ಜೂನಿಯರ್‌ ಬಿಡಬ್ಲ್ಯುಎಫ್ ರ್‍ಯಾಂಕಿಂಗ್‌: ಅನುಪಮಾ ಉಪಾಧ್ಯಾಯ ನಂ.1

Team Udayavani, Sep 7, 2022, 11:27 PM IST

ಹೊಸದಿಲ್ಲಿ: ಭಾರತದ ಪ್ರತಿಭಾನ್ವಿತ ಶಟ್ಲರ್‌ ಅನುಪಮಾ ಉಪಾಧ್ಯಾಯ ಬಿಡಬ್ಲ್ಯುಎಫ್ ಜೂನಿಯರ್‌ ವಿಭಾಗದಲ್ಲಿ (ಅಂಡರ್‌-19) ವಿಶ್ವದ ನಂಬರ್‌ ವನ್‌ ರ್‍ಯಾಂಕಿಂಗ್‌ ಆಟ ಗಾರ್ತಿ ಯಾಗಿ ಮೂಡಿಬಂದಿದ್ದಾರೆ.

17 ವರ್ಷದ, ಪಂಚಕುಲದ ಈ ಬ್ಯಾಡ್ಮಿಂಟನ್‌ ಆಟಗಾರ್ತಿ ಈ ವರ್ಷದ ಆದಿಯಲ್ಲಿ ಉಗಾಂಡ ಮತ್ತು ಪೋಲೆಂಡ್‌ ಕೂಟಗಳಲ್ಲಿ ಚಾಂಪಿಯನ್‌ ಆಗಿದ್ದರು.

ನೂತನ ರ್‍ಯಾಂಕಿಂಗ್‌ನಲ್ಲಿ 2 ಸ್ಥಾನಗಳ ಪ್ರಗತಿ ಸಾಧಿಸಿದ ಅನುಪಮಾ ಭಾರತದವರೇ ಆದ ತಸ್ನಿಮ್‌ ಮಿರ್‌ ಅವರನ್ನು ಅಗ್ರಸ್ಥಾನದಿಂದ ಕೆಳಗಿಳಿಸಿದರು. ತಸ್ನಿಮ್‌ ಮಿರ್‌ ಅವರಿಗೆ ಈಗ ದ್ವಿತೀಯ ಸ್ಥಾನ. ಟಾಪ್‌-10 ರ್‍ಯಾಂಕಿಂಗ್‌ ಯಾದಿಯಲ್ಲಿರುವ ಉಳಿದಿಬ್ಬರು ಭಾರತೀಯರೆಂದರೆ ಅನ್ವೇಷಾ ಗೌಡ (6) ಮತ್ತು ಉನ್ನತಿ ಹೂಡಾ (9).

“ಪ್ರಕಾಶ್‌ ಪಡುಕೋಣೆ ಅಕಾಡೆಮಿ’ಯಲ್ಲಿ ತರಬೇತಿ ಪಡೆದ ಅನುಪಮಾ ಉಪಾಧ್ಯಯ ಜೂನಿಯರ್‌ ವಿಭಾಗದಲ್ಲಿ ನಂ.1 ರ್‍ಯಾಂಕಿಂಗ್‌ ಗೌರವಕ್ಕೆ ಪಾತ್ರರಾದ ಭಾರತದ 6ನೇ ಶಟ್ಲರ್‌. ಪುರುಷರ ವಿಭಾಗದಲ್ಲಿ ಆದಿತ್ಯ ಜೋಶಿ (2014), ಸಿರಿಲ್‌ ವರ್ಮ (2016), ಲಕ್ಷ್ಯ ಸೇನ್‌ (2018), ಶಂಕರ್‌ ಮುತ್ತುಸ್ವಾಮಿ ಸುಬ್ರಹ್ಮಣ್ಯಮ್‌ (2022) ಉನ್ನತ ಸ್ಥಾನ ಅಲಂಕರಿಸಿದ್ದರು.