ಪಿಜಿ-ನೀಟ್‌: ರಾಜ್ಯ ಸರಕಾರದ ಅಧಿಸೂಚನೆ ರದ್ದುಪಡಿಸಿದ ಹೈಕೋರ್ಟ್‌

Team Udayavani, Oct 25, 2022, 6:30 AM IST

ಬೆಂಗಳೂರು: 2022ರ ಶೈಕ್ಷಣಿಕ ವರ್ಷದ ಸ್ನಾತಕೋತ್ತರ ಕೋರ್ಸ್‌ಗಳ ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ (ಪಿಜಿ-ನೀಟ್‌)ಯಲ್ಲಿ ಸೇವಾನಿರತ ವೈದ್ಯ ಅಭ್ಯರ್ಥಿಗಳ ಕೋಟಾದ ಸೀಟುಗಳ ಸಂಖ್ಯೆಯನ್ನು ಶೇ.30ರಿಂದ 15ಕ್ಕೆ ಕಡಿತಗೊಳಿಸಿದ್ದ ರಾಜ್ಯ ಸರಕಾರದ ಅಧಿಸೂಚನೆಯನ್ನು ಹೈಕೋರ್ಟ್‌ ರದ್ದುಪಡಿಸಿದೆ.

ಸರಕಾರದ ಅಧಿಸೂಚನೆ ಪ್ರಶ್ನಿಸಿ ಡಾ| ಕೆ.ಎಸ್‌. ಸ್ವಾತಿ, ಡಾ| ಭೀಮಣ್ಣ ಸಿನ್ನೂರ ಸಹಿತ 50ಕ್ಕೂ ಹೆಚ್ಚು ಸೇವಾನಿರತ ವೈದ್ಯರು ಸಲ್ಲಿಸಿದ್ದ ರಿಟ್‌ ಅರ್ಜಿಗಳನ್ನು ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಆಲೋಕ್‌ ಆರಾಧೆ ಹಾಗೂ ನ್ಯಾ| ಎಸ್‌. ವಿಶ್ವಜಿತ್‌ ಶೆಟ್ಟಿ ಅವರಿದ್ದ ವಿಭಾಗೀಯ ನ್ಯಾಯಪೀಠ ಈ ಆದೇಶ ಮಾಡಿದೆ.

ಸೇವಾನಿರತ ವೈದ್ಯರ ಸೀಟುಗಳ ಕೋಟಾ ಶೇ.30ರಿಂದ 15ಕ್ಕೆ ಕಡಿತಗೊಳಿಸಿ 2022ರ ಅ.6ರಂದು ಹೊರಡಿಸಿದ್ದ ಅಧಿಸೂಚನೆ, ಅ.9ರಂದು ಹೊರಡಿಸಿದ್ದ ಸೀಟ್‌ ಮ್ಯಾಟ್ರಿಕ್ಸ್‌ ಅನ್ನು ರದ್ದುಗೊಳಿಸಿ ಆದೇಶಿಸಿರುವ ಹೈಕೋರ್ಟ್‌, ಸೇವಾನಿರತ ವೈದ್ಯ ಅಭ್ಯರ್ಥಿಗಳಿಗೆ ಸೀಟುಗಳ ಕೋಟಾ ಹೊಸದಾಗಿ ನಿಗದಿಪಡಿಸಿ ಮಾನದಂಡಗಳನ್ನು ಪರಿಗಣಿಸಿ ಸೀಟು ಹಂಚಿಕೆ ಪ್ರಕ್ರಿಯೆ ಕೈಗೊಳ್ಳಲು ಸರಕಾರ ಸ್ವತಂತ್ರವಾಗಿದೆ ಎಂದು ಹೇಳಿದೆ.

ಸರಕಾರದ ನಿರ್ಧಾರ ಏಕಪಕ್ಷೀ ಯವಾಗಿದೆ. ಸೀಟುಗಳನ್ನು ಶೇ. 30ರಿಂದ ಶೇ. 15ಕ್ಕೆ ಕಡಿಮೆ ಮಾಡಿರುವುದಕ್ಕೆ ಸೂಕ್ತ ಕಾರಣಗಳನ್ನು ಉಲ್ಲೇಖಿಸಿಲ್ಲ ಆದ್ದರಿಂದ ಅಧಿಸೂಚನೆಯನ್ನು ರದ್ದುಪಡಿಸಲಾಗುತ್ತಿದೆ ಎಂದು ಹೈಕೋರ್ಟ್‌ ಹೇಳಿದೆ.