ಭಾರತಕ್ಕಿಲ್ಲ ಆರ್ಥಿಕ ಹಿಂಜರಿತ ಭೀತಿ: ಬ್ಲೂಮ್‌ಬರ್ಗ್‌ ಅಧ್ಯಯನದಲ್ಲಿ ಉಲ್ಲೇಖ

Team Udayavani, Jul 27, 2022, 7:00 AM IST

ನವದೆಹಲಿ: ವರ್ಷಾಂತ್ಯದ ಆರಂಭ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಜಗತ್ತಿಗೆ ಮತ್ತೆ ಆರ್ಥಿಕ ಹಿಂಜರಿತ ಉಂಟಾಗುವ ಆತಂಕ ಎದುರಾಗಲಿದೆ. ಆದರೆ, ಈ ಬಿಕ್ಕಟ್ಟಿನಿಂದ ಭಾರತಕ್ಕೆ ಯಾವುದೇ ರೀತಿಯಲ್ಲಿ ಪರಿಣಾಮ ಬೀರುವ ಸಾಧ್ಯತೆ ಇಲ್ಲ. ಹೀಗೆಂದು ಬ್ಲೂಮ್‌ಬರ್ಗ್‌ ನಡೆಸಿದ ಅಧ್ಯಯನದಲ್ಲಿ ವ್ಯಕ್ತವಾಗಿದೆ.

ಭಾರತ ಸೇರಿದಂತೆ ಒಟ್ಟು 15 ರಾಷ್ಟ್ರಗಳ ಬಗ್ಗೆ ನಡೆಸಲಾಗಿರುವ ಅಧ್ಯಯನದಲ್ಲಿ ಸದ್ಯ ವಿತ್ತೀಯ ಬಿಕ್ಕಟ್ಟಿಗೆ ತುತ್ತಾಗಿರುವ ಶ್ರೀಲಂಕಾಕ್ಕೆ ಶೇ.85ರಷ್ಟು ಆರ್ಥಿಕ ಹಿಂಜರಿತದ ಪ್ರತಿಕೂಲ ಪರಿಣಾಮ ಉಂಟಾಗುವ ಸಾಧ್ಯತೆಗಳು ಇವೆ. ಈ ಹಿಂದೆ ನಡೆಸಲಾಗಿದ್ದ ಸಮೀಕ್ಷೆಗಿಂತ ಶೇ.33ರಷ್ಟು ಅಧಿಕ ಪ್ರಮಾಣದಲ್ಲಿ ತೊಂದರೆಗೆ ಒಳಾಗಲಿದೆ. ನ್ಯೂಜಿಲೆಂಡ್‌, ತೈವಾನ್‌, ಆಸ್ಟ್ರೇಲಿಯಾ ಮತ್ತು ಫಿಲಿಪ್ಪೀನ್ಸ್‌ಗಳು ಕ್ರಮವಾಗಿ ಶೇ.33, ಶೇ.20, ಶೇ.20 ಮತ್ತು ಶೇ.8ರಷ್ಟು ವಿತ್ತೀಯ ಬಿಕ್ಕಟ್ಟಿಗೆ ತುತ್ತಾಗಲಿವೆ ಎಂದು ಅಧ್ಯಯನದಲ್ಲಿ ಉಲ್ಲೇಖೀಸಲಾಗಿದೆ. ಪಾಕಿಸ್ತಾನಕ್ಕೆ ಶೇ.20ರಷ್ಟು ಬಾಧಕವಾಗಲಿದೆ.

ಏಷ್ಯಾಕ್ಕೆ ಸಂಬಂಧಿಸಿದಂತೆ ಶೇ.20-ಶೇ.25ರ ಪ್ರಮಾಣದಲ್ಲಿ ಸಮಸ್ಯೆ ಎದುರಾಗಲಿದೆ ಎಂದು ಆರ್ಥಿಕ ತಜ್ಞರು ಅಂದಾಜಿಸಿದ್ದಾರೆ. ಐರೋಪ್ಯ ಒಕ್ಕೂಟಕ್ಕೆ ಶೇ.50-ಶೇ.55ರ ಪ್ರಮಾಣದಲ್ಲಿ ಸವಾಲುಗಳು ಎದುರಾಗಲಿವೆ. ಮುಂದಿನ 12 ತಿಂಗಳಲ್ಲಿ ಅಮೆರಿಕ ಆರ್ಥಿಕ ಹಿಂಜರಿತದ ಪರಿಸ್ಥಿತಿಗೆ ಒಳಗಾಗಲಿದ್ದು, ಅದರ ಪ್ರಮಾಣ ಶೇ.38 ಆಗಿರಲಿದೆ.

ಚೀನದ ಮೇಲೆ:
ಏಷ್ಯಾದ ಪ್ರಬಲ ಅರ್ಥ ವ್ಯವಸ್ಥೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಚೀನ ಕೂಡ ಈ ಸಮಸ್ಯೆಗೆ ತುತ್ತಾಗಲಿದೆ. ಆ ದೇಶದ ವಿವಿಧ ಕ್ಷೇತ್ರಗಳಿಗೆ ಶೇ.20ರಷ್ಟು ಸಮಸ್ಯೆ ಉಂಟಾಗಲಿದೆ. ಇಂಧನ ಕ್ಷೇತ್ರದಲ್ಲಿ ಉಂಟಾಗುತ್ತಿರುವ ಬೆಲೆ ಏರಿಕೆಯಿಂದಾಗಿ ಜರ್ಮನಿ ಮತ್ತು ಫ್ರಾನ್ಸ್‌ ಮುಂದಿನ ದಿನಗಳಲ್ಲಿ ಹೆಚ್ಚಿನ ಪ್ರಮಾಣದ ಸಮಸ್ಯೆ ಉಂಟಾಗಲಿದೆ.

ಆರ್ಥಿಕ ಹಿಂಜರಿತ ಪ್ರಮಾಣ
ದೇಶ/ವಲಯ ಪ್ರಮಾಣ (ಶೇಕಡಾವಾರು)
ಭಾರತ 00
ಅಮೆರಿಕ 38
ಏಷ್ಯಾ 20-25
ಐರೋಪ್ಯ 50-55
ಶ್ರೀಲಂಕಾ 85
ಆಸ್ಟ್ರೇಲಿಯಾ 20
ಪಾಕಿಸ್ತಾನ 20