ರೆಮೋ ಬಿಡುಗಡೆಗೆ ಮುಹೂರ್ತ ಫಿಕ್ಸ್‌

Team Udayavani, Oct 10, 2022, 3:39 PM IST

ನಟ ಇಶಾನ್‌ ಮತ್ತು ಆಶಿಕಾ ರಂಗನಾಥ್‌ ಜೋಡಿಯಾಗಿ ಅಭಿನಯಿಸಿರುವ ಮ್ಯೂಸಿಕಲ್‌ ಲವ್‌ಸ್ಟೋರಿ ಸಿನಿಮಾ “ರೇಮೊ’ದ ಬಿಡುಗಡೆಗೆ ಮುಹೂರ್ತ ಫಿಕ್ಸ್‌ ಆಗಿದೆ. ಸದ್ಯ ಭರದಿಂದ “ರೆಮೋ’ ಸಿನಿಮಾದ ಪ್ರಚಾರ ಕಾರ್ಯಗಳಲ್ಲಿ ನಿರತವಾಗಿರುವ ಚಿತ್ರತಂಡ, ಇದೇ ನವೆಂಬರ್‌ 25 ರಂದು ಸಿನಿಮಾವನ್ನು ಪ್ರೇಕ್ಷಕರ ಮುಂದೆ ತರಲು ಯೋಜನೆ ಹಾಕಿಕೊಂಡಿದೆ.

ಸಿ. ಆರ್‌ ಮನೋಹರ್‌ ನಿರ್ಮಾಣದಲ್ಲಿ ಮೂಡಿಬಂದಿರುವ “ರೆಮೋ’ ಸಿನಿಮಾಕ್ಕೆ ಪವನ್‌ ಒಡೆಯರ್‌ ನಿರ್ದೇಶನವಿದೆ.

“ರೆಮೋ’ ಸಿನಿಮಾದ ಬಗ್ಗೆ ಮಾತನಾಡುವ ನಿರ್ದೇಶಕ ಪವನ್‌ ಒಡೆಯರ್‌, “ಮೊದಲ ಬಾರಿ ಇಶಾನ್‌ ಅವರನ್ನು ನಾನು ದುಬೈನಲ್ಲಿ ಭೇಟಿ ಮಾಡಿದೆ. ಎಷ್ಟು ಚೆನ್ನಾಗಿದ್ದಾರೆ. ಇವರನ್ನು ಹೀರೋ ಮಾಡಬೇಕು ಅಂದು ಕೊಂಡೆ. ನಂತರ “ರೆಮೋ’ ಸಿನಿಮಾದ ಕಥೆ ಬರೆಯಲು ಶುರು ಮಾಡಿದೆ. ಎಲ್ಲವೂ ಅಂತಿಮವಾಗಿ 2019ರಲ್ಲಿ “ರೆಮೋ’ ಚಿತ್ರೀಕರಣ ಬೆಂಗಳೂರಿನಲ್ಲಿ ಆರಂಭವಾಯಿತು. ಆನಂತರ ಹೈದರಾಬಾದ್‌, ಜಮ್ಮು-ಕಾಶ್ಮೀರ, ಸೌತ್‌ ಆಫ್ರಿಕಾ, ಸಿಂಗಾಪುರ ಹೀಗೆ ಅನೇಕ ಕಡೆಗಳಲ್ಲಿ ಸಿನಿಮಾದ ಚಿತ್ರೀಕರಣ ನಡೆಸಲಾಯಿತು. ಸಿನಿಮಾದ ಹೆಸರೇ ಹೇಳುವಂತೆ, ಇದೊಂದು ಪರಿಶುದ್ಧ ಮ್ಯೂಸಿಕಲ್‌ ಲವ್‌ಸ್ಟೋರಿಯ ಸಿನಿಮಾ. ಜೊತೆಗೆ ಅನೇಕ ಭಾವನಾತ್ಮಕ ಸನ್ನಿವೇಶಗಳು ನೋಡುಗರ ಮನಸ್ಸಿಗೆ ಹತ್ತಿರವಾಗಲಿದೆ. ಇಶಾನ್‌ – ಆಶಿಕಾ ರಂಗನಾಥ್‌ ಅವರ ಸುಂದರ ಜೋಡಿಯನ್ನು ತೆರೆಮೇಲೆ ನೋಡಿದವರು ಖಂಡಿತಾ ಫಿದಾ ಆಗುತ್ತಾರೆ’ ಎನ್ನುವ ವಿಶ್ವಾಸ ವ್ಯಕ್ತಪಡಿಸುತ್ತಾರೆ.

“ರೆಮೋ’ ಸಿನಿಮಾದಲ್ಲಿ ಆರು ಹಾಡುಗಳಿದ್ದು, ಅರ್ಜುನ್‌ ಜನ್ಯ ಸಂಗೀತ ಸಂಯೋಜಿಸಿದ್ದಾರೆ. ಸಿನಿಮಾಕ್ಕೆ ವೈದಿ ಛಾಯಾಗ್ರಹಣ, ಕೆ. ಎಂ ಪ್ರಕಾಶ್‌ ಸಂಕಲನವಿದೆ. ಸದ್ಯ “ರೆಮೋ’ ಸಿನಿಮಾದ ಪ್ರಚಾರ ಕಾರ್ಯಗಳಲ್ಲಿ ನಿರತವಾಗಿರುವ ಚಿತ್ರತಂಡ, ಶೀಘ್ರದಲ್ಲಿಯೇ “ರೆಮೋ’ ಸಿನಿಮಾದ ಲಿರಿಕಲ್‌ ವಿಡಿಯೋ ಸಾಂಗ್‌ ಮತ್ತು ಟ್ರೇಲರ್‌ ಬಿಡುಗಡೆ ಮಾಡುವ ಸಿದ್ಧತೆಯಲ್ಲಿದೆ.