ಹಿರಿಯರಿಗಾಗಿ ಮಾಡಿರುವ ಸ್ಟಾರ್ಟ್‌ಅಪ್‌ಗೆ ಟಾಟಾ ಹೂಡಿಕೆ

Team Udayavani, Aug 16, 2022, 10:25 PM IST

ಮುಂಬೈ: ಒಬ್ಬಂಟಿಯಾಗಿರುವ ಹಿರಿಯ ನಾಗರಿಕರಿಗೆಂದೇ ಆರಂಭಿಸಲಾಗಿರುವ “ಗುಡ್‌ಫೆಲ್ಲೋಸ್‌’ (Goodfellows)ಸಂಸ್ಥೆಯಲ್ಲಿ ದೇಶದ ಖ್ಯಾತ ಉದ್ಯಮಿ ರತನ್‌ ಟಾಟಾ ಅವರು ಹೂಡಿಕೆ ಮಾಡಿದ್ದಾರೆ.

ಈ ಸಂಸ್ಥೆಯು ಹಿರಿಯ ನಾಗರಿಕರೊಂದಿಗೆ ಮಾತನಾಡಿಕೊಂಡು, ಅವರ ಕೆಲಸ ಮಾಡಿಕೊಡುವುದಕ್ಕೆ ಆತ್ಮೀಯ ಸಹಚರರನ್ನು ಪೂರೈಸುವ ಕೆಲಸ ಮಾಡುತ್ತದೆ.

ಸದ್ಯ ಸಂಸ್ಥೆಯೊಂದಿಗೆ 20 ಯುವಕರು ಕೈ ಜೋಡಿಸಿದ್ದು, ಅವರು ಹಿರಿಯ ನಾಗರಿಕರನ್ನು ವಾರಕ್ಕೆ 3 ಬಾರಿ ಭೇಟಿಯಾಗುತ್ತಾರೆ. ಒಮ್ಮೆ ಭೇಟಿ ಮಾಡಿದಾಗ ಅವರೊಟ್ಟಿಗೆ 4 ಗಂಟೆ ಕಳೆಯುತ್ತಾರೆ. ಆ ಸಮಯದಲ್ಲಿ ಹಿರಿಯರ ನೋವು ಕೇಳುವುದು, ಅವರೊಂದಿಗೆ ಆಟವಾಡುವುದು, ಖುಷಿಯಿಂದ ಸಮಯ ಕಳೆಯುವುದನ್ನು ಅವರು ಮಾಡುತ್ತಾರೆ. ಈ ಸೌಲಭ್ಯಕ್ಕೆ ಹಿರಿಯರು ತಿಂಗಳಿಗೆ 5 ಸಾವಿರ ರೂ. ಪಾವತಿಸಬೇಕಾಗುತ್ತದೆ.

ಇಂಥದ್ದೊಂದು ವಿಶೇಷ ಸ್ಟಾರ್ಟ್‌ಅಪ್‌ಗೆ ಹೂಡಿಕೆ ಮಾಡಿರುವ ರತನ್‌ ಟಾಟಾ, “ವಯಸ್ಸಾದ ಮೇಲೆ ಒಬ್ಬಂಟಿಯಾಗಿರುವುದು ಎಷ್ಟು ಕಷ್ಟವೆಂದು ಹೇಳಲಾಗದು. ಹಾಗಾಗಿ ಇದರಲ್ಲಿ ಹೂಡಿಕೆ ಮಾಡಿದ್ದೇನೆ’ ಎಂದಿದ್ದಾರೆ. ರತನ್‌ ಟಾಟಾ ಅವರು ಈಗಾಗಲೇ ಸುಮಾರು 50ಸ್ಟಾರ್ಟ್‌ಅಪ್‌ ಗಳಿಗೆ ಹೂಡಿಕೆ ಮಾಡಿದ್ದಾರೆ.