣಜಿ ಪಂದ್ಯದಲ್ಲಿ ಶತಕ ಬಾರಿಸುವುದು ಮಾತ್ರ ವಿಶೇಷ ವಿದ್ಯಮಾನವೇ ಸೈ. ಈ ಹೆಗ್ಗಳಿಕೆಗೆ ಪಾತ್ರರಾದವರು ಪಶ್ಚಿಮ ಬಂಗಾಲದ ಕ್ರೀಡಾ ಸಚಿವರಾಗಿರುವ, ಭಾರತದ ಮಾಜಿ ಬ್ಯಾಟರ್‌ ಮನೋಜ್‌ ತಿವಾರಿ!

ಜಾರ್ಖಂಡ್‌ ಎದುರಿನ ರಣಜಿ ಟ್ರೋಫಿ ಕ್ವಾರ್ಟರ್‌ ಫೈನಲ್‌ ಪಂದ್ಯದ ಅಂತಿಮ ದಿನವಾದ ಶುಕ್ರವಾರ ಮನೋಜ್‌ ತಿವಾರಿ 5ನೇ ಕ್ರಮಾಂಕ ದಲ್ಲಿ ಆಡಲಿಳಿದು 136 ರನ್‌ ಬಾರಿಸಿದರು. ಮಮತಾ ಬ್ಯಾನರ್ಜಿ ಸರಕಾರದಲ್ಲಿ ಕ್ರೀಡಾ ಸಚಿವರಾಗಿ ಕರ್ತವ್ಯ ನಿಭಾಯಿಸುತ್ತಿರುವ 36 ವರ್ಷದ ತಿವಾರಿ, 185 ಎಸೆತಗಳಿಂದ ಈ ಅಮೋಘ ಇನ್ನಿಂಗ್ಸ್‌ ಕಟ್ಟಿದರು. ಸಿಡಿಸಿದ್ದು 19 ಫೋರ್‌ ಹಾಗೂ 2 ಸಿಕ್ಸರ್‌. ಅಂತಿಮವಾಗಿ ರನೌಟ್‌ ಆಗಿ ನಿರ್ಗಮಿ ಸಿದರು. ಬಂಗಾಲದ ಮೊದಲ ಇನ್ನಿಂಗ್ಸ್‌ ನಲ್ಲಿ ತಿವಾರಿ 73 ರನ್‌ ಬಾರಿಸಿದ್ದರು.

ಈ ಪಂದ್ಯ ಡ್ರಾದಲ್ಲಿ ಮುಕ್ತಾಯ ಗೊಂಡಿತು. 4 ಕ್ವಾರ್ಟರ್‌ ಫೈನಲ್‌ ಪಂದ್ಯಗಳಲ್ಲಿ ಸ್ಪಷ್ಟ ಫ‌ಲಿತಾಂಶ ಕಾಣದ ಪಂದ್ಯ ಇದೊಂದೇ. 5 ದಿನಗಳ ಆಟದಲ್ಲಿ ಉರುಳಿದ್ದು 24 ವಿಕೆಟ್‌ ಮಾತ್ರ. ಆದರೆ 475 ರನ್ನುಗಳ ಮೊದಲ ಇನ್ನಿಂಗ್ಸ್‌ ಲೀಡ್‌ ಪಡೆದ ಬಂಗಾಲ ಸೆಮಿಫೈನಲ್‌ ಪ್ರವೇಶಿಸಿತು.

ಬಂಗಾಲ ಮೊದಲ ಇನ್ನಿಂಗ್ಸ್‌ನಲಿ,É 7 ವಿಕೆಟಿಗೆ 773 ರನ್‌ ಪೇರಿಸಿತ್ತು. 250 ವರ್ಷಗಳ ಇತಿಹಾಸವುಳ್ಳ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ 9ನೇ ಕ್ರಮಾಂಕದ ವರೆಗಿನ ಬ್ಯಾಟರ್‌ಗಳೆಲ್ಲರೂ ಮೊದಲ ಸಲ 50 ಪ್ಲಸ್‌ ರನ್‌ ಬಾರಿಸಿದ ಅಪೂರ್ವ ದಾಖಲೆಯೊಂದನ್ನು ಬಂಗಾಲ ನಿರ್ಮಿಸಿತ್ತು.

2021ರಲ್ಲಿ ವಿಧಾನಸಭೆಗೆ
2021ರ ವಿಧಾನಸಭಾ ಚುನಾವಣೆ ಯಲ್ಲಿ ಶಿಬ್‌ಪುರ್‌ ಕ್ಷೇತ್ರದಿಂದ ಟಿಎಂಸಿ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ ಮನೋಜ್‌ ತಿವಾರಿ, ಬಿಜೆಪಿಯ ರತ್ನಿನ್‌ ಚಕ್ರವರ್ತಿ ವಿರುದ್ಧ ಗೆಲುವು ಸಾಧಿಸಿದ್ದರು. ರಾಜ್ಯದ ಕ್ರೀಡಾ ಸಚಿವರಾಗಿ ನೇಮಕಗೊಂಡರು.

ಮನೋಜ್‌ ತಿವಾರಿ ಕ್ರೀಡಾ ಸಚಿವರಾದ ಬಳಿಕ ಬಾರಿಸಿದ ಮೊದಲ ಸೆಂಚುರಿ ಇದಾಗಿದೆ. ಪ್ರಥಮ ದರ್ಜೆ ಕ್ರಿಕೆಟಿನ 28ನೇ ಶತಕ. ಇವರ ಕೊನೆಯ ಶತಕ 2019-20ರ ರಣಜಿ ಸೀಸನ್‌ನಲ್ಲಿ ಹೈದರಾಬಾದ್‌ ವಿರುದ್ಧ ದಾಖಲಾಗಿತ್ತು. ಅಂದು ಅಜೇಯ 303 ರನ್‌ ಹೊಡೆದಿದ್ದರು.

ತಿವಾರಿ ಭಾರತದ ಪರ 12 ಏಕದಿನ ಹಾಗೂ 3 ಟಿ20 ಪಂದ್ಯಗಳಲ್ಲೂ ಕಾಣಿಸಿಕೊಂಡಿದ್ದಾರೆ. 98 ಐಪಿಎಲ್‌ ಪಂದ್ಯಗಳಲ್ಲಿ ಆಡಿದ್ದಾರೆ. 2015ರಲ್ಲಿ ಜಿಂಬಾಬ್ವೆ ವಿರುದ್ಧ ಹರಾರೆಯಲ್ಲಿ ಕೊನೆಯ ಏಕದಿನ ಅಂತಾರಾಷ್ಟ್ರೀಯ ಪಂದ್ಯವಾಡಿದ್ದರು.

ಸಂಕ್ಷಿಪ್ತ ಸ್ಕೋರ್‌: ಬಂಗಾಲ-7 ವಿಕೆಟಿಗೆ 773 ಡಿಕ್ಲೇರ್‌ ಮತ್ತು 7 ವಿಕೆಟಿಗೆ 318 (ಮನೋಜ್‌ ತಿವಾರಿ 136, ಶಾಬಾಜ್‌ ಅಹ್ಮದ್‌ 46, ಶಾಬಾಜ್‌ ನದೀಂ 59ಕ್ಕೆ 5). ಜಾರ್ಖಂಡ್‌-298.