ಹಣಕಾಸು ಅಕ್ರಮ: ಐಎಎಸ್‌ ಅಧಿಕಾರಿ ಬಂಧನ

Team Udayavani, Oct 13, 2022, 7:08 PM IST

ರಾಯ್ಪುರ: ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಜಾರಿ ನಿರ್ದೇಶನಾಲಯ(ಇಡಿ)ದ ಅಧಿಕಾರಿಗಳು ಗುರುವಾರ ಛತ್ತೀಸಗಡ ಕೇಡರ್‌ನ ಐಎಎಸ್‌ ಅಧಿಕಾರಿ ಸಮೀರ್‌ ವಿಷ್ಣೋಯ್‌ ಮತ್ತು ಉದ್ಯಮಿಗಳಾದ ಸುನೀಲ್‌ ಅಗರ್ವಾಲ್‌ ಮತ್ತು ಲಕ್ಷ್ಮೀಕಾಂತ್‌ ತಿವಾರಿ ಅವರನ್ನು ಬಂಧಿಸಿದ್ದಾರೆ.

ನಾಪತ್ತೆಯಾಗಿರುವ ಉದ್ಯಮಿ ಸೂರ್ಯಕಾಂತ್‌ ತಿವಾರಿ ಅವರ ಚಿಕ್ಕಪ್ಪ ಲಕ್ಷ್ಮೀಕಾಂತ್‌ ತಿವಾರಿ, ಇಂದ್ರಮಣಿ ಗ್ರೂಪ್‌ನ ಸುನೀಲ್‌ ಅಗರ್ವಾಲ್‌ ಮತ್ತು ಛತ್ತೀಸಗಡ ಇನ್ಫೋಟೆಕ್‌ ಪ್ರಮೋಷನ್‌ ಸೊಸೈಟಿ(ಚಿಪ್ಸ್‌) ಸಿಇಒ ಸಮೀರ್‌ ವಿಷ್ಣೋಯ್‌ ಅವರನ್ನು ರಾಯ್ಪುರದಲ್ಲಿ ಬಂಧಿಸಿರುವ ಇಡಿ ಅಧಿಕಾರಿಗಳು, ಅವರನ್ನು ಸ್ಥಳೀಯ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ.

ಇದೇ ವೇಳೆ ಇಡಿ ಅಧಿಕಾರಿಗಳು ಲಕ್ಷ್ಮೀಕಾಂತ್‌ ತಿವಾರಿ ಅವರಿಗೆ ಸೇರಿದ ಮನೆ ಮತ್ತು ಕಚೇರಿಗಳ ಮೇಲೆ ದಾಳಿ ಮಾಡಿದ್ದಾರೆ. ಅಲ್ಲದೇ ಕೊರ್ಬಾ ಮತ್ತು ರಾಯಗಡದ ಜಿಲ್ಲಾಧಿಕಾರಿಗಳ ಕಚೇರಿಯ ಗಣಿ ವಿಭಾಗ, ಜಿಲ್ಲಾ ಖನಿಜ ಸಂಸ್ಥೆ ಮತ್ತು ಬುಡಕಟ್ಟು ಕ್ಷೇಮಾಭಿವೃದ್ಧಿ ಇಲಾಖೆಯ ಕಚೇರಿಗಳ ಮೇಲೆ ದಾಳಿ ನಡೆಸಿರುವ ಇಡಿ ಅಧಿಕಾರಿಗಳು, ಶೋಧ ಕಾರ್ಯ ಮುಂದುವರಿಸಿದ್ದಾರೆ.