ಮಂಗಳೂರು ವಿಮಾನ ನಿಲ್ದಾಣ ಪ್ರಯಾಣಿಕರು, ವಿಮಾನ ಸಂಖ್ಯೆಯಲ್ಲಿ ಹೆಚ್ಚಳ

Team Udayavani, Jun 11, 2022, 6:20 AM IST

ಮಂಗಳೂರು: ಕಳೆದ ನಾಲ್ಕು ತಿಂಗಳಿನಿಂದ ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರು, ವಿಮಾನಗಳ ಸಂಖ್ಯೆ ನಿರಂತರ ಹೆಚ್ಚುತ್ತಿದೆ, ಮೇ ತಿಂಗಳಲ್ಲಿ ಕಳೆದ ಆರು ತಿಂಗಳಲ್ಲೇ ಅತ್ಯಧಿಕ ಅಂತಾರಾಷ್ಟ್ರೀಯ ವಿಮಾನಗಳನ್ನು ನಿರ್ವಹಿಸಲಾಗಿದೆ.

ಕಳೆದ 2 ವರ್ಷಗಳಲ್ಲಿ ಕೋವಿಡ್‌ ಕಾರಣದಿಂದ ವಿಮಾನ ಹಾರಾಟದಲ್ಲಿ ಏರಿಳಿತವಾಗುತ್ತಿತ್ತು. ವಿಮಾನ ಹಾರಾಟ ಬಹುತೇಕ ಇಳಿಮುಖವಾಗಿತ್ತು. ಕೋವಿಡ್‌ನಿಂದ ಚೇತರಿಕೆಯ ಬಳಿಕ ಈಗ ವಿಮಾನ ನಿಲ್ದಾಣದ ನಿರ್ವಹಣೆ ಹೆಚ್ಚುತ್ತಿದೆ.

ಇನ್ನು ಒಟ್ಟು ವಿಮಾನ ಸೇವೆಗಳನ್ನು ತೆಗೆದುಕೊಂಡರೆ ಕಳೆದ ಮೇ ತಿಂಗಳಲ್ಲಿ ಒಟ್ಟು 1,313 ವಿಮಾನಗಳನ್ನು ನಿರ್ವಹಿಸಲಾಗಿದೆ. ಇದರಲ್ಲಿ 926 ದೇಶೀಯ ಹಾಗೂ 365 ಅಂತಾರಾಷ್ಟ್ರೀಯ ಸೇರಿದೆ. ಕಳೆದ 2021ರ ಅಕ್ಟೋಬರ್‌ನಿಂದ ನೋಡಿದರೆ ಇದು ಇದುವರೆಗಿನ ಅತ್ಯಧಿಕ ವಿಮಾನ ಹಾರಾಟವಾಗಿರುತ್ತದೆ.

ಕಳೆದ ಅಕ್ಟೋಬರ್‌ನಿಂದ ಕ್ರಮವಾಗಿ 1,19,838, 1,16,423 (ನವೆಂಬರ್‌), 1,38,369 (ಡಿಸೆಂಬರ್‌), 92012 (ಜನವರಿ), 1,03,004 (ಫೆಬ್ರವರಿ) ಹಾಗೂ ಮಾರ್ಚ್‌ನಲ್ಲಿ 1,36,822 ಮಂದಿ ಪ್ರಯಾಣಿಕರು (ದೇಶೀಯ, ಅಂತಾರಾಷ್ಟ್ರೀಯ ಸೇರಿ) ಆಗಮಿಸಿದ್ದಾರೆ. ಎಪ್ರಿಲ್‌ನಲ್ಲಿ ಸಂಖ್ಯೆ 1,46,080ಕ್ಕೆ ಏರಿದೆ, ಮೇ ತಿಂಗಳಲ್ಲಿ ಇದು ಮತ್ತಷ್ಟು ಏರಿಕೆ ಕಂಡು 1,67,180ಕ್ಕೆ ತಲಪಿತು. ಎಪ್ರಿಲ್‌ನಲ್ಲಿ 794 ದೇಶೀಯ ಹಾಗೂ 332 ಅಂತಾರಾಷ್ಟ್ರೀಯ ಮತ್ತು 21 ಜನರಲ್‌ ಸೇರಿದಂತೆ 1,147 ವಿಮಾನಗಳನ್ನು ನಿರ್ವಹಣೆ ಮಾಡಲಾಗಿದೆ.