‘ಓ ಮೈ ಲವ್’ ನಲ್ಲಿ ಕ್ಯೂಟ್ ಲವ್ ಸ್ಟೋರಿ: ಶಶಿಕುಮಾರ್ ಪುತ್ರನ ಹೊಸ ಕನಸಿದು

Team Udayavani, Jun 27, 2022, 4:09 PM IST

ಶಶಿಕುಮಾರ್‌ ಪುತ್ರ ಅಕ್ಷಿತ್‌ ನಾಯಕರಾಗಿರುವ “ಓ ಮೈ ಲವ್‌’ ಚಿತ್ರದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ಟ್ರೇಲರ್‌ ನೋಡಿದವರಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಆ್ಯಕ್ಷನ್‌, ಲವ್‌, ಸೆಂಟಿಮೆಂಟ್‌… ಎಲ್ಲಾ ಅಂಶಗಳನ್ನು ಹೊಂದಿರುವುದು “ಓ ಮೈ ಲವ್‌’ ಟ್ರೇಲರ್‌ ನಲ್ಲಿ ಕಾಣುತ್ತದೆ. ಈ ಚಿತ್ರದಲ್ಲಿ ನಟ ಎಸ್‌.ನಾರಾಯಣ್‌ ಕೂಡಾ ನಟಿಸಿದ್ದಾರೆ.

ಚಿತ್ರದ ಬಗ್ಗೆ ಮಾತನಾಡುವ ಅವರು, “ಪ್ರೀತಿ ಕುರಿತಾದ ಚಿತ್ರಗಳು ಸೋಲುವುದು ಕಡಿಮೆ. ಜನ ಇಂತಹ ಚಿತ್ರಗಳನ್ನು ಇಷ್ಟಪಡುತ್ತಾರೆ. “ಚೈತ್ರದ ಪ್ರೇಮಾಂಜಲಿ’, “ಚೆಲುವಿನ ಚಿತ್ತಾರ’, “ಮುಂಗಾರು ಮಳೆ’ ಇನ್ನು ಮುಂತಾದವು ಕಣ್ಣ ಮುಂದೆ ಬರುತ್ತದೆ. “ಓ ಮೈ ಲವ್‌’ ಚಿತ್ರದಲ್ಲಿ ಗೆಲುವಿಗೆ ಬೇಕಾದ ಕಥೆಯನ್ನು ನಿರ್ದೇಶಕರು ಆರಿಸಿ ಕೊಂಡಿದ್ದಾರೆ. ಗೊಂದಲ ಇಲ್ಲದಂತೆ ದೃಶ್ಯಗಳನ್ನು ಪೋಣಿಸಿದ್ದಾರೆ. ಚಿತ್ರ ಖಂಡಿತಾ ಗೆಲ್ಲುತ್ತದೆ’ ಎನ್ನುತ್ತಾ ಚಿತ್ರಕ್ಕೆ ಶುಭ ಹಾರೈಸಿದರು.

ಇದನ್ನೂ ಓದಿ:30 ನಿಮಿಷದಲ್ಲಿ 3.5 ಕೆ.ಜಿ.ರಾಗಿ ಮುದ್ದೆ ತಿಂದ ಶಿವಲಿಂಗುಗೆ ಬಹುಮಾನ

ಸ್ಮೈಲ್‌ ಶ್ರೀನು ಈ ಚಿತ್ರದ ನಿರ್ದೇಶಕರು. “ಒಮ್ಮೆ ಚಿತ್ರಮಂದಿರಕ್ಕೆ ಭೇಟಿ ನೀಡಿ ಸಿನಿಮಾ ನೋಡಿದರೆ ನೀವುಗಳು ಓ ಮೈ ಲವ್‌ ಕುಟುಂಬದವರಾಗುತ್ತೀರಿ. ನಿರ್ಮಾಪಕರು ಒಳ್ಳೆಯ ಕಥೆಯನ್ನು ಬರೆದಿದ್ದಾರೆ. ಅದಕ್ಕೆ ತಕ್ಕಂತೆ ಸನ್ನಿವೇಶಗಳನ್ನು ಸೃಷ್ಟಿಸಿ ಶ್ರೀಮಂತವಾಗಿ ಚಿತ್ರೀಕರಿಸಲಾಗಿದೆ. ಬಳ್ಳಾರಿ ಭಾಗದವರು ಸಿನಿಮಾರಂಗಕ್ಕೆ ಬಂದಿದ್ದಾರೆ ಎನ್ನುವುದು ಶ್ರೀನು ಮಾತು.

ನಾಯಕ ಅಕ್ಷಿತ್‌, ನಾಯಕಿ ಕೀರ್ತಿ ಕಲ್ಕೆರೆ ಕೂಡಾ ತಮ್ಮ ಅನುಭವ ಹಂಚಿಕೊಂಡರು. ಜಿ.ರಾಮಾಂಜಿನಿ ಈ ಚಿತ್ರಕ್ಕೆ ಕಥೆ ಬರೆದು, ನಿರ್ಮಿಸಿದ್ದಾರೆ.