ತುಳುವಿನಲ್ಲೂ ‘ಕಾಂತಾರ’ ಬರುವ ಸಾಧ್ಯತೆ; ಡಬ್ಬಿಂಗ್ ಮಲ್ಪುವೆರ್ ಗೆ ಅಂದಾ?

Team Udayavani, Oct 14, 2022, 9:39 PM IST

ಮಂಗಳೂರು : ಕರಾವಳಿಯ ಕಥೆಯ ಮೂಲವಾಗಿರುವ ರಿಷಬ್ ಶೆಟ್ಟಿ ನಿರ್ದೇಶನದ ಸೂಪರ್ ಹಿಟ್ ಕನ್ನಡ ಚಲನಚಿತ್ರ ‘ಕಾಂತಾರ’ ಈಗಾಗಲೇ ಪಂಚ ಭಾಷಾ ಚಿತ್ರವಾಗಿ ಭಾರಿ ಸದ್ದು ಮಾಡುತ್ತಿದ್ದು, ತುಳುವಿನಲ್ಲೂ ಡಬ್ ಆಗಿ ಬಿಡುಗಡೆಯಾಗಲಿದೆ ಎಂಬ ಸುದ್ದಿಗಳು ಹರಿದಾಡುತ್ತಿದೆ.

ಚಿತ್ರದಲ್ಲಿ ದೈವಾರಾಧನೆ ಕೆಲ ರೋಚಕ ಸನ್ನಿವೇಶಗಳಲ್ಲಿ ತುಳುವಿನ ಕೆಲ ಶಬ್ದಗಳ ಸಂಭಾಷಣೆಗಳನ್ನು ಬಳಸಿಕೊಳ್ಳಲಾಗಿದ್ದು, ಕರಾವಳಿಯ ಹೆಚ್ಚಿನ ಚಿತ್ರ ಪ್ರೇಮಿಗಳು ಈ ಚಿತ್ರ ಸಂಪೂರ್ಣವಾಗಿ ತುಳುವಿನಲ್ಲಿ ಬಿಡುಗಡೆಯಾದರೆ ಇನ್ನಷ್ಟು ಸಂಭ್ರಮಿಸಬಹುದು ಎನ್ನುವ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ :ರೇಟಿಂಗ್ ನಲ್ಲಿ ‘ಕೆಜಿಎಫ್’ ಮೀರಿಸಿದ ‘ಕಾಂತಾರ’; ಕನ್ನಡ ಚಿತ್ರದ ಹೊಸ ದಾಖಲೆ

ಚಿತ್ರದ ಎಲ್ಲಾ ಸನ್ನಿವೇಶಗಳೂ ತುಳುನಾಡಿನ ಆಚರಣೆಗೆ ಹತ್ತಿರವಾಗಿದ್ದು, ಯಾವುದೇ ವೈರುಧ್ಯವನ್ನು ಇತರ ಡಬ್ ಆದ ಚಿತ್ರಗಳಲ್ಲಿ ಕಾಣಿಸಿದಂತೆ ಆಗುವ ಸಾಧ್ಯತೆಗಳು ಕಡಿಮೆ ಎನ್ನುತ್ತಾರೆ ಚಿತ್ರ ಪ್ರೇಮಿಗಳು.

ಈಗಾಗಲೇ ಹಿಂದಿಯಲ್ಲಿ ಚಿತ್ರ ಬಿಡುಗಡೆಯಾಗಿದ್ದು, ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಚಿತ್ರದಲ್ಲಿ ನಟಿಸಿದ ಹಲವು ಮಂದಿ ಕಲಾವಿದರು ತುಳು ಬಲ್ಲವರಾಗಿದ್ದು, ಅವರವರ ಪಾತ್ರಗಳಿಗೆ ಡಬ್ ಮಾಡಲಿದ್ದಾರೆ ಎನ್ನಲಾಗಿದ್ದು, ನಾಯಕ ರಿಷಬ್ ಶೆಟ್ಟಿ, ನಾಯಕಿ ಸಪ್ತಮಿ ಗೌಡ, ಅಚ್ಯುತ್ ಕುಮಾರ್, ಕಿಶೋರ್ ಸೇರಿ ಇತರ ಪ್ರಮುಖ ಪಾತ್ರಗಳಿಗೆ ಡಬ್ ಮಾಡಲು ಸೂಕ್ತ ಕಲಾವಿದರನ್ನು ಸಿದ್ದ ಮಾಡಿಕೊಳ್ಳಲಾಗಿದೆ ಎಂದು ಸುದ್ದಿಗಳು ಹರಿದಾಡುತ್ತಿವೆ.

ತುಳುವಿಗೆ ಡಬ್ ಆಗುವ ಕುರಿತು ಇದುವರಗೆ ಚಿತ್ರ ತಂಡ ಯಾವುದೇ ಅಧಿಕೃತ ಮಾಹಿತಿ ಬಹಿರಂಗ ಪಡಿಸಿಲ್ಲ.