ಏನಿದು ಬಿಜೆಪಿ ಚಿಂತನಾ ಸಭೆಯ ಹಕೀಕತ್?

Team Udayavani, Jul 14, 2022, 3:42 PM IST

ಬೆಂಗಳೂರು : ಬಸವರಾಜ್ ಬೊಮ್ಮಾಯಿ ಅವರು ರಾಜ್ಯದ ಮುಖ್ಯಮಂತ್ರಿಯಾಗಿ ವರ್ಷ ಪೂರೈಸುವ ಹೊಸ್ತಿಲಲ್ಲೇ ಬಿಜೆಪಿ ಆಯೋಜಿಸಿರುವ ಚಿಂತನಾ ಸಭೆ ಈಗ ತೀವ್ರ ಕುತೂಹಲ ಸೃಷ್ಟಿಸಿದೆ.

ಬೆಂಗಳೂರು ಹೊರ ವಲಯದಲ್ಲಿರುವ ಖಾಸಗಿ ರೆಸಾರ್ಟ್ ನಲ್ಲಿ ಚಿಂತನಾಸಭೆ ನಡೆಯಲಿದೆ. ಜುಲೈ 15, 16 ರಂದು ಈ ಸಭೆ ನಡೆಯಲಿದ್ದು, ಬಿಜೆಪಿ ಸಂಘಟನಾ ಪ್ರಧಾನ ಕಾರ್ಯದರ್ಶಿ ಬಿ.ಎಲ್.ಸಂತೋಷ್, ರಾಜ್ಯ ಉಸ್ತುವಾರಿ ಅರುಣ್ ಸಿಂಗ್, ಪ್ರಧಾನ ಕಾರ್ಯದರ್ಶಿ ಸಿ.ಟಿ.ರವಿ, ಸಿಎಂ ಬಸವರಾಜ್ ಬೊಮ್ಮಾಯಿ, ಬಿಜೆಪಿ ರಾಜ್ಯಾಧ್ಯಕ್ಷ ನಳೀನ್ ಕುಮಾರ್ ಕಟೀಲ್ ಭಾಗಿಯಾಗಲಿದ್ದಾರೆ.

ವಿಶೇಷವೆಂದರೆ ಈ ಸಭೆಯ ವಿಚಾರದಲ್ಲಿ ಪಕ್ಷದ ಎಲ್ಲ ಅಧಿಕೃತ ವೇದಿಕೆಗಳು ಮಗುಮ್ಮಾಗಿವೆ. ಮಾಧ್ಯಮಗಳಿಗೆ ಆಹ್ವಾನವಿಲ್ಲದಿರುವುದರ ಜತೆಗೆ ಸಭೆಯ ಸ್ವರೂಪದ ಬಗ್ಗೆಯೂ ಸ್ಪಷ್ಟತೆ ಇಲ್ಲ.

ಚುನಾವಣಾ ವರ್ಷದಲ್ಲಿ ಸಚಿವರ ಮೌಲ್ಯಮಾಪನ ಮಾಡುವುದಕ್ಕೆ ಈ ಸಭೆ  ವೇದಿಕೆಯಾಗಲಿದೆ ಎಂದು ಮೂಲಗಳು ತಿಳಿಸಿವೆ.‌ಇದರ ಜತೆಗೆ ಮೂಲ ಬಿಜೆಪಿ ಸಚಿವರ ಜತೆಗೆ ಪ್ರತ್ಯೇಕ ಸಭೆ ಹಾಗೂ ಚರ್ಚೆ ನಡೆಯಲಿದೆ ಎಂದು ತಿಳಿದು ಬಂದಿದೆ. ಸರಕಾರಕ್ಕೆ ಇನ್ನಷ್ಟು ವೇಗೋತ್ಕರ್ಷ ನೀಡುವುದಕ್ಕಾಗಿ ಚಿಂತನಾ ಬೈಠಕ್ ಕರೆಯಲಾಗಿದೆ ಎಂದೂ ಬಿಜೆಪಿ ಮೂಲಗಳು ಹೇಳುತ್ತಿವೆ.