ಬಾಲಕಿಯ ಮಾನಭಂಗ ಯತ್ನ: ಪೋಕ್ಸೊ ಪ್ರಕರಣ ದಾಖಲು

Team Udayavani, Jul 18, 2022, 1:37 AM IST

ಮಂಗಳೂರು: ಅಪ್ರಾಪ್ತ ವಯಸ್ಕ ಬಾಲಕಿಗೆ ಕಾವೂರಿನ ಅಂಗಡಿಯವನೊಬ್ಬ ಫೋನ್‌ ಮಾಡುವಂತೆ ಪೀಡಿಸುತ್ತಿದ್ದುದಲ್ಲದೆ ಯಾರೂ ಇಲ್ಲದ ವೇಳೆ ಮನೆಗೆ ನುಗ್ಗಿ ಮಾನಭಂಗಕ್ಕೆ ಯತ್ನಿಸಿದ ಘಟನೆ ಕಾವೂರಿನಲ್ಲಿ ನಡೆದಿದೆ.

ಅಂಗಡಿಯಾತ, ಪಂಜಿಮೊಗರು ನಿವಾಸಿ ಮುಸ್ತಾಫ (35)ನ ವಿರುದ್ಧ ಮಂಗಳೂರು ಮಹಿಳಾ ಪೊಲೀಸ್‌ ಠಾಣೆಯಲ್ಲಿ ಪೋಕ್ಸೊ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.

ಬಾಲಕಿಯು ತಾಯಿಯೊಂದಿಗೆ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದು, ಬಾಲಕಿ ಆರೋಪಿಯ ತರಕಾರಿ ಅಂಗಡಿಗೆ ಹೋದಾಗ ಫೋನ್‌ ಮಾಡುವಂತೆ ಪೀಡಿಸುತ್ತಿದ್ದ. ಆದರೆ ಬಾಲಕಿ ಫೋನ್‌ ಮಾಡುತ್ತಿರಲಿಲ್ಲ. ಯಾವುದೋ ಕೆಲಸಕ್ಕಾಗಿ ಬಾಲಕಿಯ ತಾಯಿ ಆರೋಪಿಗೆ ಫೋನ್‌ ಮಾಡಿದ್ದಾಗ, ಫೋನ್‌ ನಂಬರ್‌ ಸೇವ್‌ ಮಾಡಿಕೊಂಡು ಆ ಮೊಬೈಲ್‌ಗೆ ತನ್ನ ಮೊಬೈಲ್‌ನಿಂದ ಫೋನ್‌ ಮಾಡಿ ಅಶ್ಲೀಲವಾಗಿ ಮಾತನಾಡುತ್ತಿದ್ದ.

ಜು. 8ರಂದು ಬಾಲಕಿ ಮನೆಯಲ್ಲಿ ಒಬ್ಬಳೇ ಇದ್ದಾಗ ಬಂದು ಮಾನಭಂಗಕ್ಕೆ ಯತ್ನಿಸಿದ್ದ. ಈ ವಿಚಾರ ತಿಳಿಸಿದರೆ ಜೀವ ಸಹಿತ ಬಿಡುವುದಿಲ್ಲ ಎಂದು ಬೆದರಿಕೆಯೊಡ್ಡಿರುವುದಾಗಿ ಎಫ್‌ಐಆರ್‌ ದಾಖಲಾಗಿದೆ.