ಇಂದಿನಿಂದ ಬಾಲಿವುಡ್ ನಲ್ಲಿ ‘ಕಾಂತಾರ’ ಅಬ್ಬರ

Team Udayavani, Oct 14, 2022, 9:36 AM IST

ಸದ್ಯ ಸ್ಯಾಂಡಲ್‌ವುಡ್‌ ಅಂಗಳದಲ್ಲಿ ಭರ್ಜರಿಯಾಗಿ ಸದ್ದು ಮಾಡುತ್ತಿರುವ “ಕಾಂತಾರ’ ಸಿನಿಮಾ ಇದೀಗ ಹಿಂದಿಗೂ ಅಡಿಯಿಡುತ್ತಿದೆ. ಹೌದು, ಕನ್ನಡದಲ್ಲಿ ಬಿಡುಗಡೆಯಾದಾಗಿನಿಂದ ಪ್ರೇಕ್ಷಕರು ಮತ್ತು ವಿಮರ್ಶಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿರುವ “ಕಾಂತಾರ’ ಸಿನಿಮಾ, ಇದೀಗ ಹಿಂದಿ ಭಾಷೆಗೂ ಡಬ್ಬಿಂಗ್‌ ಆಗಿದ್ದು, ಇಂದು ಹಿಂದಿ ಭಾಷೆಯಲ್ಲಿ ಸಿನಿಮಾ ತೆರೆ ಕಾಣುತ್ತಿದೆ.

ಚಿತ್ರತಂಡದ ಪ್ರಕಾರ, “ಕಾಂತಾರ’ ಸಿನಿಮಾದ ಹಿಂದಿ ಅವತರಣಿಕೆಯನ್ನು ಸುಮಾರು 2500ಕ್ಕೂ ಹೆಚ್ಚಿನ ಸ್ಕ್ರೀನ್‌ಗಳಲ್ಲಿ ತೆರೆಗೆ ತರಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ.

ರಿಷಬ್‌ ಶೆಟ್ಟಿ ನಿರ್ದೇಶನದಲ್ಲಿ, ಕರಾವಳಿಯ ಸೊಗಡು ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಹಿನ್ನೆಲೆಯಾಗಿಟ್ಟುಕೊಂಡು ಮೂಡಿಬಂದಿರುವ “ಕಾಂತಾರ’ ಸಿನಿಮಾವನ್ನು “ಹೊಂಬಾಳೆ ಫಿಲಂಸ್‌’ ಬ್ಯಾನರ್‌ನಲ್ಲಿ ವಿಜಯ್‌ ಕಿರಗಂದೂರು ನಿರ್ಮಾಣ ಮಾಡಿದ್ದಾರೆ. ಸಿನಿಮಾದಲ್ಲಿ ರಿಷಬ್‌ ಶೆಟ್ಟಿ ಅವರಿಗೆ ಸಪ್ತಮಿ ಗೌಡ ನಾಯಕಿಯಾಗಿ ಜೋಡಿಯಾಗಿದ್ದಾರೆ.

ಇದನ್ನೂ ಓದಿ:ಪಿಎಂ ಕಿಸಾನ್‌ ಸಮ್ಮಾನ್‌; ಉಡುಪಿಯ 1.5 ಲಕ್ಷ ರೈತರಿಗೆ ಅನುದಾನ: ಶೋಭಾ ಕರಂದ್ಲಾಜೆ

ಉಳಿದಂತೆ ಕಿಶೋರ್‌, ಅಚ್ಯುತ ಕುಮಾರ್‌, ಪ್ರಕಾಶ್‌ ತುಮ್ಮಿನಾಡ್‌, ಮಾನಸಿ ಸುಧೀರ್‌, ಪ್ರಮೋದ್‌ ಶೆಟ್ಟಿ ಮೊದಲಾದವರು “ಕಾಂತಾರ’ ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಸದ್ಯ ಕನ್ನಡದಲ್ಲಿ ಬಾಕ್ಸಾಫೀಸ್‌ ನಲ್ಲಿ ಧೂಳೆಬ್ಬಿಸುತ್ತ ಮುನ್ನಡೆಯುತ್ತಿರುವ “ಕಾಂತಾರ’ದ ವಿಜಯ ಯಾತ್ರೆ, ಇದೀಗ ಉತ್ತರ ಭಾರತದತ್ತ ಮುನ್ನುಗ್ಗುತ್ತಿದ್ದು, ಹಿಂದಿಯಲ್ಲಿ “ಕಾಂತಾರ’ ಅಬ್ಬರ ಹೇಗಿರಲಿದೆ ಅನ್ನೋದು ಈ ವಾರದ ಬಳಿಕ ಗೊತ್ತಾಗಲಿದೆ.