ಸೀಟು ಬೆಲ್ಟ್ ಹಾಕದಿದ್ದರೆ 1,000 ರೂ. ದಂಡ; ಪ್ರವೀಣ್‌ ಸೂದ್‌

Team Udayavani, Oct 20, 2022, 7:00 AM IST

ಬೆಂಗಳೂರು: ಎಂಟು ಸೀಟಿಗಿಂತ ಕಡಿಮೆ ಸೀಟುಗಳನ್ನು ಹೊಂದಿರುವ ಎಂ1 ಮಾದರಿಯ ವಾಹನಗಳಲ್ಲಿ ಚಾಲಕ ಸೇರಿ ಎಲ್ಲ ಪ್ರಯಾಣಿಕರು ಕಡ್ಡಾಯವಾಗಿ ಸೀಟ್‌ ಬೆಲ್ಟ್ ಧರಿಸಬೇಕು. ಇಲ್ಲವಾದರೆ ಕಾನೂನು ಪ್ರಕಾರ ದಂಡ ವಿಧಿಸಲಾಗುವುದು ಎಂದು ರಾಜ್ಯ ಪೊಲೀಸ್‌ ಮಹಾನಿರ್ದೇಶಕ ಪ್ರವೀಣ್‌ ಸೂದ್‌ ಕಟ್ಟುನಿಟ್ಟಿನ ಆದೇಶ ನೀಡಿದ್ದಾರೆ.

ದಂಡದ ಮೊತ್ತ ಒಂದು ಸಾವಿರ ರೂ. ಆಗಿರಲಿದೆ.ಮೋಟಾರ್‌ ವಾಹನ ಕಾಯ್ದೆ 1988 ನಿಯಮದ ಪ್ರಕಾರ ದ್ವಿಚಕ್ರ ಮತ್ತು ತ್ರಿಚಕ್ರ ವಾಹನ ಹೊರತು ಪಡಿಸಿ ಎಂಟು ಸೀಟಿಗಿಂತ ಕಡಿಮೆ ಸೀಟುಗಳನ್ನು ಹೊಂದಿರುವ ವಾಹನದಲ್ಲಿ ಪ್ರಯಾಣಿಸುವ ಚಾಲಕ, ಇತರ ಪ್ರಯಾಣಿಕರು ಸುರಕ್ಷೆಯ ದೃಷ್ಟಿಯಿಂದ ಸೀಟ್‌ ಬೆಲ್ಟ್ ಧರಿಸಬೇಕು. ಜತೆಗೆ ಕಾರುಗಳಲ್ಲಿಯೂ ಎಲ್ಲ ಸೀಟುಗಳಿಗೆ ಬೆಲ್ಟ್ ಅಳವಡಿಸಬೇಕು ಎಂದು ಕಾರು ತಯಾರಿಕೆ ಕಂಪೆನಿಗಳಿಗೆ ಸೂಚಿಸಲಾಗಿದೆ ಎಂದು ಕಾಯ್ದೆ ತಿಳಿಸಿದೆ.

500 ರೂ.ನಿಂದ 1000 ರೂ.ಗೆ ಹೆಚ್ಚಳ
ಸೀಟ್‌ ಬೆಲ್ಟ್ ಧರಿಸದೇ ವಾಹನ ಓಡಿಸುವ ಚಾಲಕನಿಗೆ ಈ ಮೊದಲು 500 ರೂ. ದಂಡ(ಮೊದಲ ಬಾರಿಗೆ)ವಿಧಿಸಲಾಗಿತ್ತು. ಅದೇ ಚಾಲಕ ಎರಡನೇ ಬಾರಿಯೂ ತಪ್ಪು ಪುನರಾವರ್ತಿಸಿದರೆ ಒಂದು ಸಾವಿರ ರೂ. ದಂಡ ವಿಧಿಸಲಾಗುತ್ತಿತ್ತು. ಆದರೆ, ಇದೀಗ ಮೊದಲ ಬಾರಿಗೇ ಒಂದು ಸಾವಿರ ರೂ. ದಂಡ ವಿಧಿಸಲಾಗುತ್ತದೆ ಎಂದು ರಾಜ್ಯ ಪೊಲೀಸ್‌ ಮಹಾನಿರ್ದೇಶಕರು ಆದೇಶದಲ್ಲಿ ಉಲ್ಲೇಖಿಸಿದ್ದಾರೆ.

ಪ್ರಾಯೋಗಿಕವಾಗಿ ಒಂದೆರಡು ದಿನಗಳ ಕಾಲ ಸಾರ್ವಜನಿಕರಲ್ಲಿ ಅರಿವು ಮೂಡಿಸಲಾಗುತ್ತದೆ. ನಂತರ ಆದೇಶದಂತೆ ತಪಾಸಣೆ ನಡೆಸಿ ದಂಡ ವಿಧಿಸಲಾಗುತ್ತದೆ ಎಂದು ಸಂಚಾರ ವಿಭಾಗದ ಪೊಲೀಸರು ಮಾಹಿತಿ ನೀಡಿದ್ದಾರೆ.