ಹಿಂದಿಗೆ ಡಬ್ ಆದ ‘ಕಾಂತಾರ’ ಮೊದಲ ದಿನ ಗಳಿಸಿದ್ದೆಷ್ಟು? ಗಾಡ್ ಫಾದರ್ ಮೀರಿಸಿದ ರಿಷಬ್ ಸಿನಿಮಾ

Team Udayavani, Oct 15, 2022, 4:28 PM IST

ಸ್ಯಾಂಡಲ್ ವುಡ್ ನಲ್ಲಿ ಸೆನ್ಸೇಶನ್ ಮಾಡಿದ ಕಾಂತಾರ ಇದೀಗ ಬೇರೆ ಭಾಷೆಗಳಲ್ಲೂ ಬಿಡುಗಡೆಯಾಗಿದೆ. ಬೇರೆ ಇಂಡಸ್ಟ್ರಿ ನಟರು, ನಿರ್ದೇಶಕರು ಚಿತ್ರವನ್ನು ನೋಡಿ ಮೆಚ್ಚುಗೆ ಸೂಚಿಸುತ್ತಿದ್ದಾರೆ. ನಟರಾದ ಧನುಷ್, ಕಾರ್ತಿ, ರಾಣಾ ದಗ್ಗುಬಾಟಿ ಮುಂತಾದವರು ಚಿತ್ರವನ್ನು ಕಂಡು ಸಂತಸ ವ್ಯಕ್ತಪಡಿಸುತ್ತಿದ್ದಾರೆ. ಬಾಹುಬಲಿ ಸ್ಟಾರ್ ಪ್ರಭಾಸ್ ಎರಡನೇ ಬಾರಿ ಚಿತ್ರ ನೋಡಿರುವುದಾಗಿ ಟ್ವೀಟ್ ಮಾಡಿದ್ದಾರೆ.

ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶನ ಮಾಡಿರುವ ಕಾಂತಾರ ಸಿನಿಮಾ ಶುಕ್ರವಾರ ಹಿಂದಿ ಭಾಷೆಯಲ್ಲಿ ಬಿಡುಗಡೆಯಾಗಿದೆ. ಹಿಂದಿ ವರ್ಷನ್ ಸುಮಾರು 2500ಕ್ಕೂ ಹೆಚ್ಚಿನ ಸ್ಕ್ರೀನ್ ಗಳಲ್ಲಿ ರಿಲೀಸ್ ಆಗಿದೆ. ಇದೀಗ ಚಿತ್ರದ ಮೊದಲ ದಿನ ಕಲೆಕ್ಷನ್ ಬಗ್ಗೆ ಮಾಹಿತಿ ಲಭ್ಯವಾಗಿದೆ.

ಬಾಲಿವುಡ್ ಟ್ರೇಡ್ ಅನಲಿಸ್ಟ್ ತರಣ್ ಆದರ್ಶ್ ಅವರು ಕಾಂತಾರ ಹಿಂದಿ ಅವತರಣಿಕೆಯ ಮೊದಲ ದಿನದ ಕಲೆಕ್ಷನ್ ವರದಿಯ ಬಗ್ಗೆ ಮಾಹಿತಿ ನೀಡಿದ್ದಾರೆ. “ ಇತ್ತೀಚೆಗೆ ಹಿಂದಿಗೆ ಡಬ್ ಆದ ಚಿತ್ರಗಳಿಗಿಂತ ಕಾಂತಾರ ಚಿತ್ರ ಉತ್ತಮ ಆರಂಭ ಪಡೆದುಕೊಂಡಿದೆ. ಮಹರಾಷ್ಟ್ರದಲ್ಲಿ ಉತ್ತಮವಾಗಿದ್ದು, ಉತ್ತರ ಭಾರತದಲ್ಲಿ ಕಡಿಮೆಯಾಗಿದೆ. ಮೊದಲ ದಿನ 1.27 ಕೋಟಿ ರೂ ಗಳಿಸಿದೆ” ಎಂದು ಟ್ವೀಟ್ ಮಾಡಿದ್ದಾರೆ.

#Kantara *#Hindi version* opens better than recent dubbed films… Picked up pace towards the evening… #Maharashtra leads, North circuits low… Dependent on Day 2 and 3 for a respectable weekend total… Fri ₹ 1.27 cr. #India biz. Nett BOC. pic.twitter.com/VBhq3wsFwF

— taran adarsh (@taran_adarsh) October 15, 2022

ರಿಷಬ್‌ ಶೆಟ್ಟಿ ನಿರ್ದೇಶನದಲ್ಲಿ, ಕರಾವಳಿಯ ಸೊಗಡು ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಹಿನ್ನೆಲೆಯಾಗಿಟ್ಟುಕೊಂಡು ಮೂಡಿಬಂದಿರುವ “ಕಾಂತಾರ’ ಸಿನಿಮಾ ಇತ್ತೀಚೆಗೆ ತೆರೆಗೆ ಬಂದ ಚಿರಂಜೀವಿ-ಸಲ್ಮಾನ್ ಖಾನ್ ನಟನೆಯ ಗಾಡ್ ಫಾದರ್ ಚಿತ್ರಕ್ಕಿಂತ ಹೆಚ್ಚಿನ ಮೊದಲ ದಿನದ ಕಲೆಕ್ಷನ್ ಮಾಡಿದೆ ಎನ್ನಲಾಗಿದೆ.

“ಹೊಂಬಾಳೆ ಫಿಲಂಸ್‌’ ಬ್ಯಾನರ್‌ನಲ್ಲಿ ವಿಜಯ್‌ ಕಿರಗಂದೂರು ನಿರ್ಮಾಣ ಮಾಡಿರುವ ಕಾಂತಾರ ಸಿನಿಮಾದಲ್ಲಿ ರಿಷಬ್‌ ಶೆಟ್ಟಿ ಅವರಿಗೆ ಸಪ್ತಮಿ ಗೌಡ ನಾಯಕಿಯಾಗಿ ಜೋಡಿಯಾಗಿದ್ದಾರೆ. ಉಳಿದಂತೆ ಕಿಶೋರ್‌, ಅಚ್ಯುತ ಕುಮಾರ್‌, ಪ್ರಕಾಶ್‌ ತುಮ್ಮಿನಾಡ್‌, ಮಾನಸಿ ಸುಧೀರ್‌, ಪ್ರಮೋದ್‌ ಶೆಟ್ಟಿ ಮೊದಲಾದವರು “ಕಾಂತಾರ’ ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ

ಸದ್ಯ ಕನ್ನಡದಲ್ಲಿ ಬಾಕ್ಸಾಫೀಸ್‌ನಲ್ಲಿ ಧೂಳೆಬ್ಬಿಸುತ್ತ ಮುನ್ನಡೆಯುತ್ತಿರುವ “ಕಾಂತಾರ’ದ ವಿಜಯ ಯಾತ್ರೆ, ಇದೀಗ ಉತ್ತರ ಭಾರತದತ್ತ ಮುನ್ನುಗ್ಗುತ್ತಿದ್ದು, ಹಿಂದಿಯಲ್ಲಿ “ಕಾಂತಾರ’ ಅಬ್ಬರ ವೀಕೆಂಡ್ ನಲ್ಲಿ ಮತ್ತಷ್ಟು ಹೆಚ್ಚುವ ಸಾಧ್ಯತೆಯಿದೆ.