ರಾಜ್ಯವ್ಯಾಪಿ ಪ್ರವಾಸ ಮಾಡಿ ಪಕ್ಷವನ್ನು ಮತ್ತೆ ಅಧಿಕಾರಕ್ಕೆ ತರುತ್ತೇನೆ: ಹೆಚ್ ಡಿಡಿ

Team Udayavani, Oct 8, 2022, 9:43 PM IST

ಬೆಂಗಳೂರು: ನನ್ನ ಆರೋಗ್ಯ ಸುಧಾರಿಸಿದ ನಂತರ ರಾಜ್ಯವ್ಯಾಪಿ ಪ್ರವಾಸ ಮಾಡಿ ಪಕ್ಷವನ್ನು ಮತ್ತೆ ಅಧಿಕಾರಕ್ಕೆ ತರುವುದಾಗಿ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಘೋಷಣೆ ಮಾಡಿದರು.

ಬಸವನಗುಡಿಯ ನ್ಯಾಷನಲ್ ಕಾಲೇಜ್ ಮೈದಾನದಲ್ಲಿ ನಡೆದ ಜೆಡಿಎಸ್ ಜನಮಿತ್ತ ಕಾರ್ಯಕ್ರಮದ ಸಮಾರೋಪ ಸಮಾರಂಭದಲ್ಲಿ ಅವರು ಮಾತನಾಡಿದರು.

ನನಗೆ ಆರೋಗ್ಯ ಸುಧಾರಿಸುತ್ತಿದೆ.ಆರೋಗ್ಯ ಸಂಪೂರ್ಣ ಸುಧಾರಿಸಿದ ನಂತರ ಜಿಲ್ಲವಾರು ಪ್ರವಾಸ ಮಾಡಿ ಪಕ್ಷವನ್ನು ಬಲಪಡಿಸುತ್ತೇನೆ.ಮುಂದಿನ ದಿನಗಳಲ್ಲಿ ಮತ್ತೆ ಪಕ್ಷವನ್ನು ಅಧಿಕಾರ ತಂದು ಕುಮಾರಸ್ವಾಮಿ ಅವರನ್ನು ಮುಖ್ಯಮಂತ್ರಿ ಆಗಿ ಮಾಡುವುದಾಗಿ ಹೇಳಿದರು.

ನಾನು ಯಾವುದೇ ಸಮುದಾಯಕ್ಕೂ ಅನ್ಯಾಯ ಮಾಡಿಲ್ಲ. ಅಲೆಮಾರಿಗಳು ಸೇರಿದಂತೆ ಎಲ್ಲ ಸಮುದಾಯದವರಿಗೂ ಅಧಿಕಾರ ನೀಡಿದ್ದೇನೆ. ಆ ಹಿನ್ನೆಲೆಯಲ್ಲಿ ಪ್ರಾದೇಶಿಕ ಪಕ್ಷವಾದ ಜೆಡಿಎಸ್ ಗೆ ಬಲನೀಡಿ ಎಂದರು.

ದರೋಡೆ ಕೋರರನ್ನು ಮೊದಲು ಓಡಿಸಿ

”ವಿಧಾನ ಸೌಧದಲ್ಲಿರುವ ಚೆಂಬಲ್ ಕಣಿವೆ ದರೋಡೆ ಕೋರರನ್ನು ಮೊದಲು ಓಡಿಸಿ” ಎಂದು ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅವರು ಜೆಡಿಸ್ ಕಾರ್ಯಕರ್ತರಿಗೆ ಕರೆ ನೀಡಿದರು.

”ತಮ್ಮ ರಾಜಕೀಯ ತೇವಲಿಗಾಗಿ ಧರ್ಮ,ಧರ್ಮ ಜಾತಿ ಜಾತಿಯ ವೈಮನಸ್ಸು ತಂದಿಡಲಾಗುತ್ತಿದೆ. ಗುಜರಾತ್ ಬಂದರಿ ನಿಂದ ರಾಜ್ಯಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಡ್ರಾಗ್ಸ್ ಪೂರೈಕೆ ಆಗುತ್ತಿದ್ದು ಕರಾವಳಿಸೇರಿದಂತೆ ನಾಡಿನ ಯುವ ಸಮೂಹವನ್ನು ದಿಕ್ಕು ತಪ್ಪಿಸಲಾಗುತ್ತಿದೆ ಎಂದರು.

ಗುಣಮಟ್ಟದ ರಸ್ತೆ ಹೆಸರನಲ್ಲಿ ಬೆಂಗಳೂರಿನಲ್ಲಿ ಜನರ ತೆರಿಗೆ ಹಣ ಲೂಟಿ ಮಾಡಲಾಗುತ್ತಿದೆ. ಒಬ್ಬರು 40 ಪರ್ಸೆಂಟ್ ಬಗ್ಗೆ ಮಾತನಾಡಿದರೆ ಮತ್ತೊಬ್ಬರು ಆರ್ಕಾವತಿ ಹಗರಣ, ಇಂಧನ ಹಗರಣದ ಬಗ್ಗೆ ಮಾತನಾಡುತ್ತಿದ್ದಾರೆ. ಈ ಭ್ರಷ್ಟಾಚಾರದ ಬಗ್ಗೆ ನಾನು ಈ ಹಿಂದೆ ಮಾತನಾಡಿದ್ದೆ ಎಂದರು.

ಪಾಲಿಕೆಯಲ್ಲಯ ಕೋಟ್ಯಂತರ ರೂ.ಭ್ರಷ್ಟಾಚಾರ ನಡೆಸಿ ದಾಖಲೆಗಳಿಗೆ ಬೆಂಕಿಯಿಟ್ಟ ಸರ್ಕಾರವನ್ನ ಅಧಿಕಾರಕ್ಕೆ ತರಬೇಕೆ ಎಂಬುವುದನ್ನು ಜನರು ನಿರ್ಧರಿಸಿ ಎಂದು ಹೇಳಿದರು.