ಕುಂಬಳೆ: ವಂಚನೆ ಆರೋಪ; ನೈಜೀರಿಯ ಪ್ರಜೆಯ ಬಂಧನ

Team Udayavani, Aug 3, 2022, 12:06 AM IST

ಕುಂಬಳೆ: ಹರ್ಬಲ್‌ ಉತ್ಪನ್ನ ವ್ಯಾಪಾರದಲ್ಲಿ ಲಾಭಾಂಶ ನೀಡುವುದಾಗಿ ಆಮಿಷ ತೋರಿಸಿ 43.2 ಲಕ್ಷ ರೂ. ಪಡೆದು ಬಳಿಕ ಹಿಂದಿರುಗಿಸದೆ ವಂಚಿಸಿದ ಆರೋಪದಲ್ಲಿ ನೈಜೀರಿಯ ಪ್ರಜೆ ಅಂತೋನಿ ಒಗನೆ ರೋಬೊ ಎಫಿದರ್‌ (43)ನನ್ನು ಕಾಸರಗೋಡು ಪೊಲೀಸರು ಬಂಧಿಸಿದ್ದಾರೆ.

ಈತನಿಂದ ಲ್ಯಾಪ್‌ಟಾಪ್‌, 4 ಮೊಬೈಲ್‌ ಫೋನ್‌, 7 ಎಟಿಎಂ ಕಾರ್ಡ್‌, 3 ಪಾಸ್‌ಪೋರ್ಟ್‌ ಮತ್ತು ಡಾಲರ್‌ ಜೆರಾಕ್ಸ್‌ಗಳನ್ನು ಪೊಲೀಸರು ವಶಪಡಿಸಿ ಕೊಂಡಿದ್ದಾರೆ. ಆರೋಪಿಗಳ ಪತ್ತೆಗಾಗಿ ವಿಶೇಷ ಪೊಲೀಸ್‌ ತಂಡವು ಬೆಂಗಳೂರಿಗೆ ತೆರಳಿ ತನಿಖೆ ನಡೆಸಿ ಓರ್ವ ಆರೋಪಿಯನ್ನು ಬಂಧಿಸಿದ್ದಾರೆ.

ಉಳಿದ ಆರೋಪಿಗಳ ಪತ್ತೆಗೆ ಕಾರ್ಯಾಚರಣೆ ನೆದರ್‌ಲ್ಯಾಂಡ್‌ ಪ್ರಜೆಗಳಾದ ಎಲಿನ್‌ ಜಾನ್ಸನ್‌, ಮೆಲ್ವಿನ್‌ ಪೆರಿ, ಫೋಲ್‌ ವೈಯಿಲ್‌, ಇಂಗ್ಲೆಂಡ್‌ ಕೆಂಬ್ರಿಡ್ಜ್ ನಿವಾಸಿ ಡಾ| ಜೋರ್ಜ್‌ ಎಡ್ವರ್ಡ್‌, ತಮಿಳುನಾಡಿನ ವೆಲ್ಲೂರಿನ ಅನಿಲ್‌ ಪ್ರಕರಣದ ಇತರ ಆರೋಪಿಗಳಾಗಿದ್ದು ಇವರ ಪತ್ತೆಗೆ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಕಾಸರಗೋಡು ವಿದ್ಯಾನಗರದ ನಿವೃತ್ತ ಬ್ಯಾಂಕ್‌ ಉದ್ಯೋಗಿ ಕೆ. ಮಾಧವನ್‌ ಅವರು ನೀಡಿದ ದೂರಿನಂತೆ ಆರೋಪಿಗಳ ವಿರುದ್ಧ ಕೇಸು ದಾಖಲಿಸಲಾಗಿದೆ.