ಸರಕಾರಿ ಉದ್ಯೋಗ ಆಮಿಷ: 10 ಲಕ್ಷ ರೂ. ವಂಚನೆ

Team Udayavani, Aug 7, 2022, 11:41 PM IST

ಗಂಗೊಳ್ಳಿ: ತ್ರಾಸಿ ಗ್ರಾಮದ ರೆಹಾನ್‌ ಮಂಜಿಲ್‌ನ ರೆಹಾನ್‌ ಅಹ್ಮದ್‌ ಅವರ ಬಳಿ ಲತೇಶ್‌ ಸಂಜೀವ್‌ ಕುಂಬ್ಲೆ ಎನ್ನುವ ವ್ಯಕ್ತಿ ಸರಕಾರಿ ಉದ್ಯೋಗ ಕೊಡಿಸುವುದಾಗಿ 10 ಲಕ್ಷ ರೂ. ವಂಚಿಸಿದ ಕುರಿತು ಪ್ರಕರಣ ದಾಖಲಾಗಿದೆ.

ಒಂದು ವರ್ಷದ ಹಿಂದೆ ಪರಿಚಿತನಾದ ಲತೇಶ್‌ ಸಂಜೀವ ಕುಂಬ್ಲೆ , ತನಗೆ ದೊಡ್ಡ ದೊಡ್ಡ ರಾಜಕಾರಣಿಗಳ ಪರಿಚಯವಿರುವುದಾಗಿ, ಅವರ ಜತೆ ತೆಗೆಸಿಕೊಂಡಿದ್ದ ಫೋಟೋಗಳನ್ನು ತೋರಿಸಿದ್ದ. ಅನಂತರ ರೆಹಾನ್‌ ಅವರ ಅಕ್ಕ ಸಬೀನಾ ಅಖ್ತರ್‌ ಅವರಿಗೆ ಸರಕಾರಿ ಉದ್ಯೋಗ ಕೊಡಿಸುವುದಾಗಿ ಭರವಸೆ ನೀಡಿ 10 ಲಕ್ಷ ರೂ. ಹಣವನ್ನು ಕೇಳಿದ್ದು, ರೆಹಾನ್‌ ಅಹಮ್ಮದ್‌ ಆ ಹಣವನ್ನು ಬ್ಯಾಂಕ್‌ ಮೂಲಕ ವರ್ಗಾಯಿಸಿದ್ದರು.

ಚೆಕ್‌ ಬೌನ್ಸ್‌
ಹೇಳಿದಂತೆ ಕೆಲಸ ಕೊಡಿಸಿಲ್ಲವೆಂದು ಹಣ ಕೇಳಿದಾಗ 6 ಲಕ್ಷ ರೂ. ಮರಳಿ ನೀಡುವುದಾಗಿ ಕೊಟ್ಟ ಚೆಕ್‌ ಹಣವಿಲ್ಲವೆಂದು ಮರಳಿ ಬಂದಿದೆ. ನ್ಯಾಯಾಲಯದಲ್ಲಿ ದಾಖಲಾದ ಖಾಸಗಿ ದೂರಿನಂತೆ ಗಂಗೊಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.