ಪಾಕ್‌ನಲ್ಲಿ ಹಿಂದೂ ಯುವತಿಯರ ಮೇಲೆ ಅತ್ಯಾಚಾರ

Team Udayavani, Jun 17, 2022, 6:52 AM IST

ಇಸ್ಲಾಮಾಬಾದ್‌: ಭಾರತದಲ್ಲಿ ಅಲ್ಪಸಂಖ್ಯಾತರ ಮೇಲೆ ಹಲ್ಲೆಯಾಗುತ್ತಿದೆ ಎಂದು ಹುಯಿಲೆಸುವ ಪಾಕಿಸ್ತಾನಕ್ಕೆ ತನ್ನ ನೆಲದಲ್ಲಿ ಆಗುತ್ತಿರುವ ಕಿಡಿಗೇಡಿತನದ ಕೃತ್ಯಗಳು ಕಾಣುತ್ತಿಲ್ಲ. ಆ ದೇಶದಲ್ಲಿ ಅಲ್ಪಸಂಖ್ಯಾತರಾಗಿರುವ ಹಿಂದೂ ಯುವತಿಯರ ಮೇಲಿನ ಅತ್ಯಾಚಾರ ಹೆಚ್ಚಾಗಿದೆ. ಹೊಸ ಪ್ರಕರಣದಲ್ಲಿ ಪಾಕಿಸ್ತಾನದ ಪಂಜಾಬ್‌ ಪ್ರಾಂತ್ಯದಲ್ಲಿ 16 ಹಾಗೂ 17 ವರ್ಷದ ಇಬ್ಬರು ಹಿಂದೂ ಸಹೋದರಿಯರ ಮೇಲೆ ಗನ್‌ ಪಾಯಿಂಟ್‌ನಲ್ಲಿ ಅತ್ಯಾಚಾರ ಎಸಗಲಾಗಿದೆ.

ಫೋರ್ಟ್‌ ಅಬ್ಬಾಸ್ ನಗರದ ಬಹಾವಲ್‌ ನಗರ್‌ನಲ್ಲಿ ವಾಸವಾಗಿದ್ದ ಈ ಸಹೋದರಿಯರು ಜೂ. 5ರಂದು ಮನೆಯಿಂದ ಬಹಿರ್ದೆಸೆಗಾಗಿ ತೆರಳಿದ್ದರು. ಈ ಸಂದರ್ಭದಲ್ಲಿ ಉಮೈರ್‌ ಅಶ್ಫಾಕ್‌ ಹಾಗೂ ಕಾಶಿಫ್ ಅಲಿ ಎಂಬುವರು ಯುವತಿಯರಿಗೆ ಪಿಸ್ತೂಲು ತೋರಿಸಿ ಹೀನ ಕೃತ್ಯವೆಸಗಿ ಪರಾರಿಯಾಗಿದ್ದಾರೆ.

ಪ್ರಕರಣದಲ್ಲಿ ಸ್ಥಳೀಯ ಪ್ರಭಾವಿ ವ್ಯಕ್ತಿಗಳ ಹಸ್ತಕ್ಷೇಪ ಇದ್ದಿದ್ದರಿಂದ ಪೊಲೀಸರು ಪ್ರಕರಣ ದಾಖಲಿಸಿಕೊಳ್ಳಲು ವಿಳಂಬ ಮಾಡಿದ್ದಾರೆ. ಜತೆಗೆ ಮಾತುಕತೆ ಮೂಲಕ ಪ್ರಕರಣ ಇತ್ಯರ್ಥಗೊಳಿಸುವಂತೆ ಯುವತಿಯರ ಕುಟುಂಬದ ಮೇಲೆ ಒತ್ತಡ ಹೇರಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.