ಪ್ರೊ ಕಬಡ್ಡಿ ಹಣಾಹಣಿ: ಬೆಂಗಾಲ್‌ ವಾರಿಯರ್ ಗೆ ಭರ್ಜರಿ ಗೆಲುವು

Team Udayavani, Nov 12, 2022, 10:41 PM IST

ಪುಣೆ: ಶನಿವಾರದ ಪ್ರೊ ಕಬಡ್ಡಿ ಹಣಾಹಣಿಯಲ್ಲಿ ಗುಜರಾತ್‌ ಜೈಂಟ್ಸ್‌ ವಿರುದ್ಧ ಬೆಂಗಾಲ್‌ ವಾರಿಯರ್ 46-27 ಅಂತರದ ಭರ್ಜರಿ ಜಯ ಸಾಧಿಸಿದೆ. ಇದರೊಂದಿಗೆ ತನ್ನ ಗೆಲುವಿನ ಸಂಖ್ಯೆಯನ್ನು 6ಕ್ಕೆ ಏರಿಸಿಕೊಂಡಿದೆ.

ಬೆಂಗಾಲ್‌ ಪರ ಮಣಿಂದರ್‌ ಸಿಂಗ್‌, ಶ್ರೀಕಾಂತ್‌ ಜಾಧವ್‌ ಭರ್ಜರಿ ದಾಳಿ ನಡೆಸಿದರು. ಗುಜರಾತ್‌ ಪರ ಚಂದ್ರನ್‌ ರಂಜಿತ್‌ ಉತ್ತಮ ಆಟವಾಡಿದರು.

ಮಣಿಂದರ್‌ 15 ದಾಳಿಗಳಲ್ಲಿ 9 ಬಾರಿ ಯಶಸ್ವಿಯಾದರು. ಒಟ್ಟು 12 ಅಂಕ ಪಡೆದರು. ಶ್ರೀಕಾಂತ್‌ ಜಾಧವ್‌ ಇನ್ನೂ ಪರಿಣಾಮಕಾರಿಯಾಗಿದ್ದರು. ಅವರು 12 ದಾಳಿಗಳಲ್ಲಿ 9 ಬಾರಿ ಯಶಸ್ವಿ ಪ್ರದರ್ಶನ ನೀಡಿ 10 ಅಂಕ ಸಂಪಾದಿಸಿದರು. ಶಕ್ತಿವೇಲ್‌ ರಕ್ಷಣೆಯಲ್ಲಿ ಯಶಸ್ವಿಯಾದರು. ಎದುರಾಳಿ ಯನ್ನು ಕೆಡವಿಕೊಳ್ಳಲು ಅವರು 7 ಬಾರಿ ಯತ್ನಿಸಿದರು. ಇದರಲ್ಲಿ 4 ಬಾರಿ ಯಶಸ್ವಿಯಾಗಿ 4 ಅಂಕ ಪಡೆದರು. ಸುರೇಂದರ್‌ ನಾಡಾ 3 ಅಂಕ ಪಡೆದರು.

ಗುಜರಾತ್‌ ತಂಡದ ಪರ ಚಂದ್ರನ್‌ ರಂಜಿತ್‌ 14 ಬಾರಿ ದಾಳಿ ನಡೆಸಿ 8 ಅಂಕ ಪಡೆದರು. ರಕ್ಷಣೆಯಲ್ಲೂ ಮಿಂಚಿ ಒಂದು ಅಂಕ ಪಡೆದರು. ಇವರನ್ನು ಹೊರತುಪಡಿಸಿ ರಾಕೇಶ್‌ (5) ಒಬ್ಬರೇ ಯಶಸ್ವಿಯಾದದ್ದು. ಇದು 12 ಪಂದ್ಯಗಳಲ್ಲಿ ಗುಜರಾತ್‌ಗೆ ಎದುರಾದ 6ನೇ ಆಘಾತ.

ದಿನದ ಇನ್ನೊಂದು ಪಂದ್ಯದಲ್ಲಿ ಯುಪಿ ಯೋಧಾಸ್‌ 41-30 ಅಂತರದಿಂದ ತೆಲುಗು ಟೈಟಾನ್ಸ್‌ಗೆ ಸೋಲುಣಿಸಿತು. ಇದು ಟೈಟಾನ್ಸ್‌ಗೆ 13 ಪಂದ್ಯಗಳಲ್ಲಿ ಎದುರಾದ 12ನೇ ಆಘಾತ.