ಪ್ರಾಣ ಹಿಂಡುತ್ತಿರುವ ಬೈಕಂಪಾಡಿ ಜಂಕ್ಷನ್‌ ಗುಂಡಿಗಳು

Team Udayavani, Aug 23, 2022, 1:16 PM IST

ಬೈಕಂಪಾಡಿ: ಬೈಕಂಪಾಡಿ ಕೈಗಾರಿಕಾ ಪ್ರದೇಶಕ್ಕೆ ತಿರುಗುವ ಜಂಕ್ಷನ್‌ ರಸ್ತೆಯ ಇಕ್ಕೆಲಗಳಲ್ಲಿ ಬಿದ್ದಿರುವ ಬೃಹತ್‌ ಹೊಂಡಗಳು ವಾಹನ ಚಾಲಕರ ಜೀವ ಹಿಂಡುತ್ತಿವೆ.

ಕೈಗಾರಿಕಾ ಪ್ರದೇಶದಿಂದ ಹೊರ ಬರುವ ನೂರಾರು ಲಾರಿಗಳು ಈ ಹೊಂಡ ಗುಂಡಿಯಲ್ಲಿ ಚಲಿಸಿ ಮೇಲೆ ಬರಲು ಸಾಧ್ಯವಾಗದೆ ಕೆಟ್ಟು ನಿಲ್ಲುತ್ತಿವೆ. ಕೂಳೂರಿನಿಂದ ಬರುವ ಬೃಹತ್‌ ಕಂಟೈನರ್‌ಗಳು, ಲಾರಿಗಳು ಬೈಕಂಪಾಡಿ ಜಂಕ್ಷನ್‌ನಲ್ಲೇ ತಿರುವು ಪಡೆಯುತ್ತಿದ್ದು, ಈ ಹೊಂಡಕ್ಕೆ ಬಿದ್ದ ವಾಹನಗಳು ಮೇಲೇಳದೆ ಟ್ರಾಫಿಕ್‌ ಜಾಮ್‌ಗೂ ಕಾರಣವಾಗುತ್ತಿದೆ.

ಈ ಭಾಗದಲ್ಲಿ ಹೆದ್ದಾರಿಯ ಹೊಂಡ ವನ್ನು ಮುಚ್ಚಲು ಇಲಾಖೆ ಗುತ್ತಿಗೆ ನೀಡಿದೆ. ಆದರೆ ರಸ್ತೆಯ ಇಕ್ಕೆಲಗಳಲ್ಲಿರುವ ಸರ್ವಿಸ್‌ ರಸ್ತೆ ಹಾಗೂ ಹೊಂಡವನ್ನು ನಿರ್ಲಕ್ಷé ಮಾಡುತ್ತಿದೆ. ಸಣ್ಣ ವಾಹನಗಳು ಸ್ವಲ್ಪ ಬದಿಗೆ ಸರಿದರೂ ಪಲ್ಟಿ ಹೊಡೆಯುವುದು ಖಚಿತ ಎನ್ನುವಷ್ಟರ ಮಟ್ಟಿಗೆ ಭಾರೀ ಹೊಂಡ ಸೃಷ್ಟಿಯಾಗಿದೆ.

ತಾತ್ಕಾಲಿಕವಾಗಿಯಾದರೂ ಕಾಂಕ್ರಿಟ್‌ ತುಂಬಿಸಿ ರಸ್ತೆಯ ಇಕ್ಕೆಲಗಳನ್ನು ದುರಸ್ತಿ ಪಡಿಸಿಕೊಡಬೇಕು ಎಂಬುದು ನಮ್ಮ ಆಗ್ರಹ ಎನ್ನುತ್ತಾರೆ ರಿಕ್ಷಾ ಚಾಲಕ ಉಮೇಶ್‌ ಇಡ್ಯಾ ಅವರು.

ಪ್ರಾಣ ಭೀತಿ ನಿವಾರಿಸಿ

ಬೈಕಂಪಾಡಿ ಜಂಕ್ಷನ್‌, ಪಣಂಬೂರು ರಿಲಯನ್ಸ್‌ ಪೆಟ್ರೋಲ್‌ ಬಂಕ್‌ ಮುಂಭಾಗ, ಎನ್‌ಎಂಪಿಟಿ ಮಲ್ಯ ಗೇಟ್‌, ಎನ್‌ಎಂಪಿಟಿ ಸರ್ವಿಸ್‌ ರಸ್ತೆಗಳು ದ್ವಿಚಕ್ರ ಸವಾರರಿಗೆ ಹಾಗೂ ಸಣ್ಣ ವಾಹನಗಳಿಗೆ ಅಪಾಯವನ್ನು ಒಡ್ಡುತ್ತಿರುವ ಪ್ರಮುಖ ಸ್ಥಳಗಳು. ಇದನ್ನು ತತ್‌ಕ್ಷಣ ದುರಸ್ತಿ ಪಡಿಸಿ ಹೆದ್ದಾರಿ ಸಂಚಾರದಲ್ಲಿ ಪ್ರಾಣ ಭೀತಿಯನ್ನು ಇಲಾಖೆಯ ಅಧಿಕಾರಿಗಳು ನಿವಾರಿಸಬೇಕಿದೆ.