ಉಗ್ರ ಪಟ್ಟಿಗೆ ಲಷ್ಕರ್‌ ಭಯೋತ್ಪಾದಕ ಶಾಹಿದ್‌ ಸೇರ್ಪಡೆಗೆ ಚೀನ ಅಡ್ಡಿ

Team Udayavani, Oct 20, 2022, 7:35 AM IST

ನ್ಯೂಯಾರ್ಕ್‌: ಪಾಕಿಸ್ಥಾನದ ಉಗ್ರ ಸಂಘಟನೆ ಲಷ್ಕರ್‌-ಎ-ತಯ್ಯಬಾ ನಾಯಕ ಶಾಹಿದ್‌ ಮಹಮೂದ್‌ನನ್ನು ಜಾಗತಿಕ ಉಗ್ರರ ಪಟ್ಟಿಗೆ ಸೇರಿಸಲು ವಿಶ್ವಸಂಸ್ಥೆಯಲ್ಲಿ ಭಾರತ ಮತ್ತು ಅಮೆರಿಕ ಮಾಡಿರುವ ಪ್ರಸ್ತಾವವನ್ನು ಚೀನ ತಡೆಹಿಡಿದಿದೆ.

ಇತ್ತೀಚಿನ ದಿನಗಳಲ್ಲಿ ಉಗ್ರರನ್ನು ಕಪ್ಪು ಪಟ್ಟಿಗೆ ಸೇರಿಸುವ ಪ್ರಯತ್ನಕ್ಕೆ ವಿಶ್ವಸಂಸ್ಥೆಯಲ್ಲಿ ಚೀನ ಅಡ್ಡಗಾಲು ಹಾಕಿರುವ ನಾಲ್ಕನೇ ನಿದರ್ಶನ ಇದಾಗಿದೆ. ಈ ಮೂಲಕ ಚೀನ ತನ್ನ ಕಪಟತನವನ್ನು ಮತ್ತೊಮ್ಮೆ ಪ್ರದರ್ಶಿಸಿದೆ.

ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿಷೇಧಿತ ಉಗ್ರರ ಪಟ್ಟಿಗೆ ಸೇರ್ಪಡೆ ಮಾಡುವ ಭಾರತ ಮತ್ತು ಅಮೆರಿಕದ ಪ್ರಸ್ತಾವಕ್ಕೆ ಪಾಕಿಸ್ಥಾನದ ಪರಮಾಪ್ತನಾಗಿ­ರುವ ಚೀನ ಅಡ್ಡಗಾಲು ಹಾಕಿದೆ.

ಲಷ್ಕರ್‌-ಎ-ತಯ್ಯಬಾದ ನಿಧಿ ಸಂಗ್ರಹ ಮತ್ತು ಅದರ ಬೆಂಬಲ ಜಾಲ­­ವನ್ನು ಭೇದಿಸುವ ನಿಟ್ಟಿನಲ್ಲಿ 2016ರ ಡಿಸೆಂಬರ್‌ನಲ್ಲಿ ಅಮೆರಿಕದ ಹಣಕಾಸು ಇಲಾಖೆ ಮಹಮೂದ್‌(42) ಮತ್ತು ಲಷ್ಕರ್‌-ಎ-ತಯ್ಯಬಾ ಮತ್ತೊಬ್ಬ ನಾಯಕ ಮೊಹಮ್ಮದ್‌ ಸರ್ವರ್‌ನನ್ನು ಜಾಗತಿಕ ಉಗ್ರ ಎಂದು ಘೋಷಿಸಿತ್ತು. ಜೂನ್‌ನಲ್ಲಿ ಉಗ್ರ ಅಬ್ದುಲ್‌ ರೆಹಮಾನ್‌ ಮಕ್ಕಿಯನ್ನು, ಆಗಸ್ಟ್‌ನಲ್ಲಿ ಜೈಶ್‌ ಉಗ್ರ ಅಬ್ದುಲ್‌ ರವೂಫ್ ಅಝರ್‌ನನ್ನು, ಸೆಪ್ಟಂ­ಬರ್‌ನಲ್ಲೂ ಲಷ್ಕರ್‌ ಹ್ಯಾಂಡ್ಲರ್‌ ಒಬ್ಬನನ್ನು ನಿಷೇಧಿತ ಉಗ್ರರ ಪಟ್ಟಿಗೆ ಸೇರ್ಪಡೆ ಮಾಡಲು ಚೀನ ತಡೆಯೊಡ್ಡಿತ್ತು.

ಲಷ್ಕರ್‌-ಎ- ತಯ್ಯಬಾದ ಹಿರಿಯ ನಾಯಕನಾಗಿ­ರುವ ಶಾಹಿದ್‌ ಮಹ­ಮೂದ್‌ ಸದ್ಯ ಕರಾಚಿ­ಯಲ್ಲಿ ನೆಲೆಸಿದ್ದಾನೆ. 2007ರಿಂದ ಲಷ್ಕರ್‌-ಎ-ತಯ್ಯಬಾದೊಂದಿಗೆ ಗುರುತಿಸಿ ಕೊಂಡಿದ್ದಾನೆ.