ತಂಜಾವೂರಿನಲ್ಲಿ ಕಳವು ಮಾಡಲಾಗಿದ್ದ ನಟರಾಜ ವಿಗ್ರಹ ಅಮೆರಿಕದಲ್ಲಿ ಪತ್ತೆ

Team Udayavani, Sep 5, 2022, 4:46 PM IST

ಸಾಂದರ್ಭಿಕ ಚಿತ್ರ ಮಾತ್ರ

ಚೆನ್ನೈ : 62ವರ್ಷಗಳ ಹಿಂದೆ ತಮಿಳುನಾಡಿನ ತಂಜಾವೂರಿನ ದೇವಾಲಯವೊಂದರಿಂದ ಕಳವು ಮಾಡಲಾಗಿದ್ದ ನಟರಾಜ ವಿಗ್ರಹ ಅಮೆರಿಕದಲ್ಲಿ ಪತ್ತೆಯಾಗಿದೆ.

ತಂಜಾವೂರು ಜಿಲ್ಲೆಯಲ್ಲಿರುವ ಅರುಲ್ಮಿಗು ವೇದಪುರೀಶ್ವರ ದೇವಸ್ಥಾನಕ್ಕೆ ಸೇರಿದ ವಿಗ್ರಹ ಅಮೆರಿಕದ ನ್ಯೂಯಾರ್ಕ್‌ನಲ್ಲಿ ಪತ್ತೆಯಾಗಿದೆ ಎಂದು ಸಿಐಡಿ ವಿಗ್ರಹ ವಿಭಾಗ ಸೋಮವಾರ ತಿಳಿಸಿದೆ.

ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆಯ ಆಡಳಿತದಲ್ಲಿರುವ 2000 ವರ್ಷಗಳಷ್ಟು ಹಳೆಯದಾದ ದೇವಾಲಯಕ್ಕೆ ಕಳ್ಳರು ನುಗ್ಗಿ ವಿಗ್ರಹವನ್ನು ಕದ್ದೊಯ್ದಿದ್ದರು, ಸೆಪ್ಟೆಂಬರ್ 1 ರಂದು ತಿರುವೇಧಿಕುಡಿ ಗ್ರಾಮದ ಎಸ್. ವೆಂಕಟಾಚಲಂ ಅವರು ನೀಡಿದ ದೂರಿನ ಮೇರೆಗೆ ವಿಗ್ರಹ ವಿಭಾಗವು ತನಿಖೆ ಕೈಗೊಂಡು ವಿಗ್ರಹವನ್ನು ಪತ್ತೆ ಮಾಡಿದೆ. ದೇವಸ್ಥಾನದಲ್ಲಿ ನಟರಾಜ ನಕಲಿ ವಿಗ್ರಹವಿದ್ದು, ಮೂಲ ಮೂರ್ತಿ ನಾಪತ್ತೆಯಾಗಿರುವುದು ಬೆಳಕಿಗೆ ಬಂದಿತ್ತು.

ತನಿಖಾ ತಂಡವು ಪುದುಚೇರಿಯ ಇಂಡೋ-ಫ್ರೆಂಚ್ ಇನ್‌ಸ್ಟಿಟ್ಯೂಟ್‌ನಿಂದ ಮೂಲ ಛಾಯಾಚಿತ್ರದ ಚಿತ್ರಗಳನ್ನು ಹುಡುಕಿ ಮೂಲ ಚಿತ್ರವನ್ನು ಸ್ವೀಕರಿಸಿದ ನಂತರ, ವಿವಿಧ ವಸ್ತುಸಂಗ್ರಹಾಲಯಗಳ ವೆಬ್‌ಸೈಟ್‌ಗಳು, ಕಲಾಕೃತಿ ಸಂಗ್ರಾಹಕರ ಕರಪತ್ರಗಳು ಮತ್ತು ಹರಾಜು ಮನೆಗಳಲ್ಲಿ ಹುಡುಕಾಟವನ್ನು ಪ್ರಾರಂಭಿಸಿತು.ಹುಡುಕಾಟದ ನಂತರ, ತಂಡವು ನ್ಯೂಯಾರ್ಕ್ ನ ಏಷ್ಯಾ ಸೊಸೈಟಿ ಮ್ಯೂಸಿಯಂನಲ್ಲಿ ಮೂಲ ವಿಗ್ರಹವನ್ನು ಪತ್ತೆ ಹಚ್ಚಿದೆ.

ಸಮಾಲೋಚನೆ ನಡೆಸಿದ ತಜ್ಞರು, ವಸ್ತುಸಂಗ್ರಹಾಲಯದ ವೆಬ್‌ಸೈಟ್‌ನಲ್ಲಿರುವ ವಿಗ್ರಹವು ಮೂಲ ವಿಗ್ರಹ ಎಂದು ಖಚಿತಪಡಿಸಿದರು. ಯುನೆಸ್ಕೋ ಒಪ್ಪಂದದ ಅಡಿಯಲ್ಲಿ ವಿಗ್ರಹವನ್ನು ಹಿಂಪಡೆಯಲು ಮತ್ತು ವಿಗ್ರಹವನ್ನು ದೇವಸ್ಥಾನಕ್ಕೆ ಮರಳಿಸಲು ತ್ವರಿತ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಅಧಿಕೃತ ಪ್ರಕಟಣೆ ತಿಳಿಸಿದೆ.