ನಮ್ಮ ಹಡಗಿನಿಂದ ಯಾರಿಗೂ ತೊಂದರೆಯಿಲ್ಲ: ಚೀನ

Team Udayavani, Aug 16, 2022, 10:42 PM IST

ಬೀಜಿಂಗ್‌:ಚೀನದ ಗೂಢಾಚಾರಿ ಹಡಗು ಎಂದು ಭಾರತ ಹೆಸರಿಸಿರುವ “ಯುವಾನ್‌ ವಾಂಗ್‌ 5′ ಶ್ರೀಲಂಕಾದ ಹಂಬಂಟೊಟ ಬಂದರನ್ನು ತಲುಪಿದೆ.

ಭಾರತ, ಅಮೆರಿಕದ ವಿರೋಧದ ನಡುವೆಯೂ ಶ್ರೀಲಂಕಾ ಈ ಹಡಗಿನ ಪ್ರವೇಶಕ್ಕೆ ಅವಕಾಶ ಮಾಡಿಕೊಟ್ಟಿದ್ದು, “ನಮ್ಮ ಹಡಗಿನಿಂದ ಯಾರಿಗೂ ಏನೂ ತೊಂದರೆಯಾಗುವುದಿಲ್ಲ’ ಎಂದು ಚೀನ ಸ್ಪಷ್ಟೀಕರಣ ಕೊಟ್ಟಿದೆ. ಇದನ್ನು ಸಂಶೋಧನಾ ಹಡಗು ಎಂದು ಹೆಸರಿಸಿರುವ ಚೀನವು, “ನಮ್ಮ ನೌಕೆ ಅಂತಾರಾಷ್ಟ್ರೀಯ ಕಾನೂನಿಗೆ ಬದ್ಧವಾಗಿದೆ. ಇದು ಯಾವುದೇ ದೇಶದ ಭದ್ರತೆ ಅಥವಾ ಆರ್ಥಿಕ ಹಿತಾಸಕ್ತಿಗೆ ಹಾನಿಯುಂಟು ಮಾಡುವುದಿಲ್ಲ. ಹಾಗಾಗಿ ಮೂರನೇ ವ್ಯಕ್ತಿಯಿಂದ ನಮಗೆ ತೊಂದರೆ ಉಂಟಾಗಬಾರದು’ ಎಂದು ಎಚ್ಚರಿಕೆಯನ್ನೂ ಕೊಟ್ಟಿದೆ.

ಈ ಹಡಗು ಭಾರತದ ಭದ್ರತೆಯ ಬಗ್ಗೆ ಗೂಢಾಚಾರಿ ಕೆಲಸ ಮಾಡುವ ಸಾಧ್ಯತೆಯಿದ್ದು, ಇದರ ಪ್ರವೇಶಕ್ಕೆ ಅನುಮತಿ ಕೊಡಬಾರದು ಎಂದು ಈ ಹಿಂದೆ ಭಾರತವು ಶ್ರೀಲಂಕಾಕ್ಕೆ ಕೇಳಿತ್ತು.