ಬಿಹಾರ: ದೇವಾಲಯ, ಮಠಗಳ ಕಡ್ಡಾಯ ನೋಂದಣಿ ಮಾಡಲು ಸರಕಾರ ಸೂಚನೆ

Team Udayavani, Nov 5, 2022, 6:32 PM IST

ಪಾಟ್ನಾ: ರಾಜ್ಯದಲ್ಲಿ ನೋಂದಣಿಯಾಗದ ಸುಮಾರು 4000 ದೇವಸ್ಥಾನಗಳು, ಮಠಗಳು ಮತ್ತು ಟ್ರಸ್ಟ್‌ಗಳ ನೋಂದಣಿಯನ್ನು ಮೂರು ತಿಂಗಳೊಳಗೆ ಖಚಿತಪಡಿಸಿಕೊಳ್ಳುವಂತೆ ಬಿಹಾರ ಸರಕಾರವು ರಾಜ್ಯದ ಎಲ್ಲಾ 38 ಜಿಲ್ಲೆಗಳ ಅಧಿಕಾರಿಗಳಿಗೆ ಸೂಚಿಸಿದೆ ಎಂದು ಬಿಹಾರ ಕಾನೂನು ಸಚಿವ ಶಮೀಮ್ ಅಹ್ಮದ್ ಹೇಳಿದ್ದಾರೆ.

ರಾಜ್ಯದ ಹಲವು ದೇವಸ್ಥಾನಗಳು ಮತ್ತು ಮಠಗಳ ಅರ್ಚಕರು ಭೂಮಿಯನ್ನು ವರ್ಗಾವಣೆ ಅಥವಾ ಮಾರಾಟ ಮಾಡಿರುವುದರಿಂದ ದೊಡ್ಡ ಪ್ರಮಾಣದ ಅಕ್ರಮಗಳು ಕಂಡುಬಂದಿವೆ. ಬಿಹಾರ ಸರಕಾರವು ನೋಂದಾಯಿತ ದೇವಾಲಯಗಳು ಮತ್ತು ಮಠಗಳ ಭೂಮಿಯನ್ನು ಅತಿಕ್ರಮಣ ಮಾಡುವುದನ್ನು ತಡೆಯಲು ರಾಜ್ಯದ ಎಲ್ಲಾ ನೋಂದಾಯಿತ ದೇವಾಲಯಗಳಿಗೆ ಬೇಲಿ ಹಾಕುವ ಪ್ರಕ್ರಿಯೆಯನ್ನು ಶೀಘ್ರದಲ್ಲೇ ಪ್ರಾರಂಭಿಸಲಿದೆ ಎಂದು ಸಚಿವ ಶಮೀಮ್ ಅಹ್ಮದ್ ಹೇಳಿದ್ದಾರೆ.

ಬಿಹಾರದ ಎಲ್ಲಾ ಸಾರ್ವಜನಿಕ ದೇವಾಲಯಗಳು / ಮಠಗಳು, ಟ್ರಸ್ಟ್‌ಗಳು ಮತ್ತು ಧರ್ಮಶಾಲಾಗಳು ಬಿಹಾರ ಹಿಂದೂ ಧಾರ್ಮಿಕ ಟ್ರಸ್ಟ್‌ಗಳ ಕಾಯಿದೆ, 1950 ರ ಪ್ರಕಾರ ಬಿಎಸ್‌ಬಿಆರ್‌ಟಿಯಲ್ಲಿ ನೋಂದಾಯಿಸಿಕೊಳ್ಳಬೇಕು. ದೇವಸ್ಥಾನಗಳ ಭೂಮಿ ಸೇರಿದಂತೆ ಆಸ್ತಿಗಳನ್ನು ಅನಧಿಕೃತ ಹಕ್ಕುಗಳಿಂದ ರಕ್ಷಿಸಲು ನೋಂದಣಿ ಕಡ್ಡಾಯವಾಗಿದೆ ಎಂದು ಅವರು ಹೇಳಿದರು.

“ಸಂಬಂಧಿತ ಪ್ರಾಧಿಕಾರದಿಂದ ಪುನರಾವರ್ತಿತ ಜ್ಞಾಪನೆಗಳ ಹೊರತಾಗಿಯೂ ಇನ್ನೂ 4000 ನೋಂದಣಿಯಾಗದ ಸಾರ್ವಜನಿಕ ದೇವಾಲಯಗಳು, ಮಠಗಳು ಮತ್ತು ಟ್ರಸ್ಟ್‌ಗಳು ರಾಜ್ಯದ ಬಹುತೇಕ ಎಲ್ಲಾ ಜಿಲ್ಲೆಗಳಲ್ಲಿ ನಡೆಯುತ್ತಿವೆ. ಎಲ್ಲರೂ ಮೂರು ತಿಂಗಳೊಳಗೆ ಬಿಹಾರ್ ಸ್ಟೇಟ್ ಬೋರ್ಡ್ ಆಫ್ ರಿಲಿಜಿಯಸ್ ಟ್ರಸ್ಟ್ (BSBRT) ನಲ್ಲಿ ನೋಂದಾಯಿಸಿಕೊಳ್ಳಬೇಕು. ತಮ್ಮ ಜಿಲ್ಲೆಗಳಲ್ಲಿ ನೋಂದಣಿಯಾಗದ ಎಲ್ಲಾ ಸಂಸ್ಥೆಗಳನ್ನು ಮೂರು ತಿಂಗಳೊಳಗೆ ನೋಂದಾಯಿಸಲಾಗಿದೆ ಎಂದು ಖಚಿತಪಡಿಸಿಕೊಳ್ಳಲು ನಾನು ಎಲ್ಲಾ ಜಿಲ್ಲಾ ಮ್ಯಾಜಿಸ್ಟ್ರೇಟ್‌ಗಳಿಗೆ ಪತ್ರವನ್ನು ಕಳುಹಿಸುತ್ತಿದ್ದೇನೆ ಎಂದು ಸಚಿವ ಶಮೀಮ್ ಅಹ್ಮದ್ ಶನಿವಾರ ಪಿಟಿಐಗೆ ತಿಳಿಸಿದ್ದಾರೆ.