ಮಧ್ಯಾಹ್ನದ ಮಳೆ ತಂದ ಪಜೀತಿ: ಸೂರ್ಯಕಾಂತಿ ಚರಂಡಿ ಪಾಲು

Team Udayavani, Sep 5, 2022, 4:58 PM IST

ಕುಷ್ಟಗಿ: ಸ್ಥಳೀಯ ಎಪಿಎಂಸಿ ಮಾರುಕಟ್ಟೆಗೆ ತಂದು ಒಣಗಲು ಹಾಕಿದ್ದ ಸೂರ್ಯಕಾಂತಿ ಉತ್ಪನ್ನ ಏಕಾಏಕಿ ಮಳೆಗೆ ಚರಂಡಿ ಪಾಲಾದ ಪ್ರಸಂಗ ಸೋಮವಾರ ನಡೆದಿದೆ.

ಕುಷ್ಟಗಿ ಎಪಿಎಂಸಿ ಯಾರ್ಡ್ ನಲ್ಲಿ ಸೂರ್ಯಕಾಂತಿ ಉತ್ಪನ್ನವನ್ನು ರೈತರು ತಂದಿದ್ದರು. ರೈತರು ತಂದ ಉತ್ಪನ್ನ ತೇವಾಂಶದಿಂದ ಕೂಡಿದ್ದರಿಂದ ದಲ್ಲಾಳಿ ಅಂಗಡಿಯವರು ತೂಕ ಮಾಡಿರಲಿಲ್ಲ. ಅದೇ ವೇಳೆ ಪ್ರಖರ ಬಿಸಿಲು ವಾತವರಣದ ಹಿನ್ನೆಲೆಯಲ್ಲಿ ರೈತರು, ರಾಶಿ ಕಟ್ಟೆ, ಸಿಸಿ ರಸ್ತೆಯಲ್ಲಿ ಸೂರ್ಯಕಾಂತಿ ಉತ್ಪನ್ನವನ್ನು ಒಣಗಲು ಬಿಟ್ಟಿದ್ದರು.

ಮಧ್ಯಾಹ್ನ 3 ಗಂಟೆಯ ವೇಳೆ ಏಕಾಏಕಿ ಮಳೆ ಸುರಿದಿದ್ದು, ರೈತರ ಉತ್ಪನ್ನ ನೀರಿನ ಹರಿವಿನಿಂದ ಚರಂಡಿ ಸೇರಿದೆ. ಆದಾಗ್ಯೂ ರೈತರು ಚರಂಡಿಗೆ ಇಳಿದು ಸೂರ್ಯಕಾಂತಿ ಉತ್ಪನ್ನ ತುಂಬಿಕೊಳ್ಳುತ್ತಿರುವುದು ಕಂಡು ಬಂತು. ಶರಣಪ್ಪ ಚೂರಿ, ಕಂಠೆಪ್ಪ ಚೂರಿ, ದೇವಪ್ಪ ಕೊರಡಕೇರ, ಸಂಗವ್ವ ಮಾಟಲದಿನ್ನಿ, ಸಂಗಪ್ಪ ಈ ರೈತರ ನಾಲ್ಕೈದು ಚೀಲ ಸೂರ್ಯಕಾಂತಿ ಉತ್ಪನ್ನ ಚರಂಡಿ ಸೇರಿದೆ.