ಸಕಲ ಸರ್ಕಾರಿ ಗೌರವದೊಂದಿಗೆ ಸೈಫಾಯಿಯಲ್ಲಿ ಮುಲಾಯಂ ಸಿಂಗ್ ಅಂತ್ಯಕ್ರಿಯೆ

Team Udayavani, Oct 12, 2022, 12:09 AM IST

ಸೈಫಾಯಿ: ಸಮಾಜವಾದಿ ಪಕ್ಷದ ಸಂಸ್ಥಾಪಕ ಮುಲಾಯಂ ಸಿಂಗ್‌ ಯಾದವ್‌ ಅವರ ಅಂತ್ಯಕ್ರಿಯೆ ಹುಟ್ಟೂರು ಉ.ಪ್ರ.ದ ಸೈಫಾಯಿಯಲ್ಲಿ ಮಂಗಳವಾರ ಸಕಲ ಸರಕಾರಿ ಗೌರವಗಳೊಂದಿಗೆ ನಡೆಯಿತು. ಅವರ ಪುತ್ರ, ಸಮಾಜವಾದಿ ಪಕ್ಷದ ಅಧ್ಯಕ್ಷ ಅಖೀಲೇಶ್‌ ಯಾದವ್‌ ಅವರು ಚಿತೆಗೆ ಅಗ್ನಿಸ್ಪರ್ಶ ಮತ್ತು ಇತರ ಧಾರ್ಮಿಕ ವಿಧಿವಿಧಾನಗಳನ್ನು ಪೂರೈಸಿದರು.

ಸೈಫಾಯಿಯಲ್ಲಿ ಸಾರ್ವಜನಿಕರಿಗೆ ಮತ್ತು ರಾಜಕೀಯ ಕ್ಷೇತ್ರದ ಮುಖಂಡ ರಿಗೆ ಸ್ಥಳೀಯ ಮೈದಾನದಲ್ಲಿ ಅನುವು ಮಾಡಿಕೊಡಲಾಗಿತ್ತು. ಸಂಜೆಯ ವೇಳೆ ಪುಷ್ಪಾಲಂಕೃತ ವಾಹನದಲ್ಲಿ ಹಿರಿಯ ನಾಯಕನ ಪಾರ್ಥಿವ ಶರೀರವನ್ನು ಚಿತಾಗರಕ್ಕೆ ತರಲಾಯಿತು. ಅಖೀಲೇಶ್‌ ಯಾದವ್‌, ಶಿವಪಾಲ್‌ ಯಾದವ್‌ ಸೇರಿದಂತೆ ಕುಟುಂಬದ ಪ್ರಮುಖರು ಅದರಲ್ಲಿದ್ದರು. ದಾರಿಯುದ್ದಕ್ಕೂ “ನೇತಾಜಿ ಅಮರ್‌ ರಹೇ’ ಎಂಬ ಘೋಷಣೆಯನ್ನೂ ಬೆಂಬಲಿಗರು ಮೊಳಗಿಸಿದರು.

ರಕ್ಷಣ ಸಚಿವ ರಾಜನಾಥ್‌ ಸಿಂಗ್‌, ರಾಜ್ಯಸಭಾ ಸದಸ್ಯ ಮಲ್ಲಿಕಾರ್ಜುನ ಖರ್ಗೆ, ಲೋಕಸಭೆ ಸ್ಪೀಕರ್‌ ಓಂ ಬಿರ್ಲಾ, ಎನ್‌ಸಿಪಿ ಮುಖ್ಯಸ್ಥ ಶರದ್‌ ಪವಾರ್‌, ಉ.ಪ್ರ. ಸಿಎಂ ಯೋಗಿ ಆದಿತ್ಯನಾಥ್‌ ಸೇರಿದಂತೆ ರಾಜಕೀಯ ಮತ್ತು ಉದ್ದಿಮೆ ಕ್ಷೇತ್ರದ ಪ್ರಮುಖರು ಅಗಲಿದ ನಾಯಕ ನಿಗೆ ಅಂತಿಮ ನಮನ ಸಲ್ಲಿಸಿದರು.